અમદાવાદની 28 હોસ્પિટલો-69 દવાની દુકાનો પર થઇ શકે છે તપાસ
માર્ચમાં ફાઇલ કરેલા રિટર્નમાં વિગતો છુપાવી હોવાનું તપાસમાં ઝડપાયું
કોરોનાકાળમાં રોકડમાં વ્યવહાર કરનારી હોસ્પિટલો હવે ITના રડારમાં આવી છે. જે ધ્યાને રાખતા અમદાવાદની 28 હોસ્પિટલો અને 69 દવાની દુકાનો પર તપાસ કરવામાં આવી શકે છે. માર્ચમાં ફાઇલ કરેલા રિટર્નમાં વિગતો છુપાવી હોવાનું ITની તપાસમાં ઝડપાયું છે. કર ભરવામાં કરચોરી કરતા હોવાની વિગતો પકડાઇ છે. હોસ્પિટલો અને દવાની દુકાનો પર ટૂંક સમયમાં તપાસ થઇ શકે છે. ITએ સારવાર લેનારા દર્દીઓની પૂછપરછ કરી હતી. દર્દીઓ પાસેથી ડૉક્ટરનો ચાર્જ, રૂમભાડુ, દવાના પૈસા, ઓક્સિજન ચાર્જ અને PPE ચાર્જ અલગથી લીધો હતો. ડૉક્ટરો અને સંચાલકો સામે વ્યાજ, પેનલ્ટી અને દંડ સાથે કાયદેસરની કાર્યવાહી કરવામાં આવી શકે છે.
કેટલીક દવાની દુકાનોએ તો રિટર્નમાં નફાની જગ્યાએ નુકસાન થયું હોવાનું બતાવ્યું
જણાવી દઇએ કે, કોરોનાકાળમાં કેટલીક હોસ્પિટલના સંચાલકોએ મોટી કમાણી કરવા માટે રોકડમાં વ્યવહારો કર્યા હતા. મોટા ભાગની હોસ્પિટલો દ્વારા કમાણીને સંતાડવા માટે ઇન્કમટેકસ રિટર્નમાં વિગતો દર્શાવાઇ નથી. તદુપરાંત કેટલીક દવાની દુકાનોએ તો રિટર્નમાં નફાની જગ્યાએ નુકસાન થયું હોવાનું બતાવ્યું હતું. આ રિટર્નના આધારે અધિકારીઓ હોસ્પિટલના કેટલાંક ગ્રુપ ઉપર નજર રાખી રહ્યાં હોવાનું સૂત્રો દ્વારા જાણવા મળી રહ્યું છે.
IT વિભાગે જે દર્દીઓએ રોકડમાં ચાર્જ ચૂકવ્યો હોય તેવાં દર્દીઓના સ્ટેટમેન્ટ પણ લીધા
ઈન્કમટેક્સ ડિપાર્ટમેન્ટ (IT વિભાગ) એ મોટી-મોટી હોસ્પિટલમાં જે દર્દીઓએ સારવાર લીધી હોય અને રોકડમાં ચાર્જ ચૂકવ્યો હોય તેવાં દર્દીઓના સ્ટેટમેન્ટ પણ લીધા છે. જેમાં દર્દીઓ પાસેથી ડૉક્ટરનો ચાર્જ, રૂમ ભાડું, દવાના પૈસા, ઓક્સિજન ચાર્જ, PPE કીટ વગેરે ચાર્જ અલગથી લીધો હતો. આવાં ડોક્ટરો અને સંચાલકો સામે વ્યાજ, પેનલ્ટી અને દંડની જોગવાઈ સહિત કાયદેસરની કાર્યવાહી હાથ ધરાય તેવી શક્યતા સેવાઇ રહી છે.
