અમદાવાદ / સાણંદમાં રો-વોટર પમ્પિંગ સ્ટેશન બનાવવાના કામમાં રૂ.૩.૩૯ કરોડનો કરાયો ગોટાળો

ઉલ્લેખનીય છે કે, તંત્ર દ્વારા સાણંદના પ્રોજેક્ટ માટે રૂ.૩.૭૩ કરોડનો અંદાજ તૈયાર કરાયો હતો. આ અંદાજ આધારિત તૈયાર થયેલા રૂ.૩.૩૯ કરોડના કામના ટેન્ડરને મંજૂરી અપાઇ હતી. આ કામ માટે એક વર્ષની સમયમર્યાદા અપાઇ હતી, જોકે સમયમર્યાદા કરતાં વિલંબમાં મુકાયેલા આ પ્રોજેક્ટના કન્સલ્ટન્ટ મલ્ટિમીડિયા પ્રા. લિ.ની નિમણૂકની મંજૂરીની ફાઇલ તેમજ તેને અપાયેલા પેમેન્ટની વિગતો સક્ષમ સત્તા સમક્ષ મુકાઇ નહોતી. 

આપને જણાવી દઇએ કે, આ ઉપરાંત થર્ડ પાર્ટી ઇન્સ્પેક્શનની કામગીરી કરનાર માર્શ પ્લાનિંગ એન્ડ એન્જિનિયરિંગ સર્વિસની નિમણૂકની મંજૂરીની ફાઇલ તેમજ તેને કરાયેલા પેમેન્ટની વિગતો મુકાઇ ન હોવાનું સામે આવ્યું છે. કોન્ટ્રાક્ટર દ્વારા ડિફેકટ લાયેબિલિટી પિરિયડ હેઠળ આપવામાં થતી બેન્ક ગેરંટીના મામલે પણ ગેરરીતિ આચરાઇ હોવાનું જાણવા મળ્યું છે. 

થર્ડ પાર્ટી ઇન્સ્પેક્શનના અને મ્યુનિ. તંત્ર દ્વારા અપાયેલા વર્ક કમ્પ્લીશનના સર્ટિફિકેટના સમયગાળામાં ખાસ્સો-બે વર્ષનો તફાવત છે એટલે થર્ડ પાર્ટી ઈન્સ્પેક્શનના જાન્યુઆરી-ર૦૧૪ના બદલે તંત્રે જાન્યુઆરી-ર૦૧૬એ પ્રોજેક્ટ પૂર્ણ કર્યો હોવાનું પ્રમાણપત્ર આપતાં આ બાબત વિવાદાસ્પદ બની છે. 

કોન્ટ્રાક્ટર દ્વારા સપ્લાય કરાયેલા સબમર્સિબલ પંપ, સ્લૂઝ વાલ્વ તથા અન્ય વાલ્વના ડેડ સ્ટોક રજિસ્ટરમાં જમા ન કરાયા હોવાની બાબત પણ ચર્ચાસ્પદ બની છે. તંત્ર દ્વારા ચૂકવાયેલા સ્ટીલ, સિમેન્ટના બિલના ભાવવધારામાં કોન્ટ્રાક્ટરના ફાઇનલ બિલમાંથી લાખો રૂપિયાની રિક્વરી થતી હતી, જેમાં પણ આંખ આડા કાન કરાયા હતા.