રાજકોટ / ગુજરાતમાં ફટાકડા કરતાં વધારે પેપર ફૂટે છે: સૌરાષ્ટ્ર યુનિ.નું પેપર લીક થવા મામલે AAPએ કર્યા પ્રહાર

• પેપર લીક મામલે AAPના ભાજપ પર આકરા પ્રહાર
• છેલ્લા 6 વર્ષમાં 12 કરતા વધારે મહત્વપૂર્ણ પેપરો થયા લીકઃ રાધવ ચઢ્ઢા
• તમારા બાળકોની કિસ્મત ફોડવાનું કામ ભાજપે કર્યુંઃ ચઢ્ઢા

ગુજરાતમાં જો પારદર્શિતા સાથે ભરતી થાય તો કદાચ ઈતિહાસ રચાઈ જાય. કારણ કે, રાજ્યમાં છાશવારે પેપર લીક થયાની ઘટના સામે આવતી રહે છે. ત્યારે આજે વધુ એક વખત પેપરલીક કાંડની ઘટના સામે આવી છે. રાજ્યની પ્રચલિત અને સતત વિવાદમાં રહેતી સૌરાષ્ટ્ર યુનિવર્સિટીના BBA અને BComની પરીક્ષાના પેપર લીક થયા હોવાનું સામે આવ્યું છે. જેના લીધે સમગ્ર તંત્ર હલબલી ઉઠ્યું છે. આ પેપર લીક થયા બાદ આમ આદમી પાર્ટીના ગુજરાત સહ પ્રભારી રાઘવ ચઢ્ઢાએ પત્રકાર પરિષદ યોજી ભાજપ પર આકરા પ્રહારો કર્યા.

સૌરાષ્ટ્ર યુનિવર્સિટીનું BCom અને BBAનું પેપર ફૂટ્યું
AAPના ગુજરાત સહ પ્રભારી ચઢ્ઢાએ કહ્યું કે, ભાજપે ગુજરાતના યુવાનો અને વિદ્યાર્થીઓને પોતાની ભ્રષ્ટ રાજનીતિની નીચે કચડી નાખ્યા. ગુજરાતમાં છેલ્લા 6 વર્ષમાં 12 કરતા વધારે મહત્વપૂર્ણ પેપર લીક થયા છે. બિન સચિવાલયની પરીક્ષા, કોન્સ્ટેબલની પરીક્ષા જ નહીં હવે BCom અને BBA જેવા કોર્ષના પેપર ફૂટવા લાગ્યા છે. ગુજરાતમાં સ્કૂલ અને કોલેજની સાધારણ પરીક્ષાના પેપર પણ ફૂટવા લાગ્યા છે. આજે રાજકોટ ખાતે આવેલી સૌરાષ્ટ્ર યુનિવર્સિટીનું BCom અને BBAનું પેપર ફૂટી ગયું છે. સૌરાષ્ટ્રના 25 હજાર વિદ્યાર્થીઓના ભવિષ્ય સાથે ભાજપે ચેડાં કર્યા છે. ગુજરાતના અખબારોએ આજે ફ્રન્ટ પેજ પર આ પેપરને છાપ્યું છે.

પેપર ફોડવાનો જવાબ ગુજરાતની જનતાએ આપવો પડશેઃ ચઢ્ઢા
તેમણે જણાવ્યું કે, હું આજે ગુજરાતના લોકોને કહેવા માંગુ છે કે પેપર નહીં તમારા બાળકોની કિસ્મત ફોડવાનું કામ ભારતીય જનતા પાર્ટીએ કર્યું છે. પેપર ફોડવાનો જવાબ ગુજરાતની જનતાએ ભાજપના નેતાઓની કિસ્મત ફોડીને આપવો પડશે. હવે આ નેતાઓની પાંચ વર્ષમાં એકવાર આવે છે, તે પરીક્ષા આવી રહી છે ગુજરાત વિધાનસભાની ચૂંટણી.

ભાજપની કિસ્મત ફોડવાનો લેવો પડશે સંકલ્પઃ રાઘવ ચઢ્ઢા
રાઘવ ચઢ્ઢાએ જણાવ્યું કે, આ ચૂંટણીમાં તમારે બધાએ ભાજપની કિસ્મત ફોડવાનો સંકલ્પ લેવો પડશે. હું તમને વિશ્વાસ અપાવું છું કે, જો ગુજરાતમાં આમ આદમી પાર્ટીની સરકાર બનશે તો 100 દિવસની અંદર આમ આદમી પાર્ટી પેપર લીક સામે કડક કાયદો લાવશે. જેના પરિણામે જે જે આમા સંડોવાયેલા છે એમની સામે ચુસ્ત પગલા ભરી કડક કાર્યવાહી હાથ ધરાશે. તેમણે વધુમાં કહ્યું કે, ભાજપના નેતાઓના બાળકો ફોરેનમાં ભણવા જાય છે. જ્યારે મધ્યમ વર્ગ અને ગરીબ વર્ગના બાળકો અહીં અભ્યાસ કરે છે. તેવામાં સતત મહેનત કરતા બાળકોના ભવિષ્ય સાથે ચેડા ન થવા જોઈએ. આ કોઈ નાનો ગુનો નથી. આનાથી રાજ્યભરના વિદ્યાર્થીઓનું ભાવિ સંકટમાં મુકાઈ જશે. 

AAP રાજ્યસભા સાંસદ અને AAP ગુજરાત સહ-પ્રભારીશ્રી રાઘવ ચઢ્ઢાની મહત્વપૂર્ણ પત્રકાર પરિષદ #LIVE https://t.co/oKRlfdEvmd

— AAP Gujarat | Mission2022 (@AAPGujarat) October 13, 2022

પેપર લીક થયા બાદ યુનિવર્સિટીએ લીધો મોટો નિર્ણય
અત્રે ઉલ્લેખનીય છે કે, સૌરાષ્ટ્ર યુનિવર્સિટીએ પેપર લીક થયા બાદ નિર્ણય લીધો છે કે હવેની તમામ પરીક્ષાઓમાં QR કોડ સાથેનું પેપર કઢાશે. પરીક્ષાઓમાં પ્રશ્નપત્રો હાર્ડકોપીમાં મોકલવામાં નહીં આવે. હવેથી તમામ કોલેજોને સોફટકોપીમાં પ્રશ્નપત્રો મોકલવામાં આવશે. વધુમાં તમને જણાવી દઇએ કે, BBAની પરીક્ષાનું પેપર યુનિવર્સિટી દ્વારા ગઈકાલે રાત્રે જ તાત્કાલિક બદલી દેવાયું હતું. જ્યારે B.COMના પેપરની નવી તારીખ હવે પછી જાહેર કરવામાં આવશે.