શહેરના થલેતજ વિસ્તારમાં આવેલા સૂર્યરથ એપાર્ટમેન્ટમાં પેઇંગ ગેસ્ટ તરીકે રહેતા યુવકોના ૬ મોબાઇલ ફોન ચોરી થયા છે. વસ્ત્રાપુર પોલીસ સ્ટેશનની હદમાં આવતા થલેતજ વિસ્તારમાં પીજી તરીકે રહેતા યુવકોના મોબાઇલ ફોન ચોરી થઇ હોવાની આ ત્રીજી ઘટના એક અઠવાડિયામાં બનતા ચકચાર મચી ગઇ છે. એક જ મોડસ ઓપરેન્ડીથી તમામ ઘટનાઓને અંજામ આપનાર કોઇ એકજ ગેંગ હોય તેવુ પોલીસ માની રહી છે.
PG તરીકે રહેતા યુવકોને ટાર્ગેટ કરતી એક ગેંગ સક્રિય હોવાની આશંકા
થલતેજમાં એક જ અઠવાડિયામાં મોબાઇલ ચોરાયાની ત્રીજી ઘટના
PG તરીકે રહેયા યુવકોના 6 મોબાઇલ ચોરી થયા
વસ્ત્રાપુર પોલીસ સ્ટેશનમાં કરાઇ ચોરીની ફરિયાદ
થલતેજ વિસ્તારમાં આવેલ મહાલક્ષ્મી મંદિરની પાસે સૂર્યરથ એપાર્ટમેન્ટમાં રહેતા અને મૂળ અમરેલીના મિતેશ સોલંકીએ વસ્ત્રાપુર પોલીસ સ્ટેશનમાં ચોરીની ફરિયાદ કરી છે. મિતેશ તેના મિત્રો સાથે પેઇંગગેસ્ટ તરીકે રહે છે અને પીએચડીનો અભ્યાસ કરે છે. ગઇ કાલે સવારે રસોઇઓ મનીશ મહારાજ આવ્યો હતો અને જમવાનું બનાવીને જતો રહ્યો હતો.
તસ્કરોએ એક સાથે છ મોબાઇલ ફોન ચોર્યાં
મનીષ ઘરનો દરવાજો ખુલ્લો મુકીને જતો રહ્યો હતો. મિતેશે ઊઠીને જોયું તો તેનો મોબાઇલ ફોન ગાયબ હતો અને તેના મિત્રોના ત્રણ મોબાઇલ ફોન ગાયબ હતા. આ સિવાય તેણે તપાસ કરી તો જાણવા મળ્યું કે તેની બાજુના ફ્લેટમાં જ્યાં પેઇંગ ગેસ્ટ તરીકે અન્ય યુવકો રહે છે તેના પણ મોબાઇલ ફોન ગાયબ હતા. રસોઇઓ બે ફ્લેટના દરવાજા ખુલ્લા મૂકીને જતા રહેતાં તસ્કરોએ એક સાથે છ યુવકોના મોબાઇલ ફોન ચોરી લીધા હતા. તસ્કરોએ મિતેશ, મુકુંદ મેપાણી, સંકેત વધાસિયા, મયૂર ધાનાણી, પ્રતીક કાકડિયા, વસીમ હુસેન નામના યુવકોના મોબાઇલ ફોન ચોરી લીધા હતા. વસ્ત્રાપુર પોલીસે આ મામલે મિતેશની ફરિયાદના આધારે ગુનો દાખલ કરીને તપાસ શરૂ કરી છે.
ઉલ્લેખનીય છે કે છેલ્લા દસ દિવસમાં જ દિવસમાં ૨૦થી વધુ મોબાઈલની પીજીમાંથી ચોરી થયાનો બનાવ બનતાં ચકચાર મચી ગઈ છે. પેઈંગ ગેસ્ટ તરીકે રહેતાં યુવક-યુવતીના રૂમને ટાર્ગેટ બનાવી ચોરી કરતી ગેંગ એક જ હોય તેવું પોલીસ માની રહી છે. ચોંકાવનારી વાત એ છે કે વસ્ત્રાપુરમાં પોલીસ સ્ટેશમાં ચોરીની ચાર ફરીયાદ થઇ છે જેમાં ત્રણ ફરિયાદમાં ઘટના સ્થળે થલતેજ વિસ્તારમાં આવેલી સોસાયટી અને ફ્લેટના છે.