પત્નીના પરિવારજનોએ જમાઈ અને તેની માતાને ગડદાપાટુંનો માર મારતાં મામલો પોલીસ મથક પહોંચ્યો
અમદાવાદના વાસણામાં સાળી મંગેતર સાથે ફરવા જાય છે. તેમજ આખો દિવસ મોબાઈલ ફોન પર વાતો કરે છે. તે બાબતે પતિએ નારાજગી વ્યક્ત કરતાં પત્નીએ પતિને જાહેરમાં માર મારી બંને હાથે બચકાં ભરી લીધાં હોવાની ઘટના પ્રકાશમાં આવી છે. ભડકેલી પત્નીના પરિવારજનોએ જમાઈ અને તેની માતાને ગડદાપાટુંનો માર મારતાં મામલો પોલીસ સ્ટેશનમાં પહોંચ્યો હતો.
વાસણાના કેશવાણીનગરમાં રહેતા દીપક નાથા મારવાડીએ પત્ની જ્યોતિબેન, ફોઈ સાસુ રૂપાબહેન ખીમાજી મારવાડી, કાકી સાસુ ચંપાબહેન ગિરીશભાઈ મારવાડી અને ફુવા સસરા અનીલભાઈ મારવાડી વિરુદ્ધ પોલીસ સ્ટેશનમાં ફરિયાદ નોંધાવી છે. દીપકની સાળી સીતાની સગાઈ જીતુ મારવાડી સાથે થઈ હતી. સીતા તેના મંગેતર જોડે આખો દિવસ ફોન પર વાતચીત કરતી અને ફરવા પણ જતી હતી.
આ બાબતે દીપકે તેની પત્ની જ્યોતિને કહ્યું કે, સીતા બહાર ફરવા જાય તે સારું ન લાગે. આમ કહેતાં પત્ની એકદમ ઉશ્કરાઈ ગઈ હતી. પતિની આ વાત સાંભળી ભડકેલી પત્ની જ્યોતિએ પતિ સાથે ઝઘડો કરી અને તેની ફોઈના ઘરે જતી રહી હતી. ગઈ કાલે દીપક અને તેની માતા કાનુબહેન ઘરે હાજર હતાં. તે સમયે જ્યોતિ તેનાં ફોઈ, કાકી અને ફૂવા સાથે આવી હતી. આ ચારે જણાએ દીપક અને તેની માતા સાથે તકરાર કરી અપશબ્દો બોલવાનું શરૂ કર્યું હતું. દીપકે સાસરિયાંને અપશબ્દો બોલવાની ના પાડતાં ઉશ્કેરાયેલી પત્ની જ્યોતિ પતિને માર મારવા લાગી અને બંને હાથે બચકાં ભરી લીધાં હતાં. જ્યારે જ્યોતિના ફોઈ અને કાકીએ કાનુબેનને ગડદાપાટુંનો માર માર્યો હતો. ફૂવા સસરા અનિલભાઈએ પણ દીપકને મારમાર્યો હતો.
દરમિયાનમાં આસપાસના લોકો વચ્ચે પડીને માતા-પુત્રને બચાવ્યાં હતાં. ત્યારબાદ માતા-પુત્રને સારવાર માટે સોલા સિવિલ હોસ્પિટલ ખસેડવામાં આવ્યા હતા. સારવાર દરમિયાન દીપક મારવાડીએ પત્ની જ્યોતિ સહિત ચાર લોકો વિરુદ્ધ ફરિયાદ નોંધાવી હતી. પોલીસે ફરિયાદના આધારે વધુ તપાસ હાથ ધરી છે.