મ્યુનિસિપલ કોર્પોરેશનના સત્તાવાળાઓ દ્વારા શાકભાજી-ફળફળાદીના ફેરિયા, દૂધ, કરિયાણા, ઘંટીવાળા તેમજ ઓનલાઇન ફૂડ ડિલિવરી કરતી કંપનીના ડિલિવરી બોય તથા સુપર માર્કેટના સ્ટાફને કોરોનાના સંક્રમણને અન્ય નાગરિકોમાં ઝડપભેર ફેલાવનારા તરીકે ઓળખાવીને કોરોના સુપર સ્પ્રેડર્સ જાહેર કરાયા હતા. ગત તા.ર૦ એપ્રિલથી આ સુપર સ્પ્રેડર્સ કેટેગરીના સ્ક્રીનિંગ અને ટેસ્ટિંગથી કોરોના કેસની તપાસ આરંભાઇ હતી. તંત્રે એક મહિના સુધી આ તપાસ ચાલુ રાખી હતી, પછી અચાનક સત્તાવાળાઓએ 'યુ ટર્ન' લઇને સુપર સ્પ્રેડર્સની ફાઇલને અભરાઇએ ચઢાવી દીધી હતી. હવે જ્યારે સુપર સ્પ્રેડર્સ કોરોનાનો ચેપ ફેલાવવામાં વધુ ભયાનક બન્યા છે ત્યારે દોઢ મહિના બાદ તંત્ર જાણે કે ઊંઘતું ઝડપાયું હોય તેવી શરમજનક સ્થિતિ સર્જાઇ છે. આમાં ચોક્કસપણે નિર્દોષ નાગરિકો કફોડી સ્થિતિમાં મુકાયા છે.
શહેરમાં કોરોનાના કેસ વધી રહ્યા છે, પરંતુ આ વાસ્તવિક આંકડો છુપાવવાનો ખેલ ખેલાતો હોઇ હવે કોરોનાના કેસના મામલે અમદાવાદ કરતાં સુરત હોટસ્પોટ બન્યું છે તેમ સરકારી આંકડાથી લાગી રહ્યું છે, પરંતુ જે પ્રકારે દરરોજ માઇક્રો કન્ટેન્મેન્ટ એરિયા વધી રહ્યા છે તેને જોતાં તંત્ર પ્રજાની નજરે હાસ્યાસ્પદ બની રહ્યું છે. આજની તારીખમાં શહેરમાં કુલ ૧૩૮ માઇક્રો કન્ટેન્મેન્ટ એરિયા છે. ગત તા.૧ જુલાઇએ ફકત ૪૦ માઇક્રો કન્ટેન્મેન્ટ એરિયા હતા, જેમાં છેલ્લા સાત દિવસમાં લગભગ ૧૦૦ એરિયા જો વધ્યા હોય તો તે શહેરમાં કોરોનાની સ્થિતિની ગંભીરતા દર્શાવે છે. આ માટે સુપર સ્પ્રેડર્સ પણ જવાબદાર છે.
લોકડાઉન દરમિયાન સત્તાધીશો દ્વારા સુપર સ્પ્રેડર્સ માટે હેલ્થકાર્ડ ફરજિયાત કરાયું હતું. ગત તા.ર૦ મે સુધીમાં શહેરમાં ર૮,૩૪૩ ફેરિયા અને ૪૧,પ૪૯ શાકભાજી, દવા, દૂધ, કરિયાણા-ઘંટીવાળા વગેરે દુકાનદાર હેલ્થકાર્ડ ધારક હતા. તે વખતે ઓનલાઇન ફૂડ ડિલિવરી કરતી કંપનીના ડિલિવરી બોય અને સુપર માર્કેટનો સ્ટાફ મળીને કુલ ૪,ર૯૬ને પણ હેલ્થકાર્ડ અપાયાં હતાં. શહેરમાં કુલ ૭૪,૧૮૮ સુપર સ્પ્રેડર્સ હેલ્થકાર્ડ ધારક હતા. આ તમામ માટે દર ૧પ દિવસે હેલ્થકાર્ડ રિન્યૂ કરાવવું ફરજિયાત હતું. નાગરિકો જોઇ શકે તે મુજબ હેલ્થકાર્ડ પહેરવું આવશ્યક હતું. ગોળ કુંડાળાનું સોશિયલ ડિસ્ટન્સિંગ, માસ્ક, સેનેટાઇઝર પણ જરૂરી હતાં.
