ભયાનક / વિશ્વની સૌથી ઠંડી જગ્યા પર ભયંકર આગ, વૈજ્ઞાનિકો ગોથે ચડ્યા

• સાઈબેરિયામાં સતત વધી રહ્યું છે તાપમાન 
• વર્ખોયાન્સ્ક કસ્બાના જંગલોમાં ભીષણ આગ 
• અંતરીક્ષથી દેખાઈ રહ્યા છે આગના ધુમાડા 

સૌથી ઠંડી જગ્યા પર જ આગ 

આ જગ્યા સાઈબેરિયાનાં પૂર્વ વિસ્તારમાં સ્થિત છે એટલે કે રશિયાનું વર્ખોયાન્સ્ક કસ્બા. 20 જૂને આ સ્થળ પર સૌથી વધુ ગરમી નોંધાઈ જ્યારે પારો 38 ડીગ્રીએ પહોંચી ગયો જોકે આ જગ્યા પર તો સૌથી વધારે ઠંડી પડે છે અને તાપમાન ગગડીને માઈનસ 67 જતું રહે છે. હવે આ જગ્યા સતત ગરમ થઇ રહી છે. 

આગનાં કારણે ધુમાડાનું સામ્રાજ્ય 

નાસાનાં ગેવિન સ્મિટ અનુસાર આર્કટિકમાં તાપમાનમાં આટલો વધારો સારો નથી. વર્ખોયાન્સ્કના જંગલોમાં લાગેલી આગ 10.3 હજાર હેકટરમાં ફેલાઈ ગઈ છે. આ વિસ્તારનાં લાર્ચ નામના વૃક્ષ સૌથી વધારે બળી રહ્યા છે. જંગલમાં લાગેલી આગનાં કારણે સાઈબેરિયાના ઇલાકામાં આકાશમાં ધુમાડો એટલો ફેલાઈ ગયો છે કે અંતરીક્ષથી પણ દેખાઈ રહ્યો છે. અમેરિકાની નાસા અને રશિયાનાં મોસમ વિભાગે પણ તેને રેકોર્ડ કરી લીધું છે.  

ગ્લોબલ વોર્મિંગ છે આગનું કારણ 

વર્લ્ડ મેટેરિયોલોજીકલ ઓર્ગેનાઈઝેશને કહ્યું છે કે સાઈબેરિયામાં વધતું તાપમાન અત્યંત ભયંકર છે. આર્કટિકમાં આટલું તાપમાન દશકાઓમાં ક્યારેય થયું નથી. આગનું કારણ ગ્લોબલ વોર્મિંગ અને ધરતીની અંદર ભભૂકી રહેલી આગ છે. આગના કારણે કાર્બનડાયોક્સાઈડમાં વધારો થઇ રહ્યો છે અને ગ્રીનહાઉસ ગેસ પણ વધી ગઈ છે.