બાળકોમાં વિડીયો ગેમના વળગણ અંગે આજે ઘણી ચિંતા અને ચર્ચા થાય છે. ઘણી વખત એવો દાવો કરવામાં આવે છે કે વિડીયો ગેમ્સ રમવું બાળકો માટે સારું નથી, તો ઘણી વખત એવો દાવો કરવામાં આવે છે કે વીડિયો ગેમ્સ બાળકોના દિમાગને તેજ કરે છે. ત્યારે એક નવા સર્વે મુજબ વિડાયો ગેમ્સ રમવાથી બાળકોને સકારાત્મક અસર થતી હોવાનું કહેવામાં આવે છે. આ સર્વે જોકે અમેરિકામાં થયો છે. ભારતના કે અન્ય દેશોના માતા-પિતાનો અભિપ્રાય તેનાથી જુદો હોઇ શકે છે.
અમેરિકાની સી.એસ. મોટ્ટ ચિલ્ડ્રન્સ હોસ્પિટલે એક સર્વેક્ષણ કરાવ્યું હતું. તેમાં સામેલ 71 ટકા માતા-પિતા માને છે કે વિડીયો ગેમ્સ રમે તે તેમના બાળકો માટે સારી બાબત છે, વિડીયો ગેમ્સ બાળકોને સ્માર્ટ બનાવે છે. જોકે અન્ય માતા-પિતા માને છે કે વિડીયો ગેમ્સ પર પ્રતિબંધ મુકવો જોઇએ.
આ અહેવાલમાં એવું પણ બહાર આવ્યું છે કે છોકરીઓ કરતા છોકરાઓ નવી નવી ગેમ્સ રમવાનું વધુ પસંદ કરે છે. રિપોર્ટમાં એમ પણ કહેવામાં આવ્યું છે કે નાના છોકરાઓ દરરોજ ગેમિંગમાં ત્રણ કલાકથી વધુનો સમય ગાળે છે.
અમેરિકાની મિશિગન યુનિવર્સિટીના પ્રો. ગેરી ફ્રીડે જણાવ્યું હતું કે મોટાભાગના માતા-પિતા માને છે કે વિડીયો ગેમ્સ બાળકો માટે ટોનિક જેવું છે. જોકે બાળકો તેમાં અતિરેક કરે તો નકારાત્મક પ્રભાવ પડે છે. ફ્રીડે કહ્યું કે માતા-પિતાએ બાળકોની રમતની ટેવને નજીકથી મોનિટર કરવાની જરૂર છે. કયાંક એવું ન થાય કે બાળકો અનિદ્રાના રોગનો ભોગ બને.
સર્વેમાં સામેલ માતાપિતાએ એમ પણ કહ્યું હતું કે બાળકોને રોકવા માટે, તેઓ ગેમ્સને છુપાવવા સહિતની વિવિધ યુક્તિઓ અપનાવે છે. એકંદરે આ સંશોધનનો સાર એવો છે કે થોડો સમય ગેમ્સ રમે તો તે બાળકો માટે સારુ છે પણ અતિરેક નુકસાનકારક છે.