- અમદાવાદ એરપોર્ટ 31મે સુધી રહેશે બંધ
- સવારે 9થી સાંજે 6 વાગ્યા સુધી રહેશે બંધ
- યાત્રીકોને અગવડતા ન પડે તેનું રખાશે ધ્યાન
જો તમે અમદાવાદથી બાય ફ્લાઇટ ક્યાંય જવાનુ વિચારી રહ્યા છો તમને મુશ્કેલીનો સામનો કરવો પડી શકે છે. કારણ કે આજથી સરદાર વલ્લભભાઇ પટેલ ઇન્ટરનેશનલ એરપોર્ટ 9 કલાક માટે બંધ કરવામાં આવ્યુ છે. એરપોર્ટના રનવે પર રિકાર્પેટીંગની કામગીરીને કારણે એરપોર્ટ 9 કલાક બંધ રહેશે. આ કામકાજને કારણે 30 ફ્લાઇટ રદ કરવામાં આવી છે તેમજ અન્ય કેટલીક ફ્લાઇટ રદ કરવામાં આવી છે. મહત્વનુ છે કે સરદાર વલ્લભભાઇ પટેલ ઇન્ટરનેશનલ એરપોર્ટ પર અંદાજિત 150 ફ્લાઇટસની અવરજવર થાય છે.
સવારે 9થી સાંજે 6 સુધી બંધ
રનવે પર સમારકામની કામગીરી શરૂ કરી હોવાથી આજથી 31 મેસુધી સરદાર વલ્લભભાઇ પટેલ ઇન્ટરનેશનલ એરપોર્ટ 9 કલાક માટે બંધ રાખવામાં આવશે. જો કે એરપોર્ટ ઓથોરિટી દ્વારા યાત્રીકોને નુકસાન ન પહોંચે તેનું ખાસ ધ્યાન રાખવામાં આવશે. મહત્વનુ છે કે સાડા ત્રણ કિ.મી લાંબા રનવે પર સમારકામની કામગીરી નવેમ્બર 2021માં જ શરૂ થવાની હતી પરંતુ તહેવારોને કારણે આ કામ મુલતવી રાખવામાં આવ્યું હતું.શેડયુલ ખોરવાય નહીં અને હાલાકીનો સામનો કરવો ન પડે માટે અનેક રજૂઆતો બાદ આ નિર્ણયમાં ફેરફાર કરી આગામી જાન્યુઆરી મહિનાના પ્રારંભે કરવાનો નિર્ણય લેવાયો હતો.
યાત્રીકોની સુવિધાનું રખાશે ધ્યાન
એરપોર્ટ ઓથોરિટીના અધિકારીઓએ આ વાતનું પણ ખાસ ધ્યાન રાખ્યુ છે કે આ સમયગાળા દરમિયાન કોઇ પૂર્વ નિર્ધારિત કાર્યક્રમમાં ઓછામાં ઓછો ફેરફાર કરવામાં આવશે જેથી યાત્રીઓને અસુવિધાનો સામનો ન કરવો પડે. તો રનવેની કામગીરી બાબતે એક અધિકારીએ જણાવ્યુ હતુ કે રનવે સપાટી પર ઓવરલેઇંગ તથા સ્ટ્રીપ અને સ્લોપ અસેસમેન્ટ, રનવે એન્ડ સેફ્ટી એરિયા, તથા ગ્રેડિંગની સાથે સાથે ડ્રેનેજનું પણ કામ કાજ કરવામાં આવશે. આ ઉપરાંત એરપોર્ટ તરફથી જાણકારી આપવામાં આવી છે કે વિમાનની સુરક્ષા સુનિશ્ચિત કરવા અને રનવેની લાઇફ સાયકલ વધારવા માટે આંતરરાષ્ટ્રીય સુરક્ષા માનાંકોને ધ્યાને રાખવામાં આવશે.
