અમદાવાદ / વિકાસની મસમોટી વાતો વચ્ચે AMCને રૂ. 550 કરોડનું મસમોટુ દેવું, લોન લેવા ગ્રીન બોન્ડ બહાર પાડ્યા

• વિકાસની મસમોટી વાતો વચ્ચે AMC બન્યું દેવાદાર
• AMCએ લોન લેવા માટે ગ્રીન બોન્ડ બહાર પાડ્યા
• AMCનું બજેટ રાજ્યની તમામ મહાપાલિકામાં સૌથી વધુ

અમદાવાદ મ્યુનિસિપલ કોર્પોરેશન કે જેનું બજેટ રાજ્યની તમામ મહાનગરપાલિકામાં સૌથી વધુ હોય છે. પરંતુ બજેટ વધુ હોવા છતાં અમદાવાદ કોર્પોરેશન દેવાદાર બન્યું છે. વિકાસની મસમોટી વાતો વચ્ચે AMC દેવાદાર બન્યું હોવાનું જાણવા મળી રહ્યું છે. AMC પર હાલમાં રૂ.550 કરોડનું મસમોટુ દેવું થઇ ગયું છે. આથી, AMC હવે વિકાસ કરવા માટે લોન લેશે. AMC GSFA પાસેથી વધુ 350 કરોડની લોન લેશે.

AMCએ લોન લેવા માટે ગ્રીન બોન્ડ બહાર પાડ્યા

AMCએ લોન લેવા માટે ગ્રીન બોન્ડ બહાર પાડ્યા છે. સરકાર પાસે 50 ટકા સહાયતા માટે ગ્રીન બોન્ડ બહાર પાડશે. ગ્રીન પ્રોજેક્ટના ગ્રીન બોન્ડ પેટે 459 કરોડનો DPR મંજૂર થયો છે. જેમાં ગ્રીન હાઉસિંગ, વોટર રિસાયક્લિંગ અને ટ્રાન્સપોર્ટેશન પ્રોજેક્ટના કામો થશે. AMCમાં રૂપિયા 250 કરોડના બિલો હાલ પેન્ડિંગ છે. AMCએ રૂ.72 કરોડ રાજ્ય સરકાર પાસેથી લેવાના બાકી છે.

ઉલ્લેખનીય છે કે, ગયા વર્ષે 963 કરોડના વિકાસના કામો થયા હતા. જ્યારે આ વર્ષે 1217 કરોડના વિકાસના કામો થયા. તો લાઈટથી પગાર સુધીનો 325 કરોડ ખર્ચ AMC ચલાવવા માટે થાય છે. રૂપિયા 2468 કરોડની આવક છે અને 2490 કરોડનો ખર્ચ જોવા મળી રહ્યો છે.

માત્ર વિકાસના નામે પ્રજા પર બોજ વધારવામાં આવી રહ્યો છે: વિપક્ષ

તો બીજી બાજુ વિપક્ષે એવો આક્ષેપ કર્યો છે કે માત્ર વિકાસના નામે પ્રજા પર બોજ વધારવામાં આવી રહ્યો છે. લોન લઇને મનપાનું દેવું વધારવામાં સત્તા પક્ષ કામ કરી રહ્યું છે. આ વર્ષનું મનપાનું બજેટ 10 હજાર કરોડ સુધીનું છે છતાં મનપા દેવામાં ડૂબી રહી છે. લોન લઈને વિકાસના કામો કરતી મનપાનું દેવું ક્યારે પૂર્ણ થશે તે જોવાનું રહ્યું.