રાજકોટમાં જાહેરમાં બેખૌફ થઈને બીજાના જીવને જોખમમાં મૂકનારા બંને યુવાનોને પોલીસે પકડીને સબક શિખવાડ્યો છે.
Share
ગણેશ વિસર્જન સમયે રેસકોર્ષ રીંગ રોડ પર સ્ટંટનો મામલો
સ્ટંટ કરતા 2 શખ્સોની એ ડિવીઝન પોલીસે કરી ધરપકડ
ચાર દિવસ અગાઉ બનાવ્યો હતો વીડિયો
આજના યુવાનો ઈન્સ્ટાગ્રામ જેવા સોશિયલ મીડિયા પ્લેટફોર્મ પર ફોલોઅર્સ વધારવા માટે જીવના જોખમે સ્ટંટ કરી રહ્યા છે. ત્યારે ફરી એક આવો જ વીડિયો સામે આવ્યા બાદ પોલીસે બે યુવકોને કાયદાનું ભાન કરાવ્યું છે. જાહેરમાં પોતાની જાતને બહાદુર સમજી સ્ટંટ કરતા આ નબીરાઓ પોલીસના સકંજામાં આવતા જ બકરી બની ગયા છે. જાહેરમાં બેખૌફ થઈને બીજાના જીવને જોખમમાં મૂકનારા બંને યુવાનોને પોલીસે પકડીને સબક શિખવાડ્યો છે.
બેખૌફ થઈને બાઇક પર સ્ટંટ કરતા નજરે પડ્યા
રાજકોટના રેસકોર્ષ રીંગ રોડ પર ગણેશ વિસર્જન સમયે સ્ટંટ કરતા બે શખ્સોનો વીડિયો વાયરલ થયો હતો. આ વીડિયોમાં બંને શખ્સો બેખૌફ થઈને બાઇક પર સ્ટંટ કરતા નજરે પડ્યા હતા. આ યુવકોએ જાણે કે પોલીસને ખુલ્લો પડકાર ફેંક્યો હોય તેમ બેખૌફ વીડિયો બનાવ્યો હતો. આ વીડિયો સોશિયલ મીડિયામાં વાયરલ થયા બાદ પોલીસે બંને ઝડપી પાડ્યા હતા.
બે શખ્સોની પોલીસે કરી ધરપકડ
એ ડિવીઝન પોલીસે ભોલા સાટીયા અને સ્મિત જોગરાણા નામના બે શખ્સોની ધરપકડ કરી હતી અને તેમનો માફી માંગતો વીડિયો બનાવ્યો હતો. જેમાં તેમણે જણાવ્યું કે, 'અમે આ મામલે માફી માંગીએ છીએ, આવો વીડિયો ભવિષ્યમાં અમે ક્યારેય નહીં બનાવીએ જેની અમે ખાતરી આપીએ છીએ. કોઈએ પણ આવો વીડિયો ઉતારવો નહીં. આનાથી જાનહાની પણ થાય છે.'
યુવાનો સુધરવાનું નામ જ નથી લેતા
અત્રે ઉલ્લેખનીય છે કે, આ પ્રકારના વીડિયો બનાવનારને પકડી પાડી પોલીસ દ્વારા કાયદાનું ભાન તો કરાવવામાં આવે છે. પરંતુ ઈન્સ્ટાગ્રામ પર ફોલોવર્સ વધારવાની ઘેલછાને લઈને યુવાનો સુધરવાનું નામ જ નથી લેતા. આવા યુવકોને પકડી પોલીસ માંફી તો મંગાવે છે પરંતુ કોઈ પ્રકારનો સુધાર નથી થતો.
