મંથન / રાષ્ટ્રપતિ પદની ચૂંટણીના વિપક્ષના ઉમેદવાર યશવંત સિન્હા આવશે ગુજરાત, જાણો શું છે કારણ

• રાષ્ટ્રપતિ પદની ચૂંટણીના વિપક્ષ ઉમેદવાર ગુજરાત આવશે 
• યશવંત સિન્હા 30 જૂને ગુજરાત આવશે
• 1 જુલાઈએ કોંગ્રેસના ધારાસભ્યો સાથે બેઠક કરશે

તારીખ 30 જૂનના રોજ યશવંત સિન્હા ગુજરાત આવશે અને ભગવાન જગન્નાથજીના દર્શન કરે તેવી શક્યતા સેવવામાં આવી રહી છે. યશવંત સિન્હા 1 જુલાઈના રોજ ગાંધીનગરમાં કોંગ્રેસના ધારાસભ્યો સાથે બેઠક કરશે. રાષ્ટ્રપતિ પદની ચૂંટણી માટે યશવંત સિન્હા વિપક્ષ ઉમેદવાર છે.

રાષ્ટ્રપતિ રામનાથ કોવિંદનો રાષ્ટ્રપતિ તરીકેનો કાર્યકાળ પૂર્ણ થવા જઈ રહ્યો છે

ઉલ્લેખનીય છે કે, દેશના વર્તમાન રાષ્ટ્રપતિ રામનાથ કોવિંદનો રાષ્ટ્રપતિ તરીકેનો કાર્યકાળ પૂર્ણ થવા જઈ રહ્યો છે. ત્યારે રાષ્ટ્રપતિ પદ માટે વિપક્ષના ઉમેદવાર તરીકે યશવંત સિન્હાએ ઉમેદવારીપત્ર ભર્યું છે. ઉમેદવારીપત્ર ભર્યા બાદ યશવંત સિન્હા 30 જૂનના રોજ પહેલી વખત ગુજરાતની મુલાકાતે આવી રહ્યાં છે. આ પહેલાં ભાજપ તરફથી રાષ્ટ્રપતિના પદ માટે NDAના ઉમેદવાર દ્રોપદી મૂર્મુએ ઉમેદવારીપત્ર ભર્યું હતું.

યશવંત સિન્હા ગુજરાત વિધાનસભાના વિરોધ પક્ષના ખંડમાં ગુજરાત કોંગ્રેસના તમામ ધારાસભ્યો સાથે બેઠક યોજશે. નોંધનીય છે કે, રાષ્ટ્રપતિની ચૂંટણીમાં જો ચૂંટણી યોજાય તો કઈ રીતે મતદાન કરવું તે બાબતની પણ માહિતી આ બેઠકમાં આપવામાં આવી શકે છે. જ્યારે કોંગ્રેસ ઓફિસમાંથી તમામ ધારાસભ્યોને ટેલિફોનિક જાણ કરીને ગુરુવારે ફરજિયાતપણે વિધાનસભાના વિરોધ પક્ષના કાર્યાલયમાં કોંગ્રેસના તમામ ધારાસભ્યો હાજર રહેવાની સૂચના આપવામાં આવી છે.

તમામ રાજકીય પક્ષો દ્વારા ચૂંટણીલક્ષી તડામાર તૈયારીઓ શરૂ

મહત્વનું છે કે, ગુજરાતમાં હવે ગણતરીના જ મહિનાઓમાં વિધાનસભાની ચૂંટણી નજીક આવશે ત્યારે તમામ રાજકીય પક્ષો દ્વારા ચૂંટણીલક્ષી તડામાર તૈયારીઓ શરૂ કરી દેવામાં આવી છે. ઉલ્લેખનીય છે કે, રાહુલ ગાંધી પણ ગુજરાતની મુલાકાતે અગાઉ 2 વાર આવી ચૂક્યા છે તો PM મોદી પણ ગુજરાતના પ્રવાસે આવજાવ કરે છે તો બીજી બાજુ અમિત શાહ સહિતના કેન્દ્રીય મંત્રીઓ પણ ગુજરાતમાં અવરજવર કરી રહ્યાં છે. એવામાં આવનારી રાષ્ટ્રપતિની ચૂંટણીને લઇને વિપક્ષના રાષ્ટ્રપતિ પદના ઉમેદવાર યશવંત સિન્હા 30 જૂને ગુજરાત આવશે અને 1 જુલાઈના રોજ ગાંધીનગરમાં કોંગ્રેસના ધારાસભ્યો સાથે બેઠક યોજશે. ત્યારે આ બેઠકમાં રાષ્ટ્રપતિની ચૂંટણી સાથે વિધાનસભાની ચૂંટણી અંગે પણ મહામંથન થાય તેવી શક્યતા.