ગત વર્ષે નેપાળમાં યોજાયેલી સાઉથ એશિયન ગેમ્સમાં મેડલ જીતનારા પાકિસ્તાનના ત્રણ એથ્લીટ્સ પર ચાર વર્ષનો પ્રતિબંધ લગાવી દેવામાં આવ્યો છે, જેમાંના બે એથ્લીટે ગોલ્ડ અને એક એથ્લીટે બ્રોન્ઝ મેડલ જીત્યો હતો. આ ત્રણેય એથ્લીટ ડોપિંગમાં દોષી ઠરતાં તેમના મેડલ પણ છીનવી લેવામાં આવ્યા છે.
નેપાળ ઓલિમ્પિક કમિટી (NOC)ના જણાવ્યા અનુસાર પુરુષોની ૧૧૦ મીટર હર્ડલ રેસમાં ગોલ્ડ મેડલ જીતનારા મોહંમદ નઈમ, ૪૦૦ મીટર હર્ડલ રેસના ગોલ્ડ મેડલિસ્ટ મહબૂબ અલી અને ૧૦૦ મીટર સ્પ્રિન્ટમાં બ્રોન્ઝ મેડલ જીતનારા સામી ઉલ્લાહ પાસેથી મેડલ છીનવી લેવામાં આવ્યા છે. આ ખેલાડીઓ પર ચાર વર્ષનો પ્રતિબંધ તા. ૩ ડિસેમ્બર, ૨૦૧૯થી લાગુ થઈ ગયો છે, જે ૨ ડિસેમ્બર, ૨૦૨૩ સુધી અમલી રહેશે.
રિપોર્ટમાં પ્રતિબંધ પદાર્થનું સેવન કરાયાનો ખુલાસો
ડોપ ટેસ્ટ માટે ત્રણેય ખેલાડીના સેમ્પલ ટૂર્નામેન્ટ દરમિયાન જ લેવામાં આવ્યા હતા, જે રિપોર્ટ હવે પોઝિટિવ આવ્યો છે. એનઓસીએ જણાવ્યું, સેમ્પલને વાડાની કતાર લેબમાં મોકલવામાં આવ્યા હતા. તેમના રિપોર્ટમાં પ્રતિબંધ પદાર્થનું સેવન કરાયાનો ખુલાસો થયો હતો.
ત્રણેય એથ્લીટ્સના 'એ' સેમ્પલ પોઝિટિવ આવ્યા બાદ તેમને 'બી' સેમ્પલ માટે તક આપવામાં આવી હતી. ગોલ્ડ જીતનારા નઈમ અને મહબૂબ અલીએ પોતાના 'બી' સેમ્પલ પણ આપ્યા, પરંતુ એમાં પણ તેઓ નિષ્ફળ રહ્યા હતા. બ્રોન્ઝ જીતનારા સામી ઉલ્લાહે 'બી' સેમ્પલ આપ્યું નહોતું.
ભારતનો એક ગોલ્ડ વધી જતાં મેડલની સંખ્યા ૧૭૫થી વધી ૧૭૬
નેપાળ એથ્લેટિક્સ એસોસિયેશનના સચિવ આર. કે. બિસ્ટાએ જણાવ્યું, ''નિયમ અનુસાર ત્રણેય ખેલાડી પાસેથી મેડલ છીનવી લઈને તેમની પાછળના સ્થાને રહેનારા ખેલાડીઓ અપાશે. પાકિસ્તાનના ત્રણેય એથ્લીટ્સના ડોપિંગમાં ફસાયા બાદ નેપાળ અને શ્રીલંકાની સાથે-સાથે ભારતીય એથ્લીટને પણ ફાયદો થયો છે. ભારતનો એક ગોલ્ડ વધી જતાં મેડલની સંખ્યા ૧૭૫થી વધી ૧૭૬ થઈ ગઈ છે.
૪૦૦ મીટર હર્ડલ રેસમાં પણ હવે ગોલ્ડ અને સિલ્વર ભારતીય એથ્લીટ્સ પાસે
૪૦૦ મીટર હર્ડલ રેસમાં પણ હવે ગોલ્ડ અને સિલ્વર ભારતીય એથ્લીટ્સ પાસે આવી ગયા છે. જાબિર મદારી પાને ગોલ્ડ અને સંતોષકુમારને સિલ્વર મેડલ મળશે, જ્યારે શ્રીલંકાના એથ્લીટ અસંકા ઇન્દ્રિજતને બ્રોન્ઝ મેડલ મળશે. ૧૧૦ મીટર હર્ડલ રેસમાં ચોથા સ્થાને રહેલા મેમન પોલ્સને બ્રોઝ મેડલ મળશે, જ્યારે સિલ્વર મેડલ જીતનારા નેપાળના સુરેન્દ્ર જાયકને ગોલ્ડ અને બ્રોન્ઝ જીતનારા શ્રીલંકાના રોશન ધામિકાને સિલ્વર મેડલ મળશે.