દંડ / ટુ-વ્હીલર ચાલકો માટે મોટા ન્યૂઝ, જો આવું હેલ્મેટ હશે તો રૂ.1000નો મેમો ફાટશે

તે મુજબ જો કોઇ વાહનચાલક પાસે ૧ કિલો ૨૦૦ગ્રામથી વધુ વજનની હેલ્મેટ હશે તો તેની પાસેથી એક હજાર રૂપિયાનો દંડ વસૂલ કરવાનો નિયમ બનાવવામાં આવ્યો છે. જે અત્યંત ટૂંકાગાળામાં રાજ્ય સરકાર પણ અમલી કરવા જઈ  રહી છે.

નવી હેલ્મેટ બજારમાં આવશે તેમાં ફરજિયાત એર વેન્ટિલેટર હશે , ઓછાં  વજનની સાથે હવાની અવરજવર માટેની વ્યવસ્થા હશે. મોટાભાગના વાહનચાલકોને હેલ્મેટ પહેરવામાં કોઈ તકલીફ ન પડે તે માટે  હેલ્મેટની અંદર વોશેબલ મટીરિયલ હશે. ગરમીમાં ચાલકો આ મટીરિયલ બહાર કાઢીને ધોઈ શકે તેવું  રિમૂવેબલ થીન લેયર મટીરિયલ હશે.

અત્યાર સુધી સબ સ્ટાન્ડર્ડ માપદંડો આધારિત બનાવવામાં આવેલી  હેલ્મેટનો વધુ ઉપયોગ થતો હોવાનું જાણવા મળ્યું હતું.  જો કે હેલ્મેટ પહેરવાનાે ફરજિયાત નિયમ અમલી કરાયા બાદ માર્ગ અકસ્માતોમાં મૃત્યુ ના બનાવોમાં ખાસ ઘટાડો જોવા ન મળતા હવે નવા નિયમો સાથે હેલ્મેટ બનાવવા માટે હેલ્મેટના ઉત્પાદકોને પણ જણાવી દેવામાં આવ્યું છે. અત્યાર સુધી હેલ્મેટના વજન બાબતે કોઈ સ્ટાન્ડર્ડ નક્કી ન હતું.

જેથી હવે કેન્દ્રીય માર્ગ પરિવહન મંત્રાલય દ્વારા હેલ્મેટને સ્ટાન્ડર્ડ મુજબ બનાવવાનું નક્કી કરવામાં આવ્યું  છે અને ભારતીય માનક બ્યૂરોની અનિવાર્ય સૂચિમાં પણ વજન ને સામેલ કરવામાં આવ્યું છે. પરિવહન વિભાગ, ટ્રાફિક પોલીસ સહિતની સરકારની વિવિધ એજન્સીઓ હવે વાહન ચેકિંગ દરમિયાન હેલ્મેટના વજનની પણ ચકાસણી કરશે. જો હેલ્મેટનું વજન ૧.૨ કિલોથી વધુ હશે તો વાહનચાલક પાસેથી એક હજાર રૂપિયાનો દંડ વસૂલાશે.

આ ઉપરાંત હેલ્મેટને અનિવાર્ય સૂચિમાં સામેલ કરવામાં આવ્યા બાદ જો કોઈ હેલ્મેટ ઉત્પાદક કંપનીઓ સબ સ્ટાન્ડર્ડ હેલ્મેટ બનાવતી હશે તો એવી કંપનીઓ સામે પણ બે લાખ રૂપિયાનો દંડ અને છ મહિનાની સજાની જોગવાઈ કરાઇ છે.