ખેડૂતો ખુશ / ચોમાસાના વિદાયના વરતારા વચ્ચે ગુજરાતમાં વરસાદની શી ખબર? આ તાલુકાઓમાં સારો વરસ્યો, આશાના વાદળ બંધાયા

• માણાવદર, ગઢડા, અમરેલી, ગાંધીનગરમાં ગાજવીજ સાથે વરસાદ 
• બપોરે અસહ્ય ગરમી બાદ વરસાદ પડતા લોકોએ કંઈક અંશે રાહત મેળવી
• ગાંધીનગર માણસાના વાતાવરણમાં એકાએક પલટો 

ગઢડા તેમજ અમરેલીમાં એક-એક ઈંચ વરસાદ નોંધાયો

આજે રાજ્યનાં 12 તાલુકામાં વરસાદ પડ્યો હતો. જેમાં સૌથી વધુ વરસાદ ગઢડા તેમજ અમરેલીમાં એક-એક ઈંચ વરસાદ નોંધાયો હતો. જ્યારે ઉમરગામમાં અડધો ઈંચ,  ખાંભામાં અડધો ઈંચ વરસાદ નોંધાયો હતો.  

બપોરની અસહ્ય ગરમી બાદ વરસ્યો વરસાદ 
જૂનાગઢનાં માણાવદરમાં ગાજવીજ સાથે વરસાદ પડ્યો હતો. બપોરે અચાનક જ વરસાદી માહોલ છવાતા લોકોએ અસહ્ય ગરમીથી રાહત મેળવી હતી. વરસાદને કારણે ખેડૂતોમાં ખુશી વ્યાપી ગઈ હતી. 

ગાજવીજ સાથે ધીમીધારે વરસાદ 
ઉના-કોડીનારનાં ગ્રામ્ય વિસ્તારમાં વરસાદી માહોલ છવાયો હતો. ગાજવીજ સાથે ધીમીધારે વરસાદ પડ્યો હતો. કોડીનારનાં જંત્રાખડી, માલગમ, બાવાના, પીંપળવાનાં, સોનપરા, બોડીદાર, ચીખલી સહિતનાં ગામોમાં વરસાદ પડ્યો હતો. 

ધોધમાર વરસાદ પડતા વીજ પુરવઠો ખોરવાયો
ગઢડામાં કડાકા ભડાકા સાથે વરસાદ પડ્યો હતો. ધોધમાર વરસાદ પડતા વીજ પુરવઠો ખોરવાયો હતો. વરસાદનાં પગલે ઠેર ઠેર પાણી  ભરાયા હતા. ગઢડાનાં લાખણકા, ઢસા, પાટણા, પીપરડી સહિતનાં વિસ્તારોમાં વરસાદી માહોલ છવાયો હતો. 

થોડા ક જ વરસાદમાં અમરેલી પાણી...પાણી...
અમરેલી જીલ્લામાં ભારે વરસાદ પડ્યો હતો. અમરેલી શહેર સહિત ગોખરવાળા સોનારિયા અને શંભુપરા ગામમાં વરસાદ પડ્યો હતો. ગોખરવાળા ગામમાં ધોધમાર વરસાદને કારણે ગામમાં નદીઓ વહેતી થઈ હતી. 30 મિનિટનાં વરસાદમાં જ અમરેલીની બજારોમાં પાણી ભરાયા હતા. 

ભારે પવન ફૂંકાતા વિઝીબિલીટી ઘટી
ગાંધીનગરનાં માણસાનાં વાતાવરણમાં પણ એકાએક પલ્ટો આવ્યો હતો. ભારે પવન ફૂંકાતા વિઝીબિલીટી ઘટી હતી. ત્યારે પવન બાદ એકાએક ધોધમાર વરસાદ ખાબક્યો હતો. વરસાદ વરસતા વાતાવરણમાં ઠંડક પ્રસરી ગઈ હતી. વરસાદને પગલે વાહન ચાલકો અટવાયા હતા.