- કોરોના સામે મળ્યો વધુ એક હથિયાર
- કોરોના સામે પહેલી એન્ટિવાયરલ દવાને બ્રિટનની મંજૂરી
- બ્રિટનનાં સ્વાસ્થ્ય મંત્રીએ કહ્યું આ ગેમચેન્જર સાબિત થશે
દુનિયાભરમાં છેલ્લા બે વર્ષથી કોરોના વાયરસ મહામારી તાંડવ મચાવી રહી છે, આ મહામારીના કારણે દુનિયાભરનાં લાખો લોકોએ પોતાના જીવ ગુમાવ્યા છે ત્યારે હજુ પણ માનવ સભ્યતા આ મહામારી સામે લડી રહી છે. દુનિયાભરનાં વૈજ્ઞાનિકોની મહેનત બાદ વેક્સિન શોધાઈ અને આજે કરોડો લોકોને વેક્સિનનાં ડોઝ પણ લાગી ચૂક્યા છે ત્યારે હવે આ જ દિશામાં વધુ એક ગુડ ન્યૂઝ સામે આવ્યા છે.
યુનાઈટેડ કિંગડમમાં હવે ગોળીથી કોરોના વાયરસનો ઈલાજ થઈ શકશે, બ્રિટનમાં કોરોના વાયરસ સામે એન્ટિવાયરલ પિલ એટલે ગોળીને કોરોના વાયરસનાં દર્દીઓને આપવા માટે મંજૂરી આપવામાં આવી છે.
બ્રિટનનાં સ્વાસ્થ્ય મંત્રીએ કહ્યું કે આજે એક ઐતિહાસિક દિવસ છે, દુનિયાભરમાં યુકે પહેલો દેશ છે જ્યાં કૂરના વાયરસનાં ઈલાજ માટે આ પ્રકારની મંજૂરી આપવામાં આવી છે. તેમણે કહ્યું આ દવા હવે ગેમ ચેન્જર સાબિત થવાની છે.
નોંધનીય છે કે જે દવાને મંજૂરી આપવામાં આવી છે તેનું નામ molnupiravir છે જે કોરોના વાયરસને નબળો પાડી દે છે જેથી જે તે દર્દી ધીમે ધીમે સાજો થઈ શકે. જે લોકો પર હોસ્પિટલમાં દાખલ થવાનો ખતરો છે તેમના માટે આ દવા એક વરદાન સ્વરૂપ સાબિત થાય તેવું માનવામાં આવી રહ્યું છે.
ટ્રાયલ ડેટામાં જે સામે આવ્યું છે તે અનુસાર આ દવા ઈન્ફેક્શનનાં શરૂઆતનાં તબક્કામાં કારગર સાબિત નથી થતી, લક્ષણો દેખાયાનાં પાંચ જ દિવસમાં જ દવા આપી દેવામાં આવે તો તે કોરોના વાયરસ સામે લડત આપી શકે છે.
દવા બનાવનારી કંપનીએ અત્યારથી અમેરિકા અને બ્રિટન સાથે કરાર કરી નાંખ્યા છે, ઑક્ટોબર મહિનામાં જ બ્રિટને કંપનીને 480,000 ડોઝનાં ઓર્ડર આપી દીધા હતા.
