સ્વનિર્ભરતા પર બબાલ / મોટી બહેને એવો નિર્ણય લીધો કે સગી બહેનો જ તેના જીવની દુશ્મન બની ગઇ, જાણો શું હતી ઘટના

• આખી રાત સ્વરા રોડ પર ભટકતી રહી હતી
• કેમ સગી બહેનો જ સ્વરાના જીવની દુશ્મન બની ગઇ હતી?
• અઠવાડિયા સુધી 181ને કાઉન્સેલિંગ કરી સ્વરાની નોકરી પાછી અપાવી

અસારવામાં રહેતી 22 વર્ષીય સ્વરાના સમાજમાં છોકરીઓ 17-18 વર્ષની થાય ત્યારે જ લગ્ન કરાવી દેવામાં આવતા હતાં. જોકે સ્વરા લગ્ન ન કરી સ્વનિર્ભર બનવા માંગતી હોવાથી તે બ્યુટી પાર્લરનો કોર્સ કરી નોકરી કરતી હતી. સ્વરા હંમેશા કહેતી કે હું મને ગમશે તો જ લગ્ન કરીશ નહીતર નહીં કરૂં. ઓછા ભણેલા અને વ્યસનના રવાડે ચઢેલા યુવાનો સમાજમાં વધારે હોવાથી સ્વરાએ પોતાનું સ્ટેન્ડ ક્લિયર રાખ્યું હતું. જોકે તેની બન્ને નાની બહેન મીના અને શીનાને સ્વરાનાં સ્વાવલંબી થવાં સામે વાંધો હતો. આ બન્ને બહેનોને એ વાતની ચિંતા હતી કે જ્યાં સુધી મોટી બહેન સ્વરા લગ્ન નહીં કરે ત્યાં સુધી તેમના લગ્ન નહીં થાય. આથી તે વારંવાર સ્વરા સાથે કોઇને કોઇક કારણસર ઝઘડો કરતી હતી.

બહેનની નોકરી છોડાવવા કરી આ તરકીબ

મીના અને શીનાને એ વાતનો વહેમ હતો કે તે જ્યાં નોકરી કરે છે તે મેડમ તેને આ બધું શીખવે છે. જેથી આ બન્ને બનેનોએ તરકીબ કરી અને વિચાર્યું કે જો સ્વરાની નોકરી છુટી જશે તો તે લગ્ન કરી લેશે. તેથી મીના અને શીના વારંવાર અલગ અલગ મુદ્દાને લઇને સ્વરા સાથે ઝઘડો કરતી હતી. અઠવાડીયા પહેલા સ્વરા સાથે કામ કરવા બાબતે ઝઘડો કર્યો. સ્વરા નોકરી ગઇ તો તેની પાછળ પાછળ બન્ને બહેનો પણ સ્વરાનાં નોકરીનાં સ્થળે ગઇ હતી. જ્યાં બન્નેએ સ્વરા સાથે ઝઘડો કર્યો હતો. 

સ્વરાએ એક જગ્યાથી બ્લેડ ખરીદી હાથની નસ કાપવાનો પ્રયાસ કર્યો

સ્વરાનાં નોકરીનાં સ્થળે થઇ રહેલાં ઝઘડામાં સ્વરાની પિતરાઇ બહેને સમાધાન કરાવ્યું હતું. પિતરાઇ બહેન સ્વરાને પોતાની સાથે લઇ ગઇ અને જમાડી આરામ કરાવી ઘરે મોકલી હતી. સ્વરા ઘરે પહોંચી ત્યારે પણ શીના-મીના બન્નેએ તેને રોજની જેમ આત્મહત્યા કરવા પ્રેરીત કરી હતી. આથી કંટાળેલી સ્વરા ઘરેથી નીકળી ગઇ હતી. આખી રાત ભટકતી રહી. બીજા દિવસે તેણે એક જગ્યાથી બ્લેડ ખરીદી હાથની નસ કાપવાનો પ્રયાસ કરી રહી હતી.

જાગૃત મહિલાએ બચાવ્યો સ્વરાનો જીવ

સ્વરાને હાથની નશ કાપતા જોઇને એક જાગૃત મહિલાએ મહિલા હેલ્પલાઇન 181ની મદદ માંગી. 181ના કાઉન્સેલર બિનલબેન ઘટના સ્થળે પહોંચતા સ્વરાએ જણાવ્યું કે તે જે પાર્લરમાં નોકરી કરે છે એ બેને તને મફતમાં બધું શીખવ્યું હતું. એજ બહેને મને નોકરી પણ આપી હતી. મારી બહેનોએ તેમનું અપમાન કર્યુ એટલે તેમણે મને નોકરીમાંથી કાઢી મુકી છે એટલે મારે નથી જીવવું. બિનલબહેને તેનું કાઉન્સેલિંગ કરી તેના પરિવારના તમામ સભ્યોનું કાઉન્સેલિંગ કર્યું હતું. અંતે પરિવારજનો સ્વરાને નોકરી કરાવવાં તૈયાર થયા હતાં.

અઠવાડિયા સુધી 181એ કાઉન્સેલિંગ કરી સ્વરાની નોકરી પાછી અપાવી

સ્વરાની જુની નોકરીની જગ્યાએ ફરી આપવાથી ઇન્કાર કરતા હતાં. તેઓનું માનવું હતું કે સ્વરાને નોકરી આપીશું તો તેના પરિવારજનો ફરી અહીં આવી ઝઘડો કરશે. જેથી એક અઠવાડિયા સુધી રોજ બિનલ બહેને સ્વરાને નોકરી અપાવવા બ્યુટી પાર્લરની ઓનર મહિલાને સમજાવી હતી. સ્વરા અઠવાડિયા પછી નોકરી પર પાછી ફરી હતી. બીજી તરફ સ્વરાના ઘરનાની પણ બિનલ બહેને બાંહેધરી લીધી હતી.

(ઘટના સમજાવવા પાત્રોનાં નામ બદલેલ છે.)

આલેખન - ધર્મિષ્ઠા પટેલ, અમદાવાદ