સુભાષબ્રિજ પર આવેલી પ્રાદેશિક વાહનવ્યવહાર કચેરી એટલે કે, RTOમાં વર્ષ 2018માં નાતાલની રજાઓ દરમિયાન RTO કચેરીનાં સોફ્ટવેયરમાં પાસવર્ડ નાખી કુલ 84 જેટલાં બેકલોગ કરીને લાઈસન્સ ઈશ્યુ કરાયાં હતાં. આ કૌભાંડ મામલે અમદાવાદ ક્રાઈમ બ્રાન્ચે અમદાવાદનાં એજન્ટ તેમજ અગાઉ ભૂજ RTOમાં કમ્પ્યુટર ઓપરેટર તરીકે કામ કરતા યુવકની ધરપકડ કરી છે.
ક્રાઇમબ્રાન્ચ દ્વારા RTO કચેરીમાં ચાલતા કૌભાંડનો પર્દાફાશ કરવામાં આવ્યો છે. 2018માં નાતાલની બે દિવસની રજા દરમ્યાન કોઈ અજાણી વ્યક્તિએ અમદાવાદ RTOમાં સારથિ-4 સોફ્ટવેયરમાં પાસવર્ડ નાખી કુલ 84 જેટલી બેકલોગ એન્ટ્રી દ્વારા બોગસ લાઈસન્સ ઈશ્યુ કર્યા હતાં.
જે મામલે અમદાવાદ ક્રાઈમ બ્રાન્ચમાં ગુનો દાખલ કરવામાં આવ્યો હતો. ક્રાઈમ બ્રાન્ચનાં પીઆઈ કે.જી. ચૌધરી અને ટીમે RTOમાં સીસીટીવી અને ટેક્નિકલ સર્વેલન્સની મદદથી ભૂજનાં હિલવ્યૂ રેસિડેન્સિમાં રહેતા મહેદ્ર ઉર્ફે પાજી જાદવ ભરવાડની અને રાકેશ પટણીની ધરપકડ કરી છે.
પોલીસે આરોપીઓ પાસેથી લેપટોપ અને મોબાઈલ ફોન કબ્જે કર્યા છે. આરોપી મહેન્દ્ર 2010થી 2018 સુધી ભૂજ RTOમાં કોમ્પ્યુટર ઓપરેટર તરીકે ફરજ બજાવતો હતો. જ્યારે રાકેશ અમદાવાદ RTOમાં 6 વર્ષથી એજન્ટ તરીકે કામ કરતો હતો. RTOનાં કામ અર્થે બંને એકબીજાનાં સંપર્કમાં આવ્યાં હતાં.
ઝડપથી પૈસા કમાવવા માટે રાકેશ પટણીએ રજાનાં દિવસનો લાભ લઈને કોમ્પ્યુટર ઓપરેટરનાં ટેબલ પરથી સોફ્ટવેયર યુઝર આઈડી અને પાસવર્ડ મેળવ્યાં હતાં. રાકેશે વોટ્સએપ દ્વારા યુઝર આઈડી અને પાસવર્ડ મહેન્દ્રને મોકલ્યાં હતાં. મહેન્દ્રએ તેનાં આધારે સોફ્ટવેયરમાં ખોટી એન્ટ્રી કરી બોગસ લાઈસન્સ બનાવ્યાં હતાં.
RTOનું આ કૌભાંડ રાજ્યવ્યાપી કૌભાંડ હોવાની આશંકા સેવાઇ રહી છે. ઝડપાયેલાં બંને આરોપીઓએ અમદાવાદ અને રાજ્યનાં અન્ય શહેરોમાં આવેલી RTO કચેરીમાં બેકલોગ એન્ટ્રીઓ કરી ખોટા લાઈસન્સ ઈશ્યુ કર્યા હોવાનું સામે આવ્યું છે. ગાંધીધામ RTOમાં પણ 248 જેટલી બોગસ એન્ટ્રીઓ થઈ હોવાંની ફરિયાદ અંજાર પોલીસ સ્ટેશનમાં નોંધાઈ છે. જેમાં આ બંને આરોપી હોવાનું પૂરપેરી શક્યતા છે. ત્યારે આ અંગે ક્રાઇમ બ્રાન્ચે વધુ તપાસ હાથ ધરી છે.