- ગુજરાત કોંગ્રેસ પ્રમુખ શક્તિસિંહ ગોહિલની પ્રતિક્રિયા
- 'બધાના આશીર્વાદથી આજે મને પ્રમુખ પદ મળ્યું છે'
- તેમના આવવાથી પક્ષને જરૂર ફાયદો થશે: જગદીશ ઠાકોર
ગુજરાત કોંગ્રેસના અધ્યક્ષ તરીકે શક્તિસિંહ ગોહિલના નામની હાઈકમાન્ડ દ્વારા જાહેરાત કરવામાં આવી છે. છેલ્લા કેટલાય દિવસોથી ચાલતી ચર્ચા અંત આવ્યો છે, કોંગ્રેસે ગુજરાતના પ્રમુખ તરીકે ગુજરાતી અનુભવી અને ક્ષત્રિય ચહેરાને તક આપી છે. ત્યારે નવા પ્રદેશ પ્રમુખ શક્તિસિંહની પ્રતિક્રિયા સામે આવી છે તેમજ પૂર્વ પ્રમુખ જગદીશ ઠાકોરનું પણ નિવેદન સામે આવ્યું છે.
શક્તિસિંહ ગોહિલની પ્રતિક્રિયા
આ તકે વીટીવી સાથે વાત કરતા શક્તિસિંહ ગોહિલે જણાવ્યું હતું કે, બધાના આશીર્વાદથી આજે મને પ્રમુખ પદ મળ્યું છે આ માટે હું પત્રકાર પરિષદ કરી પત્રકારો સમક્ષ મારી વધુ વાત રજૂ કરીશ. જયારે ગુજરાત કોંગ્રેસના પૂર્વ પ્રમુખો તેમજ આગેવાનો સાથે વાત કરતા તમામ લોકોએ શક્તિસિંહને અનુભવી આગેવાન ઠેરવી પક્ષના નિર્ણયને આવકાર્યો હતો.
તેમના આવવાથી પક્ષને જરૂર ફાયદો થશે: જગદીશ ઠાકોર
કોંગ્રેસના પૂર્વ પ્રમુખ જગદીશ ઠાકોરએ જણાવ્યું હતું કે, ઘણા સમયથી વાત ચાલતી હતી આજે પાર્ટીએ નિર્ણય કર્યો છે, આવકાર્ય છે. શક્તિભાઈ ખુબ અનુભવી છે, ગુજરાતની રાજનીતિ વિશે પોતે બધું જાણે છે. પાર્ટીના ખુબ જૂના આગેવાન છે. કોંગ્રેસ પક્ષમાં તેઓને પાર્ટી યુથ કોંગ્રેસથી લઇ ધારાસભ્ય, વિરોધ પક્ષના નેતા અને રાજ્યસભા સાંસદ સુધી તક આપી છે. તેમના આવવાથી પક્ષને જરૂર ફાયદો થશે.
પરેશ ધાનાણીએ શું કહ્યું ?
પૂર્વ વિરોધપક્ષના નેતા પરેશ ધાનાણીએ જણાવ્યું હતું કે, શક્તિસિંહ ખુબ અનુભવી અને પરિપક્વ આગેવાન છે. વહીવટી અને સંગઠનનો પણ તેઓ અનુભવ ધરાવે છે. પાયાના સિદ્ધાતો તેમની ગળથુથીમાં છે. આવતા દિવસોમાં ગુજરાત કોંગ્રેસ તેમના નેતૃત્વમાં જ્વલંત સફળતા મેળવશે તેવી અમને આશા છે.
અર્જુન મોઢવાડીયાનું નિવેદન
ગુજરાત પ્રદેશ કોંગ્રેસના પૂર્વ પ્રમુખ અર્જુન મોઢવાડીયાએ જણાવ્યું હતું કે, શક્તિસિંહ પ્રમુખ બન્યા તે પાર્ટીનો નિર્ણય આવકાર્ય છે. ઘણા સમયથી રાહ જોતા હતા 6 મહિનાથી અમે રાહ જોતા હતા. અનુભવી આગેવાન છે શક્તિસિંહ માટે પરિવર્તન ચોક્કસ આવશે. અનુભવી નેતૃત્વ છે માટે લોકસભાની ચૂંટણીના પરિણામોમાં પણ અસર જોવા મળશે.
