સોલા પોલીસ બાપુનગરના યુવકને ગુના બાબતે પૂછપરછ તેમજ નિવેદન નોંધવા માટે પકડી લાવતાં ત્રણ મહિલાએ ચાંદલોડિયા પોલીસચોકી રીતસર માથે લેતાં ચકચાર મચી ગઈ છે. મહિલા પીએસઆઇને ફોન પર આરોપી મહિલાએ ધમકી પણ આપી હતી. આ ત્રણેયે મહિલા પોલીસ સ્ટેશનમાં પોલીસ કર્મચારીઓ સાથે ફેંટ પકડીને ઝપાઝપી કરતાં મામલો ગરમાયો હતો.
સોલા પોલીસ સ્ટેશનમાં ગુજરાત મની લેન્ડર્સ એક્ટ ગુનામાં ચાંદલોડિયા પોલીસચોકીનો સ્ટાફ હીરાવાડીમાં રહેતી ચિરાગ પટેલ નામની વ્યક્તિને પૂછપરછ તેમજ નિવેદન નોંધવા માટે લઈ આવ્યાે હતા. કાલે પોલીસ તપાસમાં ચિરાગ તેના ઘરે મળી આવતાં ચાંદલોડિયા પોલીસચોકી લઈને આવી રહ્યા હતા ત્યારે ચિરાગના મોબાઇલ પર કોઈ મહિલાનો ફોન આવ્યો હતો અને તેણે પોલીસ સાથે વાત કરવા માટે કહ્યું હતું.
ફોન કરનાર મહિલાએ પીએસઆઈને તમે ચિરાગને લઈ જાઓ છો, કાંઈ વાંધો નહીં. હું તમારી ચરબી ઉતારું છું, હું તમે જ્યાં હો ત્યાં આવું છું અને તમને જોઈ લઈશ એમ કહીને ધમકી આપી હતી.
ત્યારબાદ પીએસઆઇ તેમજ સ્ટાફના માણસો ચિરાગની પૂછપરછ અને તેના કોરોનાના ટેસ્ટ અંગેની કામગીરી કરી રહ્યા હતા ત્યારે ચિરાગની બહેન, અન્ય બે મહિલા અને એક પુરુષ સાથે ચોકી પર આવ્યાં હતાં. પીએસઆઇ તેમજ સ્ટાફના માણસો સાથે તોછડી ભાષામાં વાતચીત કરીને કહ્યું કે તમે ચિરાગને કેમ પકડી લાવ્યા છો?
આમ કહેતાં પીએસઆઇએ તેમને કહ્યું કે તમને સમગ્ર હકીકતથી વાકેફ કર્યા હતા. તેમ છતાં ત્રણ મહિલાઓ અને શખ્સે ચિરાગને કહ્યું કે એ અમારે કાંઈ જોવાનું નથી ચાલ, ચિરાગ તું ઊભો થા, તને કોણ પકડે છે તે અમે જોઈએ છીએ.
પીએસઆઇ તેમજ સ્ટાફના માણસોએ ત્રણ મહિલાને સમજવવાની કોશિશ કરી હતી. પોલીસ ચિરાગને પકડી ટેબલ પાછળ બેસવા જતાં ત્રણ મહિલાએ ખોટા આક્ષેપ કરી ચિરાગને છોડાવી લઇ જવા માટે પીએસઆઇ તેમજ સ્ટાફના માણસો સાથે ઝપાઝપી પોલીસ કર્મચારીની ફેંટ પકડીને શર્ટનાં બટન તોડી નાખ્યાં હતાં.
તમે મારા ભાઈને કેમ નથી છોડતા, હું તમારા વિરુદ્ધ ફરિયાદ કરીશ એમ કહીને ખુરશી પણ તોડી નાખી હતી. ત્યારબાદ હેડ કોન્સ્ટેબલ વધુ પોલીસ બોલવાની વાત કરતાં ત્રણ મહિલા નાસી ગઈ હતી. હેડ કોન્સ્ટેબલે પાંચ લોકો વિરુદ્ધ ફરિયાદ નોંધાવતાં પોલીસે ગુનો નોંધી વધુ તપાસ હાથ ધરી છે.