સુરત / ડાયમંડ ઉદ્યોગમાં હાહાકાર, રૂ. 3 હજાર કરોડના હીરા સીઝ

સુરતના હીરા ઉદ્યોગકારોમાં મોટો હાહાકાર મચ્યો છે. સુરત સાથે સંકળાયેલા ઉદ્યોગકારોના રૂપિયા 3 હજાર કરોડના હીરા સીઝ થયા છે. મુંબઈ એરપોર્ટ પર કસ્ટમ એરપોર્ટ સ્પેશિયલ કાર્ગો કમિશનરે કાર્યવાહી હાથ ધરી છે. જેમાં હીરા ઉદ્યોગકારોના રૂપિયા ત્રણ હજાર કરોડના રફ ડાયમંડ સીઝ કરવામાં આવ્યા છે. 

કુલ 14 મિલિયન યુએસ ડોલરના હીરાના પાર્સલ સીઝ કરવામાં આવ્યા છે. ઈમ્પોર્ટ થયેલા ડાયમંડમાં ઓવર વેલ્યુએશનનું કૌભાંડ હોવાની શક્યતા છે. ત્યારે સુરતમાં 15 જેટલી કંપનીઓને કસ્ટમ વિભાગે નોટિસ ફટકારી છે.

મુંબઇ કસ્ટમમાંથી મળતી માહિતી મુજબ દેશ-વિદેશમાં જેની હીરા કારોબારની 12થી વધુ ઓફિસો છે, તેવા હીરા ઉદ્યોગકારને 25 પાર્સલો સાથે અટકાવી પુછપરછ કરાઇ હતી.આયાત કરેલા એક પાર્સલમાં પકડાયેલા હીરાની સરખામણીએ કાગળ પર મુલ્ય વધુ દર્શાવાયું હતું.

આ કૌભાંડને પગલે હાલ કસ્ટમ ડિપાર્ટમેન્ટ દ્વારા રફ ડાયમંડના કલર, સાઈઝ, કેરેટ સહિતની વિગતોની માંગણી થઈ રહી છે. ત્યારે હીરાના ઉદ્યોગકારો દ્વારા આ નોટીફિકેશનને રદ્દ કરવા માટે દિલ્હી દોડધામ પણ હાથ ધરાઈ હતી. ત્યારે તંત્રએ આ માંગણીનો સ્વીકાર કરાયો નથી.