વલસાડના ધરમપુરના અંતરિયાળ વિસ્તારમાં કમોસમી વરસાદ, દિલ્હીમાં પણ આજથી તાપમાનનો પારો વધુ બે ડિગ્રી ગગડશે અને હિમાળા પવનો ફુંકાશે
વલસાડ જિલ્લાના વાતાવરણમાં પલટો
કમોસમી વરસાદથી ખેડૂતોની વધી ચિંતા
દેશનાં 11 રાજ્યમાં ભારે વરસાદનું એલર્ટ
ગુજરાતના વલસાડમાં વાતાવરણમાં પલટો આવ્યો છે. શિયાળાના સમયે વરસાદ થતાં ખેડૂતો ચિંતિત બન્યા છે. ધરમપુરના અંતરિયાળ વિસ્તારમાં કમોસમી વરસાદ થયો છે. વલસાડ જિલ્લાની વિવિધ વિસ્તારોમાં એકાએક વાતાવરણમાં પલટો આવ્યો હતો. સવારથી જિલ્લામાં વાદળછાયું વાતાવરણ સર્જાયું હતું અને બાદમાં કમોસમી વરસાદ પડ્યો હતો.
વલસાડ જિલ્લાના વાતાવરણમાં પલટો
વલસાડના ધરમપુના અંતરિયાળ વિસ્તારમાં વાતાવરણમાં પલટો આવ્યો છે અને જ્યા એકાએક કમોસમી વરસાદ સર્જાયો હતો. મોસમી વરસાદથી ખેડૂતોની જીવ તાડવે ચોંટ્યા હતાં, જો ફરી વાર વાર વધુ કમોસમી વરસાદ થાય તો ખેડૂતોના પાકમાં મોટુ નુકસાન થવાની ભિંતી સેવાઈ રહી છે.
મુંબઈ સહિત મહારાષ્ટ્રમાં પણ વરસાદની આગાહી
હવામાન વિભાગના જણાવ્યા અનુસાર, ૧3 ડિસેમ્બર સુધીમાં ઉત્તર-મધ્ય મહારાષ્ટ્રના કેટલાક ભાગો સહિત મુંબઈમાં પણ હળવા વરસાદની શક્યતા છે. ખાનગી હવામાન એજન્સી સ્કાયમેટના જણાવ્યા અનુસાર, મુંબઈમાં વાતાવરણ વાદળછાયું રહેશે અને હળવો વરસાદ પણ થઈ શકે છે. આ ઉપરાંત મુંબઈમાં તાપમાનનો પારો ગગડશે અને હાલ મહત્તમ તાપમાન 32 ડિગ્રી સેલ્સિયસ છે, તે ઘટીને 26 ડિગ્રી થઈ જશે.
દેશનાં 11 રાજ્યમાં ભારે વરસાદનું એલર્ટ
પહાડો પર થઈ રહેલી ભારે હિમવર્ષા અને ખાસ કરીને દક્ષિણ ભારતના રાજ્યોમાં ચક્રવાત મેંડુસની અસરના કારણે હવામાન વિભાગે દક્ષિણ ભારતનાં રાજ્ય સહિત દેશના કુલ 11 રાજ્યમાં ભારે વરસાદ પડશે એવી ચેતવણી આપીને એલર્ટ જારી કર્યું છે. હવામાન વિભાગે આગામી 24 કલાક દરમિયાન દક્ષિણ કર્ણાટક અને ઉત્તર આંતરિક તામિલનાડુમાં હળવાથી મધ્યમ કક્ષાનો વરસાદ પડશે. કર્ણાટક, કેરળ અને લક્ષદ્વીપના બાકીના ભાગમાં પણ હળવાથી મધ્યમ વરસાદની આગાહી કરવામાં આવી છે. આ ઉપરાંત તેલંગાણામાં એક કે બે સ્થળોએ મધ્યમ વરસાદ થઈ શકે છે.દક્ષિણ ઓડિશા, વિદર્ભ, મરાઠાવાડા અને દક્ષિણ-મધ્ય મહારાષ્ટ્રમાં હળવા વરસાદની આગાહી કરવામાં આવી છે. જ્યારે લદ્દાખ, જમ્મુ-કાશ્મીર અને હિમાચલ પ્રદેશમાં હળવા વરસાદ સાથે હિમવર્ષાની પણ આગાહી કરાઈ છે.
પહાડી વિસ્તારોમાં થઈ રહેલી હિમવર્ષાની અસર
ચક્રવાત મેંડુસની અસર ભલે ઓછી થઈ ગઈ હોય, પરંતુ હવામાનની ગતિવિધિ પર હજુ પણ તેની અસર વર્તાઈ રહી છે. ખાસ કરીને તામિલનાડુના કાંચીપુરમ્, તિરુવલ્લુર અને વિલ્લુપુરમ્ જિલ્લામાં આગામી બે દિવસ સુધી મધ્યમથી ભારે વરસાદની આગાહી કરવામાં આવી છે અને તેથી આ જિલ્લામાં આજે પણ શાળામાં રજા જાહેર કરવામાં આવી છે. ખાનગી હવામાન એજન્સી સ્કાયમેટના જણાવ્યા અનુસાર, આંધ્રપ્રદેશ, તામિલનાડુ અને કેરળના દક્ષિણ તટિય વિસ્તારોમાં મધ્યમ વરસાદ થઈ શકે છે. દરમિયાન પહાડી વિસ્તારોમાં થઈ રહેલી હિમવર્ષાની અસર હવે ઉત્તર ભારતનાં મેદાની વિસ્તારોમાં વર્તાવા લાગી છે.
15 ડિસેમ્બર આ રાજ્યોમાં ગાત્રો થીજાવતી ઠંડી પડશે
પંજાબ, હરિયાણા, દિલ્હી, ઉત્તરપ્રદેશ, બિહાર અને ઝારખંડમાં ઠંડી વધવા લાગી છે. રાજસ્થાન, મધ્યપ્રદેશ અને છત્તીસગઢમાં પણ તાપમાનનો પારો સતત ગગડી રહ્યો છે. હવામાન વિભાગની આગાહી અનુસાર, 15 ડિસેમ્બર સુધીમાં આ તમામ રાજ્યોમાં ગાત્રો થીજાવતી ઠંડી શરૂ થઈ જશે. આંધ્રપ્રદેશના કેટલાક દક્ષિણી જિલ્લાઓમાં ચક્રવાત મેંડુસના કારણે વરસાદ અને વાવાઝોડા સંબંધિત ઘટનાઓમાં એક વ્યક્તિનું મોત થયું છે અને 1000થી વધુ લોકોને રાહત શિબિરોમાં ખસેડવામાં આવ્યા છે. રાજ્ય સરકારના રિપોર્ટ અનુસાર, કાંદલેરુ, મનેરુ અને સ્વર્ણમુખી જેવી નાની નદીઓમાં જળસપાટી અચાનક વધવાથી એસપીએસઆર નેલ્લોર અને તિરુપતિ જિલ્લાને સતર્ક રહેવા સલાહ આપવામાં આવી છે.