અમદાવાદ સિહત રાજ્યભરમાં કાળઝાળ ગરમીથી શેકાઈ રહેલા લોકોને રાહત મળે તેવા સમાચાર છે.
રાજ્યમાં આગામી પાંચ દિવસ સૂરજ ઢંકાયેલો રહેશે
સૌરાષ્ટ્ર અને દક્ષિણ ગુજરાતમાં સામાન્ય વરસાદની આગાહી
30થી 40 કિલોમીટરની ઝડપે પવન ફૂંકાઈ શકે
રાજ્યના હવામાન વિભાગના જણાવ્યા અુસાર પ્રમાણે રાજ્યના દક્ષિણ ભાગમાં તથા સૌરાષ્ટ્રમાં વરસાદ થવાની સંભાવના વ્યક્ત કરવામાં આવી છે.આ દરમિયાન 30થી 40 કિલોમીટરની ઝડપે પવન ફૂંકાઇ શકે છે, જોકે આ દરમિયાન સૌરાષ્ટ્ર, અમરેલી, સુરત, સુરેન્દ્રનગર સહિત અમદાવાદમાં પણ વીજળીના કડાકા સાથે સામાન્ય વરસાદ વરસી શકે છે.
અમદાવાદ સહિત રાજ્યભરમાં પાંચ દિ' માટે સૂરજ ઢંકાયેલો જ રહેશે
રાજ્યમાં સૌ કોઈ મેઘરાજાની આતુરતાથી રાહ જોઈ રહ્યાં હતાં તેનો આજે અંત આવી ગયો છે, આજે સવારથી જ વાતાવરણ ખુશનુમા છે. સવારથી આકાશમાં વાદળો ઘેરાયાં છે. સાથે જ આજથી પાંચ દિવસ માટે સૂરજ ઢંકાયેલો જ રહેશે તેવી શક્યતા છે. બીજી તરફ આજે અમદાવાદ શહેરમાં સામાન્ય વરસાદ પડવાની આગાહી હવામાન વિભાગે વ્યક્ત કરી છે, જોકે વાદળછાયા વાતાવરણમાંય સવારે થોડી ઠંડક પ્રસરેલી રહે છે, પરંતુ બપોર થતાં જ બફારાનું પ્રમાણ અત્યંત વધી જવા પામ્યું છે.જો કે, બપોર બાદ સુરેન્દ્રનગરના ચૂડા ખાતે સામાન્ય વરસાદ શરૂ થતાં જ ઠેરઠેર પાણી ભરાયા હતાં
કેરળમાં ચોમાસું બેસી ગયા બાદ ઝડપથી આગળ વધી રહ્યું છે
કેરળમાં ચોમાસું બેસી ગયા બાદ તેની આગળ વધવાની ઝડપ સતત વધી ગઇ છે. ગઈ કાલથી જ રાજ્યમાં જાણે ચોમાસું બેસી ગયું હોય તેમ અમરેલી જિલ્લાના સાવરકુંડલામાં વરસાદી માહોલ જોવા મળ્યો હતો. એકાએક સાવરકુંડલા, બનાસકાંઠા અને રાજ્યના અનેક વિસ્તારોમાં વાતાવરણ પલટાયું હતું. હવામાન વિભાગે આગાહી કરી છે કે રાજ્યમાં આગામી પાંચ દિવસ છૂટોછવાયો વરસાદ રહેશે. અમદાવાદમાં અતિસામાન્ય વરસાદ પડી શકે છે. આજે સુરેન્દ્રનગર, બોટાદ, અમરેલીમાં સામાન્ય વરસાદ પડી શકે છે. ચોમાસાની સત્તાવાર શરૂઆત થાય તે પહેલાં ગઇ કાલે અમરેલીમાં ધોધમાર વરસાદ વરસ્યો હતો. બપોર બાદ અચાનક વાતાવરણમાં આવેલા ફેરફાર બાદ ધૂળની ડમરીઓ ઊડવા લાગી હતી. ત્યાર બાદ સતત એક કલાક કરતાં વધુ સમય સુધી વરસાદ પડ્યો હતો.
સૌરાષ્ટ્ર અને દક્ષિણ ગુજરાતમાં વીજળીના કડાકા સાથે વરસાદી ઝાપટાં પડવાની શક્યતા
હવામાન વિભાગે આગાહી કરી છે કે ભાવનગર, સુરેન્દ્રનગર, બોટાદ અને અમરેલીમાં આજે રાતે વરસાદ પડવાની સંભાવના છે તો દક્ષિણ ગુજરાતના કેટલાક વિસ્તારોમાં અતિસામાન્ય વરસાદ પડી શકે છે. આગામી પાંચ દિવસ દરમિયાન સૌરાષ્ટ્ર અને દક્ષિણ ગુજરાતમાં વીજળીના કડાકા સાથે વરસાદી ઝાપટાં પડવાની શક્યતા છે. પ્રી-મોન્સૂન એક્ટિવિટીના કારણે વાતાવરણમાં પલટો આવશે અને ગરમીમાં આંશિક ઘટાડો નોંધાઈ શકે છે. આગામી પાંચ દિવસ ગરમીનો પારો ત્રણથી ચાર ડિગ્રી ઘટવાની સંભાવના છે. રાજ્યમાં ગઈકાલે દક્ષિણ-પશ્ચિમના પવનો ફૂંકાયા હતા, જેના કારણે રાજ્યના અનેક વિસ્તારના વાતાવરણમાં પલટો આવ્યો હતો. જેના ભાગરૂપે ધંધૂકામાં 34 એમએમ વરસાદ પડ્યો છે.
ચોમાસા પૂર્વે સામાન્ય વરસાદમાં વીજળીએ ત્રણ લોકોનો ભોગ લીધો
હજુ ગુજરાતમાં ચોમાસું બેઠું નથી ત્યાં સામાન્ય વરસાદમાં પડેલી વીજળીએ ત્રણ લોકોનો ભોગ લીધો છે. હજુ વિધિવત્ ચોમાસું શરૂ થયું નથી, તે પહેલાં જ અષાઢી માહોલ જોવા મળ્યો છે.પ્રી-મોન્સૂન એક્ટિવિટીના ભાગરૂપે ગુજરાતના અનેક જિલ્લામાં એક દિવસ પૂર્વે વરસાદ તૂટી પડ્યો હતો, જેમાં વીજળી પડવાની ત્રણ અલગ અલગ ઘટનામાં ત્રણ લોકોનાં મોત નીપજ્યાં છે. સુરેન્દ્રનગર અને પાટણમાં એક મહિલાનું મોત નીપજ્યું છે ત્યારે હવામાન વિભાગે વીજળીના કડાકા સાથે ધોધમાર વરસાદનું ગુજરાતમાં ટૂંક સમયમાં આગમન થવાનાં એંધાણ આપી દીધાં છે.