અકસ્માત / ડાકોર-કપડવંજ રોડ ઉપર ઢોર વચ્ચે આવી જતા ST બસ પલટી, 40 મુસાફરોના જીવ થયાં અધ્ધર

• ડાકોર-કપડવંજ રોડ ઉપર લાભપુરા પાસે ST બસ પલટી
• ઢોર વચ્ચે આવી જતા નડ્યો અકસ્માત
• 6 જેટલા મુસાફરોને પહોંચી ઈજા

ખેડા જિલ્લાના કપડવંજ તાલુકામાં એસટી બસનો અકસ્માત સર્જાયો છે. મળતી માહિતી અનુસાર, એસટી બસ ઝઘડિયાથી અંબાજી તરફ જઈ રહી હતી. આ દરમિયાન ડાકોર-કપડવંજ રોડ ઉપર લાભપુરા પાસે એસટી બસની વચ્ચે ઢોર આવી જતા બસ પલટી મારી ગઈ હતી. 

6 જેટલા મુસાફરોને ઈજા
પ્રાપ્ત વિગતો અનુસાર, ઝઘડિયાથી અંબાજી તરફ જતી એસટી બસમાં 40 મુસાફરો સવાર હતા. આ અકસ્માતમાં 6 જેટલા મુસાફરોને ઈજાઓ પહોંચી હતી. અકસ્માતને પગલે લોકોના ટોળેટોળા એકઠા થઈ ગયા હતા. 

ઈજાગ્રસ્તોને હોસ્પિટલમાં ખસેડાયા
રાહદારીઓ દ્વારા આ અકસ્માતની જાણ પોલીસને કરવામાં આવતા પોલીસની ટીમ તાત્કાલિક બનાવ સ્થળે દોડી આવી હતી અને ઈજાગ્રસ્તોને સારવાર અર્થે હોસ્પિટલમાં ખસેડવામાં આવ્યા હતા. જોકે, આ અકસ્માતમાં કોઈ જાનહાનીના સમાચાર સામે આવ્યા નથી. 

બગસરા ડેપોની બસનો સર્જાયો હતો અકસ્માત
અત્રે ઉલ્લેખનીય છે કે, ત્રણ દિવસ અગાઉ બગસરા એસટી ડેપોની બસ જૂનાગઢ તરફ જઈ રહી હતી આ દરમિયાન  સાવરકુંડલાના મહુવા રોડ ઉપર એસટીબસ અને ટ્રક વચ્ચે અકસ્માત સર્જાયો હતો. આ અકસ્માતમાં એસટી બસના ડ્રાઈવર અને કન્ટેનરના ડ્રાઈવરને ઈજાગ્રસ્ત થયા હતા. જેઓને સારવાર અર્થે હોસ્પિટલ ખાતે ખસેડવામાં આવ્યા હતા. આ અકસ્માતમાં બસનો કચ્ચરઘાણ થઈ ગયો હતો.