બે દિવસ પહેલાં જ ઓસ્ટ્રેલિયાના વિશ્વ વિજેતા ટી-૨૦ ટીમના કેપ્ટન એરોન ફિંચે આંતરરાષ્ટ્રીય ક્રિકેટના બધા ફોર્મેટમાંથી નિવૃત્તિ લેવાની ચોંકાવનારી જાહેરાત કરી છે.
ભારત અને ઓસ્ટ્રેલિયાનો પહેલો મેચ ૯ ફેબ્રુઆરીએ નાગપુરમાં છે
કેપ્ટન એરોન ફિંચે આંતરરાષ્ટ્રીય ક્રિકેટના બધા ફોર્મેટમાંથી નિવૃત્તિ લીધી
મને એવું લાગ્યું કે હું ૨૦૨૪નો ટી-૨૦ વિશ્વકપ નહીં રમી શકું. - એરોન ફિંચ
મેલબર્ન, મંગળવારઃ બોર્ડર-ગાવસ્કર ટ્રોફી માટે ભારત અને ઓસ્ટ્રેલિયન ટીમ જોરદાર તૈયારીઓ કરી રહી છે અને શ્રેણીનો પ્રથમ મુકાબલો ૯ ફેબ્રુઆરીએ નાગપુરમાં શરૂ થઈ રહ્યો છે. આ મુકાબલાના બે દિવસ પહેલાં જ ઓસ્ટ્રેલિયાના વિશ્વ વિજેતા ટી-૨૦ ટીમના કેપ્ટન એરોન ફિંચે આંતરરાષ્ટ્રીય ક્રિકેટના બધા ફોર્મેટમાંથી નિવૃત્તિ લેવાની ચોંકાવનારી જાહેરાત કરી છે. તેણે સપ્ટેમ્બર-૨૦૨૨માં વન ડે ક્રિકેટને અલવિદા કહી દીધું હતું.
૩૬ વર્ષીય ફિંચ આઇસીસી વિશ્વકપ-૨૦૧૫ ટ્રોફી જીતનારી ઓસ્ટ્રેલિયન ટીમનો પણ સભ્ય હતો, જ્યારે ૨૦૨૧માં વિશ્વકપ ટીમનો કેપ્ટન હતો. નિવૃત્તિની જાહેરાત કરતાં ફિંચે કહ્યું, ''મને એવું લાગ્યું કે હું ૨૦૨૪નો ટી-૨૦ વિશ્વકપ નહીં રમી શકું. આ જ યોગ્ય સમય છે કે હું આ પદ છોડી દઉં અને ટીમને યોજના બનાવવામાં મદદ કરું.''
ફિંચે પોતાની ફેમિલી અને ચાહકો અંગે કહ્યું, ''હું મારા પરિવાર-ખાસ કરીને મારી પત્ની એમી, મારી ટીમના સાથીઓ, ક્રિકેટ વિક્ટોરિયા, ક્રિકેટ ઓસ્ટ્રેલિયા અને ઓસ્ટ્રેલિયન ક્રિકેટર્સ એસોસિયેશનનો આભાર માનું છું, જેમણે મને આ રમત રમવાની મંજૂરી આપી. હું એ બધા ચાહકોનો પણ ખૂબ ખૂબ આભાર માનું છું, જેમણે મારી સમગ્ર આંતરરાષ્ટ્રીય કરિયરમાં મારું સમર્થન કર્યું.''
પોતાની શાનદાર સફર અંગે એરોન ફિંચે જણાવ્યું, ''૨૦૨૧માં ટી-૨૦ વિશ્વકપની પહેલી જીત અને ૨૦૧૫માં ઘરેલુ ધરતી પર વન ડે વિશ્વકપ મારા માટે શાનદાર પળ રહેશે. ૧૨ વર્ષ સુધી ઓસ્ટ્રેલિયાનું પ્રતિનિધિત્વ કરવું, મહાન ખેલાડીઓ સાથે રમવું અવિશ્વસનીય સન્માન રહ્યું છે.'' ફિંચ ટી-૨૦ ઇન્ટરનેશનલમાં ઓસ્ટ્રેલિયા તરફથી સૌથી વધુ રન બનાવનારો બેટ્સમેન છે. તેણે ૧૦૩ ટી-૨૦ મેચમાં ૩૪.૨૮ની સરેરાશ અને ૧૪૨.૫૩ના સ્ટ્રાઇક રેટથી ૩૧૨૦ રન બનાવ્યા છે. ૨૦૧૮માં ઝિમ્બાબ્વે સામે તેણે ૭૬ બોલમાં બનાવેલો ૧૭૨ રનનો સર્વોચ્ચ સ્કોર આજે પણ રેકોર્ડ છે. ફિંચે ૭૬ ટી-૨૦ ઇન્ટરનેશનલમાં ઓસ્ટ્રેલિયન ટીમનું નેતૃત્વ સંભાળ્યું હતું. આ ઉપરાંત એરોન ફિંચે પોતાની કરિયરમાં પાંચ ટેસ્ટ, ૧૪૬ વન ડે પણ રમી છે.
ઓસ્ટ્રેલિયાની ટીમ દક્ષિણ આફ્રિકાના પ્રવાસ દરમિયાન ઓગસ્ટમાં ટી-૨૦ શ્રેણી રમવાની છે એટલે કે તેની પાસે નવા કેપ્ટનની નિયુક્તિ માટે ઘણો સમય છે. એવી શક્યતા છે કે પેટ કમિન્સને જ ટેસ્ટ અને વન ડેની બાદ ટી-૨૦ ફોર્મેટમાં પણ કેપ્ટન બનાવી દેવામાં આવે.