બજેટ તૈયાર કરવા સેંકડો અધિકારીઓ ઘર-પરિવારથી 10 દિવસ એટલે કે 14,400 મિનિટ દૂર રહે, બજેટની ગોપનીયતા જાળવવા જડબેસલાક સુરક્ષા વ્યવસ્થા હોય છે
બજેટ તૈયાર કરવા સેંકડો અધિકારીઓ ઘર-પરિવારથી 10 દિવસ દૂર રહે છે
બજેટની ગોપનીયતા જાળવવા જડબેસલાક સુરક્ષા વ્યવસ્થા હોય છે
બજેટએ અત્યંત ગોપનીય દસ્તાવેજ હોય છે
કેન્દ્રીય નાણાપ્રધાન નિર્મલા સીતારમન દ્વારા આજે રજૂ કરવામાં આવેલું બજેટ તૈયાર કરવા માટે સેંકડો અધિકારીઓની ફોજ 14,400 મિનિટ પોતાના ઘર-પરિવારથી દૂર કેદ રહે છે. બજેટ તૈયાર કરવાની પ્રક્રિયામાં આ અધિકારીઓની મહત્ત્વપૂર્ણ ભૂમિકા હોય છે. બજેટ એ અત્યંત ગોપનીય દસ્તાવેજ હોય છે અને તેને તૈયાર કરતી વખતે તેમાં સામેલ અધિકારીઓ અને કર્મચારીઓ પોતાના ઘર-પરિવાર અથવા તો સમગ્ર દુનિયાથી 10 દિવસ સુધી વિખુટા રહે છે. જો તમે 10 દિવસની મિનિટની ગણતરી કરો તો 14,400 મિનિટ થાય છે. એટલે કે બજેટને આખરી ઓપ આપનારા અધિકારીઓ 14,400 મિનિટ સુધી કેદમાં રહે છે.
બહાર જવાની કે પોતાના સાથીઓને મળવાની મંજૂરી હોતી નથી
બજેટ તૈયાર થવાની પ્રક્રિયા દરમિયાન નાણાપ્રધાન અત્યંત ભરોસાપાત્ર અને વરિષ્ઠ અધિકારીઓને જ ઘરે જવાની મંજૂરી આપે છે. દેશનું સામાન્ય બજેટ જ્યાં સુધી સંસદમાં રજૂ થાય નહીં ત્યાં સુધી તેને તૈયાર કરવાની પ્રક્રિયા સાથે સંકળાયેલા લોકોની સુરક્ષા વ્યવસ્થા જડબેસલાક હોય છે. બહારની કોઈ પણ વ્યક્તિ નાણાં મંત્રાલયમાં એન્ટ્રી કરી શકતી નથી. બજેટના દસ્તાવેજને તૈયાર કરનારી ટીમ ઉપરાંત તેનાં પ્રિન્ટિંગ સાથે સંકળાયેલા અધિકારીઓ અને કર્મચારીઓને પણ બહાર જવાની કે પોતાના સાથીઓને મળવાની મંજૂરી હોતી નથી.
10 દિવસ ઈન્ટરનેટનો ઉપયોગ કરવા પર પણ પ્રતિબંધ હોય
નાણા મંત્રાલયમાં 10 દિવસ માટે ડોક્ટરોની એક ટીમ પણ તમામ જરૂરી સુવિધાઓથી સજ્જ થઈને તહેનાત રહે છે, જેથી કોઈ પણ કર્મચારી કે અધિકારી બીમાર પડે તો તેને મંત્રાલયની અંદર જ તબીબી સેવાઓ ઉપલબ્ધ કરાવી શકાય. બજેટ તૈયાર કરવાની પ્રક્રિયા દરમિયાન છેલ્લા 10 દિવસમા ઈન્ટરનેટનો ઉપયોગ કરવા પર પણ પ્રતિબંધ હોય છે.