મ્યુકરમાઇકોસીસ-કોરોના સારવાર અંગે HCમાં કરી છે એફિડેવિટ
"કેન્દ્ર જેટલા ઇન્જેક્શન આપશે એટલા જ ઇન્જેક્શન રાજ્યને મળશે"
ગુજરાત હાઇકોર્ટમાં આજે સુઓમોટો કેસની સુનાવણી
ગુજરાત સહિત આખા દેશમાં કોરોના વાયરસની બીજી લહેર ચાલી રહી છે ત્યારે ગુજરાત હાઇકોર્ટમાં ચાલી રહેલા સુઓમોટો કેસમાં આજે ફરીથી સુનાવણી હાથ ધરવામાં આવશે. રાજ્યમાં કોરોના વાયરસના કેસમાં રાહત મળી છે પરંતુ મ્યુકર્મામાઇકોસિસના કેસ વધી રહ્યા છે ત્યારે રાજ્ય સરકાર દ્વારા રાજ્યમાં મહામારીની પરિસ્થિતિ મુદ્દે હાઇકોર્ટમાં એફિડેવિટ કરવામાં આવી છે.
કેન્દ્ર જેટલા ઇન્જેકશન આપશે તેટલા જ મળશે : રાજ્ય સરકાર
મ્યુકર્મામાઇકોસિસ તથા કોરોના વાયરસની સારવાર અંગે ગુજરાત સરકારે જે એફિડેવિટ કરી છે તેના પર હાઇકોર્ટમાં સુનાવણી હાથ ધરવામાં આવશે. રાજ્યમાં મ્યુકર્મામાઇકોસિસના ઇન્જેક્શન મુદ્દે ગુજરાત સરકારે હાઇકોર્ટમાં જણાવ્યું કે મ્યુકર્મામાઇકોસિસના ઇન્જેકશનનો જથ્થો કેન્દ્ર સરકારે પોતાના હસ્તક લીધો છે અને કેન્દ્ર જેટલા ઇન્જેકશન આપશે તેટલા જ ઇન્જેક્શન રાજ્યને મળશે.
ગ્રામીણ વિસ્તારમાં ટેસ્ટિંગ સુવિધાનો દાવો
આ સિવાય કોરોના વાયરસના ટેસ્ટિંગ માટે સરકારે દાવો કર્યો છે કે હાઇકોર્ટ દ્વારા કરવામાં આવેલા નિર્દેશ અનુસાર ગ્રામીણ વિસ્તારોમાં ટેસ્ટિંગ ફેસીલીટી કરવામાં આવી છે. આ સિવાય નારી સંરક્ષણગૃહ, બાળ સંરક્ષણ ગૃહ, વૃદ્ધાશ્રમમાં કામ કરતા લોકોને રસી આપી છે.
મ્યુકર્મામાઇકોસિસના ઇન્જેકશન લેવા માટે દર્દીઓના પરિજનોમો રઝળપાટ
નોંધનીય છે કે કોરોના વાયરસ મહામારી બાદ ગુજરાતમાં બ્લેક ફંગસના કેસ ખૂબ જ વધી રહ્યા છે. આ બીમારી કોરોના વાયરસ કરતાં પણ અતિગંભીર છે જેમાં દર્દીઓના અંગો કાઢવાનો વારો આવી રહ્યો છે તથા ઘણા બધા દર્દીઓ જીવ ગુમાવી રહ્યા છે. આ બીમારીમાં 90થી 140 ઇન્જેકશનની જરૂર પડે છે જે માટે દર્દીઓના પરિજનોને ખૂબ જ તકલીફો પડી રહી છે. લાંબી પ્રક્રિયાથી પસાર થયા બાદ માંડ માંડ દર્દીઓને ઇન્જેકશન મળી રહ્યા છે જેની કિંમત ખૂબ ઊંચી હોવાથી લાખો રૂપિયામાં બીમારીની સારવાર થઈ રહી છે.