કાર્યવાહી / વાપીની સેન્ટ્રલ GSTની ઓફિસમાં ACBનો સપાટો, લાંચિયા અધિકારીને દબોચી લીધો, એક ફરાર 

• વાપીની સેન્ટ્રલ GSTની ઓફિસમાં ACBનો સપાટો
• સેન્ટ્રલ GST વિભાગના 2 અધિકારી લાંચ લેતા ઝડપાયા 
• સુપરિટેન્ડન્ટ રૂપિયા 20 હજાર લાંચ લેતા ઝડપાયો

વાપીની સેન્ટ્રલ GSTની ઓફિસમાં વ્યાપેલા ભ્રષ્ટાચારનો ફણગો ફૂટ્યો છે. આજે ACBનો સપાટો બોલાવી સેન્ટ્રલ GST વિભાગના 2 અધિકારીઓને લાંચ લેતા ઝડપાતા GSTની ઓફિસની લોબીમાં સોંપો પડી ગયો હતો. જેમાં એક અધિકારો ACBની ઝપટે ચડ્યો છે જ્યારે એક આરોપી ACBને હાથતાળી આપી નાશી છૂટવામા સફળ રહેતા તપાસનો ધમધમાટ શરૂ કરવામાં આવ્યો છે.

લેબર કોન્ટ્રાક્ટરની બંધ પેઢીનો સર્વિસ ટેક્સ ભરવા માગી હતી લાંચ

વાપીની સેન્ટ્રલ GSTની ઓફિસમાંથી આજે ભ્રષ્ટાચાર ખુલીને બહાર આવ્યો છે.લાંચની બાતમીને પગલે ACBએ રેડ પાડી હતી.આ દરમિયાન GST વિભાગના 2 અધિકારીઓએ લાંચ સ્વીકારી હોવાનું સામે આવ્યું હતું. ACBના આ છટકામાં GSTની ઓફિસનો ઇન્સપેક્ટર ગુરપિંદરસિંહ એક સુપરિટેન્ડન્ટ રામકિશોર મીના લાંચ લેતા ઝડપાયા હતા.આ બન્ને આરોપીઓએ  રૂપિયા 20 હજારની લાંચ સ્વીકારી હતી. જે મામલે પ્રાથમિક તપાસ દરમિયાન લેબર કોન્ટ્રાક્ટરની બંધ પેઢીનો સર્વિસ ટેક્સ ભરવા માગી લાંચ માંગી હોવાનું સામે આવ્યું હતું.

આરોપી ઇન્સપેક્ટર ગુરપિંદરસિંહ ફરાર થતાં શોધખોળ શરૂ
ACBની આ કાર્યવાહી દરમિયાન સુપરિટેન્ડેન્ટ રામકિશોર મીના ઝડપાયો હતો જ્યારે આરોપી ઇન્સપેક્ટર ગુરપિંદરસિંહ ફરાર થઈ જતા તેને દબોચી લેવા તપાસના ચક્રો ગતિમાન કરાયા છે.