'હિટવેવ'ની આગાહી / હવે આકરા તાપનો વારો: અમદાવાદીઓ હવે 42 ડિગ્રી તાપમાનમાં શેકાવા તૈયાર રહેજો

• કમોસમી વરસાદ બાદ હવે કાળજાળ ગરમીની આશંકા
• અમદાવાદ સહિત કેટલાક જિલ્લાઓમાં પડશે કાળઝાળ ગરમી
• 40થી 42 ડિગ્રી સેલ્સિયસ તાપમાન રહેવાની આગાહી

રાજ્યમાં વેસ્ટર્ન ડિસ્ટર્બન્સના કારણે હવામાનમાં સતત પલટા આવી રહ્યા છે, જેના કારણે ખેડૂતો પારાવાર મુશ્કેલીમાં મુકાયા છે, જોકે હવે કમોસમી વરસાદ વિદાય લેશે તેવી આગાહી વચ્ચે અમદાવાદીઓએ આવતા અઠવાડિયાથી ૪૨ ડિગ્રી જેટલી કાળઝાળ ગરમીમાં શેકાવા તૈયાર રહેવું પડશે.

આ રાજ્યમાં વરસાદની શક્યતા
રાજ્યના કેટલાક વિસ્તારોમાં આવતી કાલ સુધી છૂટોછવાયો વરસાદ પડે તેવી શક્યતા છે. આજે અમદાવાદ સહિત બનાસકાંઠા, પાટણ, ડાંગ, નવસારી, વલસાડ, દમણ, દાદરા-નગરહવેલી, સુરેન્દ્રનગર, અમરેલી, ગીર-સોમનાથ, જામનગર, જૂનાગઢ, પોરબંદર, રાજકોટ, દીવ અને કચ્છ, જ્યારે આવતી કાલે ડાંગ, નવસારી, તાપી, વલસાડ, દમણ, દાદરા-નગરહવેલી, પોરબંદર અને દ્વારકામાં હળવો વરસાદ પડી શકે છે. હજુ ૪૮ કલાક ગાજવીજ તેમજ કેટલાક વિસ્તારોમાં ૪૦ કિ.મી.ની ઝડપ ધરાવતા પવન સાથે હળવો વરસાદ પડી શકે છે.

સતત ત્રણ દિવસ સુધી મહત્તમ તાપમાન નોંધાશે
જોકે હવે વાતાવરણમાં ગરમીની તીવ્રતા વધી શકે છે. અમદાવાદમાં હવે ગરમીનો પારો ત્રણથી ચાર ડિગ્રી જેટલો ઊંચકાઈને ૪૨ ડિગ્રીએ જઈને અટકશે. આવતી કાલે ૪૦ ડિગ્રી ગરમી નોંધાશે, જ્યારે મંગળવારથી ગરમીમાં વૃદ્ધિ થઈને સતત ત્રણ દિવસ સુધી ૪૨ ડિગ્રી સેલ્સિયસ મહત્તમ તાપમાન નોંધાશે.

પંચમહાલમાં સૌથી વધુ ગરમી
શહેરમાં ગઈ કાલે આંશિક વાદળછાયા વાતાવરણને લઈ ૩૮.૬ ડિગ્રી સેલ્સિયસ મહત્તમ તાપમાન નોંધાયું હતું, જે સામાન્ય તાપમાન કરતાં ત્રણ ડિગ્રી ઓછું હતું. જ્યારે આજે લઘુતમ તાપમાન ૨૬ ડિગ્રી હતું, જે સામાન્ય તાપમાન જેટલું જ હતું. શહેરના લઘુતમ તાપમાનમાં પણ આવતા અઠવાડિયાથી એક ડિગ્રીનો વધારો થશે તેવી પણ હવામાન વિભાગની આગાહી હોઈ શહેરીજનોએ સવારથી આકરો તાપ સહન કરવાની તૈયારી રાખવી પડશે. રાજ્યમાં ગઈ કાલે પંચમહાલમાં સૌથી વધુ ૩૯.૧ ડિગ્રી સેલ્સિયસ ગરમી પડી હતી.