તહેવારોની સીઝન શરૂ થઈ ગઈ છે. આ સાથે જ બધાં ગિફ્ટ્સ પણ એકબીજાને આપે છે. પણ તમને જણાવી દઈએ કે ગિફ્ટ્સ પર પણ ટેક્સ આપવું પડે છે. ચાલો જાણી લો ડિટેલ્સ.
તહેવારોની સીઝનમાં ગિફ્ટ્સ આપતા પહેલાં ધ્યાન રાખજો
ગિફ્ટ પર પણ ટેક્સ આપવું પડે છે
ગિફ્ટ પર વાર્ષિક આધારે લાગે છે ટેક્સ
આવકવેરા અધિનિયમની કલમ 56 (2) હેઠળ, સોનું, રોકડ અથવા ભેટ તરીકે મળેલા શેર પર આવકવેરાના સ્લેબ મુજબ ટેક્સ લાગે છે. ભારતીય કર કાયદા મુજબ, જ્યારે કોઈ વ્યક્તિને એક વર્ષમાં 50000 રૂરિયાથી વધુની ગિફ્ટ મળે છે તો તે ટેક્સેબલ થઈ જાય છે.
જો તમને નાણાકીય વર્ષમાં 50,000 રૂપિયા સુધીની ગિફ્ટ મળે છે તો તમારે તેના પર કોઈ ટેક્સ ચૂકવવો પડશે નહીં. પણ જો ગિફ્ટ 50 હજાર રૂપિયાથી વધી જાય તો સમગ્ર ખર્ચ પર ટેક્સ ચૂકવવો પડશે. ધારો કે તમને નાણાકીય વર્ષમાં 60 હજાર રૂપિયાની ભેટ મળે છે, તો તમારી આવકમાં 60 હજાર રૂપિયા ઉમેરવામાં આવશે.
લોહીના સંબંધોથી મળેલી ગિફ્ટ
જોકે, આમાં કેટલાક અપવાદો પણ છે. 50,000 રૂપિયાથી વધુની ભેટ કેટલાક કિસ્સાઓમાં કરમુક્ત પણ હોય છે. તેમાં અમુક સંબંધીઓ તરફથી મળેલી ભેટનો સમાવેશ થાય છે, જેમ કે પિતા તેના પુત્રને ભેટ આપી શકે છે અથવા પુત્ર તેના પિતાને કોઈપણ રકમ ભેટ આપી શકે છે. આ ભેટ કરપાત્ર નથી. સંબંધીઓ તરફથી મળેલી ભેટ કરમુક્ત છે. પતિ, પત્ની, ભાઈ, બહેન, પતિ અને પત્નીના ભાઈ -બહેનો સહિત લોહીના સંબંધીઓ તરફથી મળેલી ભેટ પણ કર મુક્તિના દાયરામાં આવે છે. લગ્ન પ્રસંગે મળેલી ભેટ પણ કરમુક્ત હોય છે, પછી ભલે તે કોઈ સગા કે બિન-સંબંધી તરફથી મળી હોય.
વાર્ષિક ધોરણે ટેક્સ વસૂલવામાં આવે છે
ભેટ પર લાગતું ટેક્સ કોઈ એક ગિફ્ટ પર નથી લાગતું, પણ નાણાકીય વર્ષમાં પ્રાપ્ત થયેલી કુલ ભેટ પર લાગે છે. એટલે કે, જો તમને એક વર્ષમાં 50 હજાર રૂપિયાથી વધુની ભેટ મળી હોય તો તમારે આવકવેરો ભરવો પડશે. એવું નહીં થાય કે જો તમને 51 હજારની ભેટ મળી હોય તો તેના પર ટેક્સ લાગશે અને જો બીજી ભેટ 40 હજાર રૂપિયાની હશે તો તેના પર ટેક્સ લાગશે નહીં. આવી સ્થિતિમાં તમારે 91 હજારની સમગ્ર ભેટ પર ટેક્સ ચૂકવવો પડશે.