વિશ્વ સિંહ દિવસ સ્પેશ્યલ / ગુજરાતનાં આ ગામમાં આવેલું છે વિશ્વનું એકમાત્ર સિંહણનું મંદિર: હનુમાન ચાલીસાની જેમ કરાય છે સિંહ ચાલીસા, દૂર દૂરથી આવે છે લોકો

• અમરેલીનાં રાજુલામાં પર્યાવરણ પ્રેમીઓએ બનાવ્યું સિંહણનું મંદિર
• સિંહ પ્રેમીઓ અને પર્યાવરણ પ્રેમીઓએ બનાવ્યું સિંહણ સ્મૃતિ સ્મારક
• રેલ્વે ટ્રેક ઉપર બે સિંહણોનાં અકસ્માત થતા સ્મારક બનાવ્યું

વિશ્વનું આ એકમાત્ર સિંહ સ્મારક અમરેલી જિલ્લાના રાજુલા તાલુકામાં આવેલું છે. જેમ ભગવાન માટે આસ્થા, પ્રેમ અને વિશ્વાસ હોવાથી આપણે તેમને પૂજીએ છીએ, તેમ રાજુલા પંથકમાં પણ લોકો માટે સિંહ પૂજનીય છે. અહીંના લોકોને સિંહ પ્રત્યે અનોખી આસ્થા છે. આજે વિશ્વ સિંહ દિવસ નિમિત્તે સમગ્ર વિસ્તારમાં ઉજવણી કરવામાં આવી રહી છે. ત્યારે આજે ગુજરાતમાં આવેલા એક સિંહના સ્મારક વિશેની વાત કરીશું અમરેલી જિલ્લાના રાજુલા તાલુકામાં આવેલા ભેરાઈ ગામ પાસે સિંહ પ્રેમીઓએ એક સિંહણ સ્મૃતિ સ્મારક બનાવ્યુ છે. દર વર્ષે વિશ્વ સિંહ દિવસ નિમિત્તે આ સ્મારક પર સિંહની પૂજા અને આરતી કરવામાં આવે છે.

એકમાત્ર સિંહ સ્મારક છે જ્યાં શ્રદ્ધા સાથે સિંહની પૂજા થાય છે
જેમ હનુમાન ચાલીસા થયા તેમ જ સિંહ ચાલીસા નું પઠન થાય છે. ગીરના સિંહની સૌથી વધુ વસ્તી ધરાવતા આ વિસ્તારના લોકો માટે સિંહ પ્રાણથી પણ પ્રિય છે. આ વિસ્તાર બૃહદગીર તરીકે ઓળખાય છે. સિંહ પ્રેમીઓનું કહેવું છે કે, વિશ્વનું આ એકમાત્ર સિંહ સ્મારક છે. જ્યાં અપાર શ્રદ્ધા સાથે સિંહની પૂજા થાય છે. અમરેલી જિલ્લાના લોકો પહેલાંથી જ સિંહને ખૂબ પ્રેમ કરે છે. 
પરંતુ સ્મારક બનાવવા પાછળની કહાની ખૂબ દર્દથી ભરેલી છે. સિંહ પ્રેમીઓને વર્ષ 2014 માં સ્મારક બનાવવાનો વિચાર આવ્યો હતો. કારણ કે વર્ષ 2014માં એવી ઘટના ઘટી હતી કે જેનાથી સિંહ પ્રેમીઓને ખૂબ ઠેસ પહોંચી હતી. ભેરાઈ ગામ નજીક ટ્રેન અકસ્માતમાં બે સિંહણના મોત થયા હતા. 

સિંહ પ્રેમીઓ અને પર્યાવરણ પ્રેમીઓએ આગળ આવ્યા 
અકસ્માતમાં મોતની રાજ્યમાં આ પહેલી ઘટના હતી એવું સિંહ પ્રેમીઓનું કહેવું છે.  જે બાદ સિંહ પ્રેમીઓ અને પર્યાવરણ પ્રેમીઓએ આગળ આવ્યા અને લોકભાગીદારીથી અહીં સિંહણ સ્મૃતિ સ્મારક બનાવ્યું. ગામના જ એક વ્યક્તિએ જમીનનું દાન આપીને સ્મારક બનાવવામાં વિશેષ યોગદાન આપ્યું. 

સિંહણના આ સ્મારક પર લોકો માનતા પુરી કરવા પણ આવે છે
આજે વિશ્વ સિંહ દિવસે અહીં મોટી સંખ્યામાં સ્થાનિકો, સિંહ પ્રેમીઓ અને વનવિભાગના અધિકારીઓ ઉપસ્થિત રહે છે. અને સિંહ ચાલીસા સહિતના કાર્યક્રમો યોજવામાં આવે છે. સિંહ સ્મારકની વાત સાંભળી અહીં બહારથી પણ લોકો આવી રહ્યા છે. જેના કારણે આ વિસ્તારના લોકો ગૌરવ અનુભવી રહ્યા છે. સિંહણના આ સ્મારક પર લોકો માનતા પુરી કરવા પણ આવે છે.
રેલ્વે ટ્રેક ઉપર બે સિંહણોનાં અકસ્માત થતા તેમનું સ્મારક બનાવ્યું
અમરેલી જિલ્લાના પૂર્વ વાઇલ્ડ લાઇફ વોર્ડન વિપુલ લહેરી જણાવે છે કે, વર્ષ 2014માં અહીં રેલવે ટ્રેક ઉપર બે સિંહણોના અકસ્માતમાં મોત થયા હતા. બંને સિંહણો ખુબ જ પ્રોપ્યુલર હતા જેથી બધા જ લોકોને સારો વિચાર આવ્યો અને સિંહ સ્મારક બનાવ્યું હતું. સમગ્ર વિશ્વમાં અહીં જ સિંહણનું સ્મારક છે. દર વર્ષે વિશ્વ સિંહના દિવસે અહીં સિંહ ચાલીસા સહિતના કાર્યકર્મો યોજાય છે. વનવિભાગના અધિકારીઓ પણ ઉપસ્થિત રહે છે અને આરતી ઉતારે છે.