- મહેસાણામાં જાતિવાદી માનસિકતાનો ગંભીર મામલો
- ભટારિયામાં 120 દલિત પરિવારે કર્યો હોબાળો
- દલિત લોકોને જમણવારનું આમંત્રણ અલગ જગ્યાનું અપાયું હતું
મહેસાણામાં જાતિવાદી માનસિકતાનો ગંભીર મામલો સામે આવ્યો છે. જે મામલે ભટારિયામાં 120 દલિત પરિવારે હોબાળો કર્યો છે. માતાજીના પ્રાણ પ્રતિષ્ઠા મહોત્સવમાં દલિત પરિવારનું રસોડું અને જમણવાર અલગ રાખવાનો નિર્ણય કરાયો હતો જે મામલે દલિત પરિવારે બેનર લગાવી જાતિવાદી માનસિકતા સામે વિરોધ નોંધાવ્યો છે.
જમણવારની અલગ વ્યવસ્થાને લઇ રોષ
દલિત પરિવારોના આ વિરોધને કારણે સમગ્ર મામલો હાલમાં ચર્ચાસ્પદ બન્યો છે. તો બીજી તરફ આ ઘટનાને પગલે સમાજ કલ્યાણ વિભાગના અધિકારીઓએ ગામની મુલાકાત લઈ નિવેદન નોંધ્યા હતા. જોટાણા તાલુકાના ભટારીયા ગામના નવનિર્મિત મંદિરમાં છેલ્લા બે દિવસથી પ્રાણ પ્રતિષ્ઠા મહોત્સવ યોજાઇ રહ્યો હતો. પરંતુ આ મહોત્સવમાં ગામના દલિત પરિવારોએ ગ્રામ પંચાયત આગળ દર્શાવેલ બેનરને કારણે ભારે ચર્ચાસ્પદ બન્યો છે. પ્રાણ પ્રતિષ્ઠા મહોત્સવમાં સમગ્ર ગામના લોકોનો જમણવારનું આમંત્રણ આપવામાં આવ્યું હતું. એક માત્ર દલિત પરિવારના લોકોને અલગ જગ્યાએ જમવાનું આમંત્રણ આપવામાં આવ્યું હતું.
અલગ જમણવારને લઇ સરપંચ પણ સમાજ સાથે
સમગ્ર ગામના દલિત પરિવાર એકઠા થઇ જાતિવાદનો વિરોધ કરતું બેનર પ્રદર્શિત કર્યું છે. મહત્વપૂર્ણ છે કે, આ ગામમાં સરપંચ પદની જગ્યા અનુસૂચિત જાતિની મહિલા માટે અનામત છે. આ કારણે ગામમાં સરપંચ પદે દલિત સમાજના મહિલા ચૂંટાયેલા છે. આમ છતાં ગામમાં દલિત સમાજ સાથે આ પ્રકારે ભેદભાવ થતા મહિલા સરપંચ પણ ખુલીને વિરોધમાં આવી ગયા હતાં તો દલિત સમાજના અન્ય લોકોનો આક્ષેપ છે કે, ગામના મંદિરમાં દલિત સમાજના લોકોને પ્રવેશ આપવામાં આવતો નથી તેમજ વાળંદ પણ દલિત સમાજના લોકોના હેર કટ કરતો નથી તો સામે પક્ષે પાટીદાર અગ્રણીએ આ બાબતે ગોળ ગોળ જવાબ આપ્યો હતો.
