અમદાવાદની કાલુપુર પોલીસે એવી ગેંગ પકડી જે ગેંગનું નામ છે ચીપકલી ગેંગ. બિલકુલ ગરોળીની જેમ આ ગેંગના સભ્યો દીવાલ પર ચઢીને જ ચોરી કરવા ઘૂસતા હતા. આંતરરાજ્ય ગેંગના ત્રણ લોકોને પકડી કાલુપુરમાં એક સાથે થયેલી પાંચ દુકાનની ચોરીનો ભેદ ઉકેલાયો. જાણો કોણ છે ચીપકલી ગેંગ..
ચીપકલી ગેંગ પોલીસ સંકજામાં
ગરોળીની માફક દીવાલ પર ચઢી ચોરી કરવા ઘૂસતા
આંતરરાજ્ય ગેંગ અગાઉ પણ ઝડપાઇ ચુકી છે
બસમાં આવીને અવાવરું જગ્યાએ રોકાતા આરોપીઓ
નૂર મહોમદ શેખ, સલમાન ખાન શેખ અને મુશરફ ઉર્ફે હાડો શેખ નામના શખ્સો ચીપકલી ગેંગના છે. આ તમામ લોકો ઉત્તરપ્રદેશ અને મધ્યપ્રદેશના રહેવાસી છે. આરોપીઓએ તાજેતરમાં જ કાલુપુર વિસ્તારમાં પાંચેક દુકાનોમાં પાંચેક લાખની ચોરી કરી હતી. આ ગેંગ સીસીટીવીની ફુટેજમાં કેદ થઈ જતા ચોરીનો મુદ્દામાલ લઈને ભાગે તે પહેલા જ આરોપીઓની કાલુપુર પોલીસે ધરપકડ કરી તમામ મુદ્દામાલ રિકવર કર્યો હતો.
આરોપીઓ જેલમાંથી બહાર આવી અન્ય રાજ્યોમાંથી શહેરમાં બસ મારફતે આવતા અને બાદમાં જે તે જગ્યાની રેકી કરતા હતા. ક્યાંથી તેઓ ચઢી શકે અને જે તે મકાન કે દુકાનમાં ઘુસી શકે તેનો પ્લાન બનાવતા. આટલું જ નહીં પ્લાન મુજબ ચોરી કરવા જતા એ પહેલા અનેક દિવસો સુધી બિનવારસી જગ્યાએ અવાવરું જગ્યાએ રોકાતા. બાદમાં ચોરી કરવા જાય ત્યારે છીપકલી એટલે કે ગરોળીની માફક દિવાલ પર ચઢીને ચોરી કરવા જતા હતા. બાદમાં ભિખારી બનીને ફુટપાથ પર રહેતા હતા. આ ટોળકીએ રાજસ્થાન, તેલગંણા, ઉત્તરપ્રદેશ બાદ હવે ગુજરાતમા ચોરી કરી આતંક મચાવવા આવ્યા હોવાનુ તપાસમાં ખુલ્યું છે.
આરોપી નૂર મહોમદ શેખ સામે 21 ગુના, સલમાન ખાન શેખએ 10 અને મુશરફ ઉર્ફે હાડો શેખ સામે બે ગુના નોંધાયા છે. અન્ય રાજ્યોની પોલીસ પણ આરોપીઓ શોધી રહી હતી તેવામાં કાલુપુર પોલીસે ઝડપી પાડતા અનેક ગુનાના ભેદ ઉકેલાયા છે.