વડોદરાઃ બુલેટ ટ્રેનનો ટ્રેક બનાવવા અને ટ્રેનિંગ માટે જાપાનથી સામાનનો પ્રથમ જથ્થો ગુજરાતના વડોદરા પહોંચી ગયો છે. હાઇ સ્ટ્રેન્થ કોંક્રીટથી બનેલ સ્લેબને માત્ર જાપાનમાં તૈયાર કરવામાં આવે છે જેના પર હાઇ સ્પીડ ટ્રેન ચાલે છે.
બુલેટ ટ્રેન પ્રોજેક્ટ માટે 250 ટન વજનના 20 સ્લીપર સ્લેબ ટ્રેક જાપાનથી લાવવામાં આવ્યા છે. અમદાવાદ-મુંબઇ વચ્ચે અંદાજિત 508 કિલોમીટરના ટ્રેક પર બુલેટ ટ્રેન ચલાવવામાં આવશે.
200 મીટરનો ટ્રેક બનાવવાનું કામ પણ હાઇ સ્પીડ રેલ ટ્રેનિંગ ઇન્સ્ટીટ્યૂટ વડોદરામાં ચલાવવામાં આવી રહ્યું છે. આ ટ્રેકમાં 20 સ્લીપર ટ્રેક સ્લેબ્સ લગાવવામાં આવશે. અહીં વિદ્યાર્થીઓ અને રેલ કર્મચારીઓને ટ્રેનિંગ આપવામાં આવશે. બુલેટ ટ્રેનની ડેડલાઇન ઓગષ્ટ 2022 રાખવામાં આવી છે.
તમને જણાવી દઇએ કે બુલેટ ટ્રેન માટે અમદાવાદથી લઇને મુંબઇ સુધી ખેડૂતોની જમીન સંપાદન કરવામાં આવી રહી છે. જેમાં 198 ગામોમાંથી 164 ગામોની જમીનોને સંપાદન કરવાનું કામ ચાલુ છે. 34 ગામોના ખેડૂતોએ કોર્ટમાં મામલો દાખલ કર્યો છે.