- ગૃહ રાજ્યમંત્રી હર્ષ સંઘવીનો આજે જન્મદિવસ
- સુરતમાં વિવિધ ક્રાર્યક્રમોનું કરવામાં આવ્યું આયોજન
- ધરમ પેલેસ ખાતે કુપોષિત બાળકોને પ્રોટીન કીટનું વિતરણ
- વડોદરામાં અંધજન મંડળના બાળકોએ યોજ્યો સંગીત કાર્યક્રમ
સુરતની મજુરા વિધાનસભા બેઠકના ધારાસભ્ય અને ગૃહ રાજ્યમંત્રી હર્ષ સંઘવીનો આજે 38મો જન્મ દિવસ છે. દર વર્ષની જેમ ગૃહ રાજ્યમંત્રી હર્ષ સંઘવીના જન્મદિવસની વિવિધ સેવાકીય કાર્યો સાથે ઉજવણી કરવામાં આવી રહી છે. આપત્તિ સમયે હરહંમેશ પ્રજાની વચ્ચે, પ્રજાની સાથે ખડે પગે ઉભા રહેતાં અને કોવિડ સમયે દિવસરાત જોયાં વગર શહેરીજનોની અદ્ભૂત સેવા કરી જનમાનસમાં અનોખી છાપ ઉભી કરનાર ગૃહ રાજ્યમંત્રી હર્ષ સંઘવીના જન્મદિવસ નિમિત્તે સુરતમાં વિવિધ ક્રાર્યક્રમોનું આયોજન કરવામાં આવી રહ્યું છે. જે અંતર્ગત આજે ધરમપેલેસ ખાતે કુપોષિત બાળકોને પ્રોટીન કીટનું વિતરણ કરવામાં આવ્યું હતું.
દિવ્યાંગ બાળકોએ અનોખી રીતે પાઠવી શુભકામના
તો વડોદરા મદદનીશ પોલીસ કમિશનરની કચેરી ખાતે અંધજન મંડળના બાળકોએ પણ અનોખી રીતે ગૃહ રાજ્યમંત્રી હર્ષ સંઘવીને જન્મ દિવસની શુભેચ્છા પાઠવી હતી. મદદનીશ પોલીસ કમિશનરની કચેરી ખાતે દિવ્યાંગ બાળકોએ ગીત ગાઈને હર્ષ સંઘવીએ જન્મદિવસની શુભેચ્છા પાઠવી હતી. આ ઉપરાંત આ બાળકોએ જન્મ દિવસની શુભકામઓના કાર્ડ બનાવીને હર્ષ સંઘવીને આપ્યા હતા. દિવ્યાંગ બાળકો દ્વારા આટલી સરસ રીતે જન્મદિવસની શુભકામના પાઠવવામાં આવતા હર્ષ સંઘવી અભિભૂત થઈ ગયા હતા. આ દરમિયાન હર્ષ સંઘવીએ આ તમામ બાળકોને કેક પણ ખવડાવી હતી.
પાંચ કિલોમીટરની મેરેથોનમાં હર્ષ સંઘવીએ પણ લીધો ભાગ
જે બાદ વડોદરા શહેરમાં આજે વહેલી સવારે ઇન્ટરનેશનલ મેરેથોનને મુખ્યમંત્રી ભૂપેન્દ્ર પટેલ અને ગૃહ રાજ્યમંત્રી હર્ષ સંઘવીએ ફ્લેગ ઓફ કર્યું હતું. જેમાં પાંચ કિલોમીટરની મેરેથોનમાં હર્ષ સંઘવીએ પણ ભાગ લીધો હતો અને મેરેથોનના દોડવીરનો ઉત્સાહ વધાર્યો હતો.
મહિલાઓ આત્મનિર્ભર બને તે માટે 'હાટ બજાર'નું આયોજન
મહિલાઓ આત્મનિર્ભર બને તે માટે એક દિવસીય 'હાટ બજાર'નું સહિયર ગ્રુપ અને DDC ગ્રુપ દ્વારા આયોજન કરવામાં આવ્યું છે. 'હાટ બજાર' ખાતે ગૃહ રાજ્યમંત્રી હર્ષ સંઘવી પહોંચ્યા હતા. અહીં વિવિધ સ્ટોલ મૂકનાર બહેનો સાથે વાર્તાલાપ કર્યો હતો. આ તકે મહિલાઓએ પણ ગૃહ રાજ્યમંત્રી હર્ષ સંઘવીને જન્મ દિવસની શુભકામનાઓ પાઠવી હતી.
