રાજ્યભરમાં આજે ST નિગમના કર્મચારીઓની હડતાળ મુસાફરો અટવાયા

રાજ્યભરમાં આજે એસટી નિગમના કર્મચારીઓ અચોક્કસ મુદ્દતની હડતાળ પર ઉતર્યા છે. પોતાની પડતર માગોને લઈને રાજ્યભરના એસટી નિગમના કર્મચારીઓ હડતાળ પર ઉતર્યા છે.

કર્મચારીઓ મધરાતથી હડતાળ પર ઉતરતા મુસાફરો અટવાયા છે. વળી મુસાફરોને અન્ય બસનો વિકલ્પ ના મળતા બસ ડેપોમાં અટવાયા છે. જેના કારણે મુસાફરોએ રાતવાસો પણ બસ ડેપોમાં કરવાનો વારો આવ્યો હતો.

યુનિયન દ્વારા સાતમા પગારપંચ સહિતના મુદ્દે કરાયેલી માગણી જો નહીં સંતોષાય તો જડબેસલાક હડતાળ પાડવા માટે ચીમકી આપી હતી. એકસાથે હજારો એસટી બસના પૈડા થંભી જતાં રાજ્યભરના લાખો યાત્રિકોમાં અફરાતફરી મચી જોવા મળી રહી છે.

એસટી કર્મચારીઓના યુનિયન દ્વારા તાત્કાલિક માગણી પૂરી કરવામાં નહી આવે તો વધુ ઉગ્ર આંદોલનની ચીમકી ઉચ્ચારાઇ હતી અને જ્યાં સુધી માગણી પૂરી નહીં થાય ત્યાં સુધી હડતાળ ચાલુ રાખવાની ચીમકી પણ ઉચ્ચારવામાં આવી હતી.

ઉલ્લેખનીય છે કે રાજયભરના 45 હજાર જેટલા કર્મચારીઓ આજથી હડતાળ પર ઉતર્યા છે અને હડતાળના પગલે 8 હજાર જેટલી એસટી બસોના પૈડા થંભી ગયા છે. બીજી તરફ બસ ડેપોમાં કોઈ અનિચ્છનીય ઘટનાના બને તે માટે ચુસ્ત પોલીસ બંદોબસ્ત પણ ગોઠવી દેવાયો છે.

જો કે રાજ્યભરના એસટી નિગમના કર્મચારીઓની હડતાળના પગલે રાજકોટ સુરત બરોડા ભાવનગર જેવા શહેરોમાં પણ કર્મચારીઓ હડતાળ ઉતરી જતાં મુસાફરોને ભારે હાલાકીનો સામનો કરવો પડી રહ્યો છે.

અટવાયેલા મુસાફરોએ સરકાર વિરુધ્ધ રોષ પ્રગટ કરતાં જણાવ્યું કે સરકારે મુસાફરો માટે વૈકલ્પિક વ્યવસ્થા કરવી જોઇએ. અમદાવાદ સહિત મોટા ભાગના ડિવિઝનના કર્મચારીઓએ રજાના રિપોર્ટ મૂકી દીધા છે. 

રાજકોટમાં પણ એસટી નિગમના કર્મચારીઓ હડતાળ પર ઉતર્યા છે. રાત્રીના બાર વાગ્યાથી એસટી નિગમના કર્મચારીઓ હડતાળ પર ઉતર્યા છે. પોતાની પડતર માગોને લઈને એસટી નિગમના કર્મચારીઓ હડતાળ પર ઉતર્યા છે.

ત્યારે રાજકોટની 1 હજાર 200 સહિત સૌરાષ્ટ્રની 10 હજારથી પણ વધુ બસોના રૂટ બંધ થયા છે. મોડી રાતથી જ એસટી નિગમના કર્મચારીઓ હડતાળ પર ઉતરતા મુસાફરો અટવાયા છે.

જામનગર એસટી ડિવીઝન પણ આ હડતાળમાં જોડાયુ છે. જામનગર ડિવીઝનના 1 હજાર 300થી વધુ એસટી કર્મચારીઓ પણ આ હડતાળમાં જોડાયા છે. જિલ્લાના 284 બસ રૂટ બંધ થતા લોકોને ભારે હાલાકી ભોગવવાનો વારો આવ્યો છે. કર્મચારીઓ માસ સીએલ પર ઉતરી જતા ખાનગી વાહન ચાલકોને પણ જલસા થઈ ગયા છે.

કચ્છમાં પણ એસટી નિગમના કર્મચારીઓ હડતાળમાં જોડાયા છે. કચ્છમાં એસટી કર્મચારીઓ રાતના બાર વાગ્યાથી હડતાળ પર ઉતરતા મુસાફરોને ભારે હાલાકી પડી રહી છે. બીજી તરફ બહારથી આવતી તમામ બસોને ભચાઉ બસ ડેપોમાં રોકવામાં આવી. જેના પગલે હજારો મુસાફરો બસ ડેપોમાં જ અટવાયા.

રાજ્યભરમાં એસટી નિગમના કર્મચારીઓ હડતાળ પર ઉતર્યા છે. સુરતમાં રાતે બાર વાગ્યાથી જ એસ ટી નિગમના કર્મચારીઓ હડતાળ પર ઉતરી જતા મુસાફરોને મુશ્કેલી વેઠવાનો વારો આવ્યો. જુદા જુદા યુનિયનના આગેવાનો પણ એસટી ડેપોમાં હાજર રહ્યા અને હડતાળમાં જોડાયા છે. હડતાળના પગલે તમામ બસો ડેપો અને ડિવીઝનમાં ખડકી દેવામાં આવી. જે બાદ હજારો મુસાફરો રઝળી પડ્યા છે.

રાજ્યભરમાં એસટી નિગમના કર્મચારીઓની હડતાળની અસર ખેડાના કપડવંજમાં પણ જોવા મળી. કપડવંજમાં ડ્રાઈવર અને કંડક્ટર સહિતનો સ્ટાફ માસ સીએલ પર ઉતરી જતા હાલ તો મુસાફરોને મુશ્કેલી વેઠવાનો વારો આવ્યો છે. એસ ટી નિગમના કર્મચારીઓની પડતર માગો અને ખાનગીકરણને લઈને તેઓ હડતાળ પર ઉતર્યા છે.

રાજ્યભરના STના કર્મચારીઓ હડતાળ પર છે. આ હડતાળમાં અરવલ્લીના પણ STના કર્મચારીઓ જોડાયા છે. મોડાસા બાયડ સહીત જિલ્લાના બે હજારથી વધુ કર્મચારીઓ હડતાળ પર ઉતર્યા છે. ST બસોના પૈડા થંભી જતા મુસાફરો પરેશાન થયા છે.