અપડૅટ આગાહી / 'આ વખતે ચોમાસું કંઇક વિશિષ્ટ પ્રકારનું', ગુજરાતના મોટા ભાગના જિલ્લાઓ પર મેઘો થશે મહેરબાન: અંબાલાલ

• હવામાન નિષ્ણાત અંબાલાલ પટેલની આગાહી
• 2 જુલાઈએ હવાનું દબાણ સર્જાશે
• 2થી 5 જુલાઈ ગુજરાતમાં વરસાદ રહેશે

રાજ્યાં છેલ્લા બે દિવસથી વરસાદી માહોલ જામ્યો છે. ત્યારે હવામાન નિષ્ણાંત અંબાલાલ પટેલ દ્વારા આગાહી કરવામાં આવી છે. 2 જુલાઈએ હવાનું દબાણ સર્જાશે. જેનાથી 5 જુલાઈ સુધી વરસાદ આવશે. તેમજ 2 થી 5 જુલાઈ સુધી ગુજરાતમાં વરસાદ થશે. જ્યારે 8 થી 12 જુલાઈ દરમિયાન રાજ્યનાં મોટા ભાગનાં જીલ્લામાં વરસાદ થશે. તેમજ 11 થી 12 જુલાઈ દરમિયાન દરિયા કિનારે પવન ફૂંકાશે. અને 18 થી 20 જુલાઈ દરમ્યાન હવાનું દબાણ ઉભું થશે અને વરસાદ થશે. 

23 ઓગસ્ટ પછી વરસાદનું જોર ઘટવાનું શરૂ થશેઃ અંબાલાલ પટેલ
તેમજ વધુમાં અંબાલાલ પટેલે જણાવ્યું હતું કે ઓગસ્ટ મહિનામાં પણ ગુજરાતમાં સારો વરસાદ થશે. 23 ઓગસ્ટ પછી વરસાદનું જોર ઘટવાનું શરૂ થશે. માડાગાસ્કરથી ચોમાસાની વળાંક કેરળ તરફ રહેવી જોઈએ પણ આ વખતે એવું નથી. આ વખતે વિશિષ્ટ પ્રકારનું ચોમાસું છે જે અગાઉની પેટર્ન પ્રમાણે નથી.

22 કલાકમાં 221 તાલુકાઓમાં વરસાદ
જૂનાગઢ શહેરમાં સૌથી વધુ સાડા દસ ઈંચ વરસાદ પડ્યો છે. આ સાથે સુરતના મહુવામાં પડ્યો સાડા સાત ઈંચ, તાપીના વાલોડ અને વ્યારામાં સાત ઈંચ, તાપીના ડોલવણમાં સાડા છ ઈંચ, ગીર સોમનાથના તાલાલામાં 6 ઈંચ, સુત્રાપાડા અને મેંદરડામાં 6 ઈંચ, ભેસાણ અને ચોટીલામાં પડ્યો સાડા પાંચ ઈંચ વરસાદ પડ્યો છે. 

રાજ્યમાં સર્વત્ર મેઘમહેર 
આ તરફ ગુજરાતના 9 તાલુકામાં 6 ઈંચ કરતા વધુ વરસાદ પડ્યો છે. આ સાથે 17 તાલુકાઓમાં પડ્યો 5 ઈંચ કરતા વધુ વરસાદ, 26 તાલુકામાં 4 ઈંચ કરતા વધુ વરસાદ, 44 તાલુકાઓમાં ત્રણ ઈંચ કરતા વધુ વરસાદ, 82 તાલુકાઓમાં 2 ઈંચ કરતા વધુ વરસાદ ખાબક્યો તો 135 તાલુકાઓમાં 1 ઈંચ કરતા પણ વધુ વરસાદ વરસ્યો છે.