શહેરીજનોને એક સમયે શાકભાજી-ફળફળાદીની ખરીદી કરવાના બદલે કઠોળનો વપરાશ કરવાની જાહેર અપીલ કરનાર સત્તાવાળાઓએ હેલ્થકાર્ડ ધારક સુપર સ્પ્રેડર્સ જ જીવન જરૂરિયાતની વસ્તુઓનું વેચાણ કરી શકશે તેવો આદેશ બહાર પાડતાં સામાન્ય નાગરિકોએ હાશકારો અનુભવ્યો હતો. તેમ છતાં તંત્રે નિયમનું પાલન કરાવવામાં ઘોર ઉદાસીનતા દાખવી હતી. છેવટે અમદાવાદીઓ માટે હેલ્થકાર્ડ બહુ મોટું ધુપ્પલ પુરવાર થયું હતું.
આમાં પણ શરમજનક બાબત એ હતી કે તંત્રે આંકડા છુપાવવાનો કારસો રચીને કોરોના પોઝિટિવ સુપર સ્પ્રેડર્સની માહિતી દરરોજ સરકારી યાદીમાં જાહેર કરવાનું ટાળ્યું હતું અને ગત તા.૧૬ મેએ એકસાથે ૭૦૯ પોઝિટિવ સુપર સ્પ્રેડર્સને સરકારી યાદીમાં ઉમેરી દીધા હતા, જેના કારણે તે દિવસે શહેરમાં કોરોનાના કુલ ૯૭૩ કેસ નોંધાયા હતા. મ્યુનિ. તંત્ર દ્વારા દરરોજ કોરોનાના કેસમાં વધારો દર્શાવવો ન પડે તે માટે ૭૦૯ પોઝિટિવ સુપર સ્પ્રેડર્સના આંકડાને અલગ રખાયો હતો. સુપર સ્પ્રેડર્સની તપાસના આજથી શરૂ થનારા બીજા રાઉન્ડમાં પણ તંત્ર આવો કીમિયો ફરી અજમાવશે તેમ ચર્ચાઇ રહ્યું છે.
બીજા રાઉન્ડમાં તો પાણીપૂરીવાળા, સમોસાવાળા, લારી-ગલ્લાવાળા, પાનના ગલ્લા તેમજ હેર કટિંગ સલૂન વગેરેનો પણ સમાવેશ કરાયો હોઇ આ વખતે તો કોરોના પોઝિટિવ સુપર સ્પ્રેડર્સની સંખ્યા પહેલા રાઉન્ડ કરતાં પણ વધશે તે બાબત દીવા જેવી સ્પષ્ટ હોવા છતાં શું તંત્ર પુનઃ આંકડા છુપાવીને લોકોની આંખમાં ધૂળ નાખશે તેવો પ્રશ્ન પણ અત્યારથી પુછાઇ રહ્યો છે.
જોકે જે પ્રકારે એન્ટીજન રેપિડ ટેસ્ટ થઇ રહ્યા છે તેને જોતાં શહેરમાં દરરોજ પ૦૦-૬૦૦ કોરોનાના કેસ મ્યુનિ. ચોપડે નોંધાવા જ જોઇએ, પરંતુ કમનસીબે લોકોમાં ગભરાટ ફેલાય નહીં તેવા આશયથી મ્યુનિ. કોર્પોરેશન આંકડાની રમત રમી રહ્યું છે, જે સરવાળે લોકો માટે જ ઘાતક પુરવાર થઇ શકે છે.