ઇન્ડિયન ઇન્સ્ટિટ્યૂટ ઓફ મેનેજમેન્ટ અમદાવાદ (IIM-A) દ્વારા કરાયેલ માસિક બિઝનેસ ઇન્ફ્લેશન એક્સપેક્ટેશન્સ સર્વે (BIES)માં ખુલાસો થયો છે કે, જુલાઇમાં દેશની ઘણી કંપનીઓના પ્રોફિટ પર મોટો ફટકો પડ્યો છે.
જુલાઇ મહીનાની વાત કરીએ તો સર્વેમાં સામેલ કરવામાં આવેલ 1600 કંપનીઓમાંથી ત્રણ ચતુર્થાંસ એટલે કે લગભગ 1200 કંપનીએ 'સામાન્યથી ઓછા' વેચાણની વાત માની. જ્યારે લગભગ અડધી કંપનીઓએ માન્યું કે પ્રોફિટ માર્જિન સામાન્યથી ખુબ જ ઓછું રહ્યું.
આ સર્વેની શરૂઆત મે 2017માં થઇ હતી. તેમા એ બિઝનેસ એકમોને સામેલ કરવામાં આવ્યા હતા, જે મોટાભાગના મેન્યૂફેક્ચરિંગ સેક્ટર સાથે જોડાયેલા હતા. સર્વેમાં જોવા મળ્યું કે મોટા ભાગની કંપનીઓએ સ્વીકાર્યું કે તેમની સેલ્સ સામાન્યથી ખુબ જ ઓછી રહી છે. અહીં સામાન્યનો અર્થ ગત ત્રણ વર્ષનું સરેરાશ સ્તર છે. સર્વેમાં આ વર્ષે જુલાઇમાં સામાન્યથી ખુબ જ ઓછો નફો બતાવનાર કંપનીઓની સંખ્યા લગભગ 54 ટકા રહી છે. એપ્રિલ 2019માં આવી કંપનીઓની સંખ્યા 45 ટકા રહી હતી.
સર્વે સાથે જોડાયેલી સત્તાવાર રિલીઝ અનુસાર, સામાન્યથી ખુબ જ ઓછો નફો જાહેર કરનાર કંપનીઓનો આંકડો પહેલીવાર જૂન 2019માં 50 ટકાને પાર કરી ગયો. જ્યારે બીજી તરફ, સર્વેના સેમ્પલમાં સામેલ કરવામાં આવેલી કંપનીઓમાં સામાન્ય અથવા સામાન્યથી વધારે નફો બતાવનાર ફર્મની સંખ્યા જુલાઇમાં ઘટીને 20 ટકા રહી ગઇ. સર્વે અનુસાર, જુલાઇ 2019માં પ્રોફિટ માર્જિન સાથે જોડાયેલી સ્થિતિ વધુ ખરાબ થઇ ગઇ છે.
આ રિપોર્ટ એવા સમયે આવી છે કે જ્યારે અર્થવ્યવસ્થાના દરેક મોરચે નકારાત્મક સમાચાર મળી રહ્યા છે. ઓટો સેક્ટર ખરાબ રીત પ્રભાવિત થયું છે. ઓટો સેક્ટર અને ટેક્સટાઇલ સેક્ટરમાં લાખો લોકોએ નોકરીઓ ગુમાવી છે. સોમવારે મળેલી રિપોર્ટ અનુસાર, કોલસા, ક્રુડ, પ્રાકૃત્તિક ગેસ અને રિફાઇનરી ઉત્પાદન ઘટવાથી 8 મહત્વપૂર્ણ ઉદ્યોગોનો વૃદ્ધિદર જુલાઇમાં ઘટીને 2.1 ટકા પર આવી ગયો. જુલાઇ 2018માં માળખાકીય ઉદ્યોગોનું વૃદ્ધિદર 7.3 ટકા રહ્યો હતો.
આંકડાઓ અનુસાર મુખ્ય રૂપથી કોયલા, ક્રુડ તેલ, પ્રાકૃત્તિક ગેસ અને રિફાયનરી ઉત્પાદનોનું ઉત્પાદન ઘટીને માળખાકીય ઉદ્યોગોની વૃદ્ધીની ઝડપ મંદ પડી છે. આ દરમિયાન સિમેન્ટ અને વીજળીના ઉત્પાદનમાં વૃદ્ધિ ધીમી રહી છે. ઔદ્યોગિક ઉત્પાદન સૂચકાંક (IIP)માં 8 માળખાકિય ઉદ્યોગોનો ભારાંશ 40.27 ટકા છે.