મહારાષ્ટ્રમાં કોરોના બાદ હવે ઝીકયા વાયરસનો ખતરો વધી ગયો છે. પૂણે જિલ્લામાં ઝીકયા વાયરસનો કેસ સામે આવતા જ તંત્રએ અલર્ટ જાહેર કરી દીધું છે. સ્વાસ્થ્ય વિભાગ દ્વારા 79 ગામોમાં ઇમરજન્સી સેવા માટે તૈયારી કરી દેવામાં આવી છે.
બેલસર ગામમાં મળ્યો કેસ
પૂણેના બેલસર ગામમાં ઝીકા વાયરસનો કેસ મળ્યો હતો. આ પ્રથમ કેસ સામે આવતા જ મહારાષ્ટ્ર સ્વાસ્થ્ય વિભાગે સતર્ક થઈને કામગીરી શરૂ કરી દીધી હતી. પૂણે જિલ્લાના ડીએમ અને અધિકારીઓ વચ્ચે મિટિંગ થઈ હતી જેમાં તમામ ગ્રામ પંચાયતો અને સ્થાનિક તંત્રને અલર્ટ જાહેર કરી દેવામાં આવ્યું હતું. આ બધા જ ગામ વાયરસના સંક્રમણ માટે સંવેદનશીલ છે.
ઝીકાના કેસ ડેન્ગ્યૂ અને ચિકનગુનિયાના એડીઝ મચ્છરથી ફેલાય છે. આ ગામોમાં દર વર્ષે ડેન્ગ્યૂ અને ચિકનગુનિયાના સૌથી વધારે કેસ જોવા મળતા હોય છે.
અગાઉ કેરળમાં પણ ઝીકા વાયરસનો ત્રાસ વધતાં સ્થાનિક તંત્ર દોડતું થઈ ગયું હતું.
આ રીતે કરી શકાય કંટ્રોલ
સ્વાસ્થ્ય અધિકારીના આધારે સંક્રમિત વ્યક્તિ જો બેડ રેસ્ટ કરે તો જ સંક્રમણ પર કાબૂ મેળવી શકાય છે. ઝીકા વાયરસ માટે કોઈ એન્ટી ફંગલ દવા કે વેક્સિન નથી.વાયરસથી બચાવની રીત એ છે કે ખાસ કરીને દિવસના સમયે મચ્છર ન કરડે તેનું ધ્યાન રાખવું. વાયરસ ગર્ભવતી મહિલાઓ માટે ખતરનાક માનવામાં આવી રહ્યો છે. તેનાથી બાળકમાં પણ વાયરસ આવવાની શક્યતા રહે છે. આ સિવાય તેમાં વિકૃતિ પણ આવી શકે છે.
શું છે ઝીકા વાયરસના લક્ષણો
આ વાયરસના લક્ષણ ડેન્ગ્યૂ અને ચિકનગુનિયા જેવા છે. મચ્છર કરડવાથી 2-7 દિવસ સુધી વ્યક્તિ સંક્રમિત રહી શકે છે. ઝીકા વાયરસના લક્ષણોમાં તાવ, માથાનો દુઃખાવો, હાડકા દુઃખવા, સાંધામાં દુઃખાવો, ઉલ્ટી અને અસ્વસ્થતા અનુભવાય છે.
