અમદાવાદ / નવરંગપુરાનાં બે કોન્સ્ટેબલ ગુમ થવા મામલે સામે આવ્યા CCTV ફુટેજ

અમદાવાદઃ શહેરના નવરંગપુરા પોલીસ સ્ટેશનમાં ફરજ બજાવતા બે પોલીસ કોન્સ્ટેબલોએ નિશિત ગજ્જર નામના યુવકનો બે લાખ રૂપિયાનો તોડ કર્યા બાદ રહસ્યમય રીતે સ્સુયાઇડ નોટ લખીને ગુમ થવાના ચકચારી કિસ્સામાં પોલીસે એ.જી.પોલીસ ચોકી પાસેને સીસીટીવી ફૂટેજ કબજે કર્યા છે. પોલીસ કોન્સ્ટેબલ જીગર નિતિશને જે પોલીસ ચોકીમાં લઇ ગયો હતો તેના સીસીટીવી ફૂટેજ પોલીસે કબજે કર્યા છે.

નવરંગપુરાના પુણ્યશ્લોક એપાર્ટમેન્ટમાં રહેત નિશિત વિપુલભાઇ ગજ્જરે પોલીસ કોન્સ્ટેબલ જિગર સોલંકી અને કૌશલ ભટ્ટ વિરુદ્ધમાં નવરંગપુરા પોલીસ સ્ટેશનમાં માર મારીને બે લાખ રૂપિયાનો તોડ કરવાની ફરિયાદ કરી છે. ફરિયાદમાં કરેલા આક્ષેપ પ્રમાણે નિશિતની સગાઇ હોવાથી તે તારીખ ૧૨ જુલાઇના રોજ મિત્રોને આમંત્રણ આપીને પોતાની કારમાં ઘરે આવતો હતો તે સમયે નવરંગપુરા પોલીસ સ્ટેશનમાં ફરજ બજાવતા જિગર સોલંકીએ તેને રોક્યો હતો.

ઓવર સ્પીડમાં ગાડી ચલાવે છે તેમ કહીને કાર ચેક કરી અને જિગર અને અન્ય એક પોલીસ કર્મચારી કારમાં બેસી ગયા હતા. જિગરે નિશિતને બે ત્રણ લાફા મારીને મોબાઇલ ફોન લઇ લીધો હતો હતો. મોબાઇલમાં એપ છે તે ક્રિકેટ સટ્ટાની છે તું ક્રિકેટ સટ્ટો રમે છે તારા પર કેસ કરીએ છીએ. તેમ કહીને નિશિતને એ.જી.પોલીસ ચોકીમાં લઇ જવામાં આવ્યો હતો. થોડાક સમય સુધી નિશિતને બેસાડી રાખ્યા બાદ જિગરે પાંચ લાખ રૂપિયા આપ તો છોડી દઇશું તેમ કહ્યું હતું.

થોડાક સમય પછી નિશિતના મિત્રના મિત્ર કૌશલ ભટ્ટ જે નવરંગપુરા પોલીસ સ્ટેશનમાં ફરજ બજાવે છે તે એ.જી.પોલીસ ચોકીમાં પહોંચી ગયા હતા. કૌશલ નામનો પોલીસ કર્મચારી પણ પોલીસ ચોકીમાં આવી ગયો હતો. નિશિતે સગાઇ હોવાથી બે લાખ રૂપિયા આપીને જિગર અને કૌશલથી છુટકારો મેળવ્યો હતો. નિશિતે બંને પોલીસ કોન્સ્ટેબલ જિગર અને કૌશલ વિરુદ્ધમાં ફરિયાદ આપી હતી. જેની તપાસ એસીપીએ શરૂ કરી હતી.