એક તરફ કોરોના મહામારી ચાલી રહી છે, તો બીજી તરફ ઉનાળાની ગરમી ત્યારે આ વચ્ચે કેટલાક વિસ્તારોમાં કમોસમી વરસાદ ખાબક્યો છે. સૌરાષ્ટ્રમાં બપોર બાદ વાતાવરણમાં પલ્ટો જોવા મળ્યો છે. ભાવનગર, વલ્લભીપુર, અમરેલી, જૂનાગઢ, ગીરસોમનાથ, સાવરકુંડલા, સુરેન્દ્રનગર, બાબરા, જસદણ સહિતનના વિસ્તારોમાં ભારે પવન સાથે વરસાદ પડ્યો છે.
સૌરાષ્ટ્રના કેટલાક વિસ્તારોમાં કમોસમી વરસાદ
ખેડૂતોની કમોસમી વરસાદને કારણે ચિંતા વધી, કેરીના પાકને નુકસાન
કાળઝાળ ગરમીમાં વરસાદ વરસતા વાતાવરણમાં ઠંડક પ્રસરી
સૌરાષ્ટ્રના કેટલાક ગામોમાં ભારે પવનના કારણે ધૂળની ડમરીઓ ઉડી હતી. તેવામાં કાળઝાળ ગરમી વચ્ચે અચાનક વાતાવરણમાં પલ્ટો આવ્યો હતો. કેટલાક વિસ્તારોમાં કમોસમી વરસાદ પડ્યો હતો. જોકે ભારે ગરમી વચ્ચે વરસાદ વરસતા વાતાવરણમાં ઠંડક પ્રસરી છે. તો બીજી તરફ ખેડૂતોની મુશ્કેલી વધી છે.
કયા કયા પડ્યો કમોસમી વરસાદ?
અમરેલી જિલ્લાના કેટલાક વિસ્તારોના વાતાવરણમાં પલ્ટો જોવા મળ્યો છે. બાબરાના ગ્રામ્ય વિસ્તારોમાં કમોસમી વરસાદ પડ્યો છે. કોટડા પીઠા, પીર ખીજડિયા સહિતના ગામોમાં પવન સાથે વરસાદ આવ્યો છે.
રાજકોટ જિલ્લામાં પણ અનેક વિસ્તારોમાં વરસાદ વરસાદ પડ્યો છે. ફાડદંગ, ગોલિડા, ડેરોઈ, રફાડા, મોવિયા અને શ્રીનાથગઢ ગામોમાં વચ્ચે કમોસમી વરસાદી ઝાપટું વરસ્યું છે. ધોરાજી અને ઉપલેટા પંથકમાં પણ ભારે પવન સાથે કમોસમી વરસાદ ખાબક્યો છે. ભારે ઉકળાટ બાદ ઉપલેડા સહિતના વિસ્તારમાં વાતાવરણમાં પલ્ટો જોવા મળ્યો છે. તો સાવરકુંડલાના ઓળીયા સહિતના ગામોમાં પણ વરસાદ વરસ્યો છે.
ભાવનગર જિલ્લાના વાતાવરણમાં પણ પલ્ટો આવ્યો છે. ભાવનગરના ગારિયાધારમાં વીજળીના કડાકા સાથે વરસાદ વરસ્યો છે. વલ્લભીપુર પંથકમાં કમોસમી વરસાદ પડ્યો છે. બાબરાના કોટડાપીઠા, પીર ખીજડીયા સહિતના ગામોમાં પવન સાથે વરસાદ વરસ્યો હતો.
સુરેન્દ્રનગરના લખતરના અણીન્દ્રા ગામમાં તડકા વચ્ચે કમોસમી વરસાદ વરસ્યો હતો. કમોસમી વરસાદને કારણે ખેડૂતોના પાકને નુકશાન થવાની ભીતિ છે.
આ તરફ જૂનાગઢના ગિરનાર જંગલમાં પણ અચાનક વાતાવરણમાં પલટો આવ્યો છે. અચાનક વાતાવરણ બદલાયા બાદ ગિરનાર જંગલમાં કમોસમી વરસાદ વરસ્યો છે. સાબલપુર ચોકડી પાસે પવન સાથે વરસાદ પડ્યો હતો. તો વડાલમાં વરસાદી ઝાંપટા પડ્યા હતા. કમોસમી વરસાદથી કેરીના પાકને નુકસાન જવાની ભીતી છે.
ગીરસોમનાથમાં સાસણ ગીર વિસ્તારોમાં ધોધમાર વરસાદ વરસ્યો છે. ભારે પવન સાથે વરસાદ વરસતા મોટા પ્રમાણમાં કેરીના પાકેને નુકશાન થઇ શકે છે. ભારે પવનથી આંબા પરથી કેરી નીચે પડી છે.
અમરેલીમાં ભારે વરસાદથી સ્ટેટ હાઈવે બંધ
અમરેલીમા ભારે વરસાદથી રાજકોટ અમરેલી સ્ટેટ હાઇવે બંધ થયો છે. ભીલડી નજીક ભારે પવનને કારણે સ્ટેટ હાઇવે પર વૃક્ષો ધરાશાયી થયા છે. બાબરા-અમરેલી હાઇવે પર વૃક્ષ ધરાશાયી થતા હાઇવે બંધ થયો છે. ભીલડી ગામથી ભિલા ગામથી રોડ ડાયવર્ટ કરવામાં આવ્યો છે.
માવઠાએ ખેડૂતોની મુશ્કેલી વધારી
કોરોનાની મહામારી વચ્ચે વરસાદે ખેડૂતોની મુશ્કેલી વધારી છે. વરસાદથી ઉનાળુ પાકને નુકસાન પહોંચ્યું છે. કમોસમી વરસાદથી કેરીના પાકને નુકસાન જવાની ભીતી છે. તલી, મગફળી સહિતના પાક પર વરસાદી પાણી પડતા ખેડૂતો ચિંતામાં મુકાયા છે.