VIDEO: દીવ-દમણ પોલીસ કોન્સ્ટેબલની પરીક્ષા કેન્દ્રમાંથી ઝડપાયો ડમી ઉમેદવાર

અમદાવાદ:શહેરના ઓઢવ વિસ્તારમાં આવેલા એક કોમ્પલેક્ષમાં દીવ દમણ પોલીસ કોન્સ્ટેબલની પરીક્ષાના કેન્દ્રમાં ડમી ઉમેદવાર ઝડપાયો છે. ઓઢવ પોલીસે આ મામલે એક આરોપીની ધરપકડ કરી વધુ તપાસ હાથ ધરી છે.

સમગ્ર ઘટનાની વિગત એવી છે કે બોપલના મારૂતિ એપાર્ટમેન્ટમાં રહેતા અને ટીસીએસ કંપનીમાં ઓપરેશન એક્ઝયુટીવી તરીકે ફરજ બજાવતા તુષારભાઈ લલિતભાઈ પટેલે ઓઢવ પોલીસ સ્ટેશનમાં બે લોકો સામે ફરીયાદ કરી છે. આ પરીક્ષામાં ઓબ્ઝર્વર તરીકે તુષારભાઈ ઓહલ કમલાકર અને બીજા સ્ટાફના માણસો હતા. ત્યારે પરીક્ષામાં 221 ઉમેદવારોને બાયોમેટ્રિક ડિવાઈસમાં અંગૂઠો મૂકીને ચેક કર્યા બાદ પરીક્ષા કેન્દ્રમાં પ્રવેશ આપ્યો હતો.



ઉલ્લેખનીય છે કે પરીક્ષા પૂરી થયા બાદ ઉમેદવારનું વેરિફિકેશનની કામગીરી દરમિયાન એક ઉમેદવારની ફિંગરપ્રિન્ટ બાયોમેટ્રિક ડિવાઈસમાં મેચ ના થતાં તના પર ટીસીએસના તમામ કર્મચારીને શંકા ગઈ હતી. બાદમાં કડક તપાસ અને પૂછપરછ દરમિયાન સંતોષકારક જવાબ ના મળતાં તપાસ કરાઈ હતી. તો ઉમેદવારના ખિસ્સામાંથી બે આધારકાર્ડ મળી આવ્યા હતા. જે બંને આધારકાર્ડ એક જ નામના અને એક જ નંબરના હતા. પરંતુ ફોટા અલગ અલગ હતા. બાદમાં તેની કડક પૂછપરછ કરતા ઉમેદવાર ભાગી પડયો હતો અને ડમી ઉમેદવાર તરીકે પરીક્ષા આપી હોવાની કબૂલાત કરી હતી. 

આપને જણાવી દઇએ કે જેમાં આ ડમી ઉમેદવારનું સાચુ નામ દેવેન્દ્રસિંહ લાલસિંહ રાઠોડ અને મૂળ રાજસ્થાનના અજમેર નજીકના પરમદરા ગામનો રહેવાસી હોવાનું ખુલ્યું હતું. જ્યારે ભાણેજ ભવરસિંહ શંકરસિંહ શેખાવત પણ રાજસ્થાનના ઈટાવાનો રહેવાસી હોવાનું બહાર આવ્યું હતું. જે પોતાના ભાણેજ વતી ડમી ઉમેદવાર બનીને પરીક્ષા આપવા આવ્યા હોવાનું બહાર આવ્યુ હતું. જેના પગલે ટીસીએસના કર્મચારીઓએ ઓઢવ પોલીસને જાણ કરતા પોલીસે દેવેદ્રસિહની ધરપકડ કરી વધુ તપાસ હાથ ધરી હતી.