બેદરકારી / હમ નહીં સુધરેંગે! AMCની વેબસાઇટ પર દસ મહિના જૂનો કોરોના એક્શન પ્લાન

• માર્ચ-૨૦૨૦ના પ્રારંભમાં શહેરમાં કોરોનાએ ચર્ચા જગાવી હતી
•  સ્માર્ટ સિટીના ઢોલની પોલ ખોલે તેવી જ છે
• તંત્રની વેબસાઇટ પર દસ મહિના જૂનો એક્શન પ્લાન જોવા મળે છે

આ અંગે પૂર્વ મેયર તો વારંવાર બળાપો વ્યક્ત કરી ચૂક્યાં હતાં. કોરોનાનો એક્શન પ્લાન તો અનેક વાર કોરોનાના સંક્રમણના આધારે તંત્રે બદલ્યો છે, પરંતુ તંત્રની સત્તાવાર વેબસાઇટ પર તે મહિનાઓથી બદલાયો નથી. 

માર્ચ-૨૦૨૦ના પ્રારંભમાં શહેરમાં કોરોનાએ ચર્ચા જગાવી હતી

માર્ચ-૨૦૨૦ના પ્રારંભમાં શહેરમાં કોરોનાએ ચર્ચા જગાવી હતી અને તે વખતે ઘડી કઢાયેલો એક્શન પ્લાન હેલ્થ વિભાગે વેબસાઇટ પર 'દાદીમાનાં ઘરેણાંની ડાબલી'ની જેમ આજે પણ જાળવી રાખ્યો છે. અમદાવાદીઓ શનિવારથી કોરોના વેક્સિન લેવા જશે પણ મ્યુનિ. તંત્રની સત્તાવાર વેબસાઇટ www.ahmedabad.gov.inને નાગરિક જોશે-તપાસશે તો માર્ચ-૨૦૨૦ના કોરોના એક્શન પ્લાનને નિહાળી ભારે અચંબામાં મુકાઈ જશે.

સ્માર્ટ સિટીના ઢોલની પોલ ખોલે તેવી જ છે

શહેરમાં મ્યુનિ. વહીવટીતંત્ર દ્વારા વારંવાર સ્માર્ટ સિટીની ગુલબાંગ પોકારાય છે. અમદાવાદને સ્માર્ટ સિટીને લગતા વિવિધ સ્તરેથી અપાતા એવોર્ડની તંત્ર છાતી કાઢીને જાહેરાત કરે છે. આમાં તંત્ર ભલે ફુલાઈ જતું હોય, પરંતુ અસલી વાસ્તવિકતા તો સ્માર્ટ સિટીના ઢોલની પોલ ખોલે તેવી જ છે.

તંત્રની વેબસાઇટ પર દસ મહિના જૂનો એક્શન પ્લાન જોવા મળે છે

હવે જ્યારે તંત્રના વિવિધ એક્શન પ્લાનથી શહેરમાં કોરોનાની સેકન્ડ વેવનો પ્રકોપ ઘટ્યો છે. વધુ ને વધુ ખાનગી હોસ્પિટલને કોવિડ ડેઝિગ્નેટેડ હોસ્પિટલ જાહેર કરવી, સરકારી હોસ્પિટલમાં બેડની સંખ્યા વધારવી, દરરોજ માઇક્રો કન્ટેન્મેન્ટ એરિયાની સમીક્ષા, જાહેર સ્થળોએ કોરોના ટેસ્ટિંગ ડોમ વગેરેથી કોરોના કાબૂમાં આવીને શનિવારથી હેલ્થ વર્કર્સ વેક્સિન લેતા થશે, પરંતુ તંત્રની વેબસાઇટ પર દસ મહિના જૂનો એક્શન પ્લાન જોવા મળે છે.

તા. ૯ માર્ચ, ૨૦૨૦નો આ એક્શન પ્લાન તંત્રની લોકોમાં હાંસી ઉડાવે છે, જોકે આ અંગે ઈ-ગવર્નન્સ વિભાગના અધિકારીઓ હેલ્થ વિભાગને દોષી ગણાવે છે. તેઓ કહે છે, ''હેલ્થ વિભાગ કોઈ પણ માહિતી અપડેટ કરતો નથી તો અમે કયા નવા ડેટા વેબસાઇટ પર મૂકીએ!''