વિશ્વભરમાં કોરોના વાયરસના હાહાકાર વચ્ચે WHO એ રાહતના સમાચાર આપ્યા છે. હાલમાં વિશ્વમાં કુલ આઠ રસી ક્લિનિકલ ટ્રાયલમાં પહોંચી ગઈ છે. જ્યારે કુલ 110 વેક્સિન વિવિધ સ્ટેજમાંથી પસાર થઇ રહી છે.
વિશ્વના અનેક દેશોએ વેક્સિન શોધવા માટે એડીચોટીનું જોર લગાવ્યું
અમેરિકા આ વર્ષે કોરોનાની રસી શોધી લેવાનો દાવો કર્યો
ભારતમાં વિવિધ રસી પર થઇ રહ્યા છે પ્રોજેક્ટ
વિશ્વભરમાં કુલ 110 વેક્સિન વિવિધ સ્ટેજમાંથી પસાર થઇ રહી છે :
વિશ્વભરમાં કોરોના વાયરસનો પ્રકોપ યથાવત છે. વિવિધ દેશોમાં લાંબા લોકડાઉન બાદ છૂટછાટ આપવામાં આવી રહી છે. લાખો લોકો કોરોના વાયરસથી સંક્રમિત છે ત્યારે કોરોના વાયરસની રસી શોધવા માટે વધુમાં પ્રયત્નો કરવામાં આવી રહ્યા છે. વર્લ્ડ હેલ્થ ઓર્ગેનાઈઝેશને હાલમાં આપેલ માહિતી મુજબ કોરોના વાયરસથી છૂટકારો મેળવવા માટે કુલ આઠ વેક્સિન ક્લિનિકલ ટ્રાયલ કરવામાં આવી રહ્યું છે. જયારે વિશ્વભરમાં કુલ 110 વેક્સિન વિવિધ સ્ટેજમાંથી પસાર થઇ રહી છે.
ચીન અને અમેરિકાએ કર્યા દાવા
ચીનમાંથી વિશ્વમાં ફેલાયેલા આ વાયરસનો અંત લાવવા માટે વિશ્વનાં ઘણા દેશો એક થઇને લડી રહ્યાં છે. સંક્રમણ ખતમ કરવા માટે વિવિધ દેશો વેક્સિન તૈયાર કરવા પર ધ્યાન કેન્દ્રિત કરી રહ્યાં છે. હાલમાં અમેરિકા-ચીન સહીત કેટલાક દેશોએ વેક્સિનની તારીખોનું એલાન પણ કરી નાખ્યું છે. ચીન દ્વારા જાહેરાત કરવામાં આવી છે કે આવતા વર્ષે માર્ચ મહિના સુધી કોરોના વાયરસની રસી શોધી નાખવામાં આવી છે. ચીનનું કહેવું છે કે કોરોના વાયરસનો અંત લાવવા માટે જો કોઈ રસીનો વિકાસ થઇ શકે તો આવતા વર્ષે માર્ચથી જૂન સુધીમાં રસી મળવાની સંભાવના છે.
ડોનાલ્ડ ટ્રમ્પે રસી પર આશા વ્યક્ત કરી
જ્યારે અમેરિકાનું માનવું છે કે આ વર્ષના અંત સુધીમાં જ કોરોના વાયરસની રસી શોધાઈ જશે. અમેરિકાના રાષ્ટ્રપતિ ડોનાલ્ડ ટ્રમ્પે ફોક્સ ન્યૂઝને જણાવ્યું કે મારું માનવું છે કે આ વર્ષના અંત સુધી તો અમને વેક્સિન મળી જશે. જોકે આ સાથે બીજા અનેક દેશો આવા જ દાવાઓ કરી રહ્યા છે ત્યારે વિશ્વ સ્વાસ્થ્ય સંગઠન દ્વારા આપવામાં આવેલ માહિતી મુજબ આઠ રસીમાંથી એક પણ રસીને સફળતા મળે તો કોરોના સામે જંગ લડવામાં એક મોટી રાહત મળી શકે છે.