વડોદરામાં આવેલી સરકાર સંચાલિત ગોત્રી હોસ્પિટલ બહારથી ભવ્ય દેખાઈ રહી છે પરંતુ અંદર પ્રવેશ કરશો તો ખબર પડશે કે અહીં કેટલો અંધેર વહીવટ ચાલી રહ્યો છે.
આ હોસ્પિટલમાં એસી ટેક્નિકલ ખામીનો વિવાદ છેલ્લાં ઘણા સમયથી સમયાંતરે પ્રકાશમાં આવતો જ રહે છે. ત્યારે હવે ફરી પાછા છેલ્લાં ચાર દિવસથી આ હોસ્પિટલનાં એસી બંધ થઈ જતાં દર્દીઓને હાલાકી ભોગવવાનો વારો આવ્યો છે.
વડોદરા (Vadodara) નાં ગોત્રી મેડિકલ હોસ્પિટલ (GMERS Medical College) માં એસી ચાલ અને બંધ થવાનો સિલસિલો અટકવાનું નામ નથી લઈ રહ્યો. આ પ્રથમ વાર નથી બન્યું કે છેલ્લાં ઘણા સમયથી આ ગોત્રી મેડિકલ હોસ્પિટલમાં એસીમાં ખામી સર્જાતા દર્દીઓને માથે મોત ઝળુંબવા લાગે છે કારણ એ કે એસી બંધ થઈ જતા અનેક ઓપરેશન કેન્સલ કરી દેવામાં આવે છે. ત્યારે હજુ પણ છેલ્લાં 4 દિવસથી ઓપરેશન થિયેટરનાં એસી બંધ પડી જતાં અનેક ઓપરેશનો રદ્દ કરવામાં આવ્યાં છે. ત્યારે કેવો હોય છે આ સરકારી હોસ્પિટલનાં તંત્રનાં અણઘડ વહીવટનો નમૂનો તે જોઇએ આ અહેવાલમાં.
વડોદરામાં આવેલી સરકાર સંચાલિત ગોત્રી હોસ્પિટલ બહારથી ભવ્ય દેખાઈ રહી છે પરંતુ અંદર પ્રવેશ કરશો તો ખબર પડશે કે અહીં કેટલો અંધેર વહીવટ ચાલી રહ્યો છે.
આ હોસ્પિટલમાં એસી ટેક્નિકલ ખામીનો વિવાદ છેલ્લાં ઘણા સમયથી સમયાંતરે પ્રકાશમાં આવતો જ રહે છે. ત્યારે હવે ફરી પાછા છેલ્લાં ચાર દિવસથી આ હોસ્પિટલનાં એસી બંધ થઈ જતાં દર્દીઓને હાલાકી ભોગવવાનો વારો આવ્યો છે.
હોસ્પિટલમાં સેન્ટ્રલ એસીમાં ટેકનિકલ ખામી સર્જાતા છેલ્લાં ચાર દિવસથી તમામ પ્રકારનાં ઓપરેશનો રદ કરી દેવામાં આવ્યાં છે. ગંભીર દર્દથી પીડાતા દર્દીઓ તત્કાલ ઓપરેશન માટે અહીં દાખલ થયેલા છે પરંતુ હોસ્પિટલનું તંત્ર તેમને એસી બંધ હોવાનું કારણ ધરીને તેમનાં ઓપરેશનો અનિશ્ચિત તારીખો પર ઠેલવી રહ્યાં છે. કેટલાંક દર્દીઓ છેલ્લાં બાર દિવસથી અહીં ઓપરેશન માટે દાખલ છે પરંતુ તેમને બાર દિવસથી કાલની તારીખ અપાઈ રહી છે.
વડોદરા ખાતેની આ ગોત્રી મેડિકલ હોસ્પિટલ શહેરનાં આરોગ્યની જીવાદોરી છે અને તે સીધી સરકારનાં આરોગ્ય વિભાગની દેખરેખ નીચે ચાલે છે. પરંતુ એ જ હોસ્પિટલમાં જ્યારે છેલ્લા ચાર દિવસથી એસી બંધ હોવાનાં વાંકે અનેક દર્દીઓનાં ઓપરેશન રદ કરવા પડ્યાં છે. એસી બંધ હોવાનાં કારણે કેન્સલ થયેલા ઓપરેશનની વાત કરીએ તો ઓર્થોપેડિકનાં 5 ઓપરેશન, સર્જરીનાં 17 ઓપરેશન, ગાયનેકનાં 2 ઓપરેશન અને અન્ય 3 ઓપરેશન હાલ પૂરતા રદ કરી દેવામાં આવ્યાં છે.
ત્યારે હાલ દર્દીઓને શાંતવન આપનારું કોઈ નથી. આવી મોટી હોસ્પિટલમાં દર્દીઓને એસીની ખામીનાં વાંકે દર્દથી તડપવું પડે છે. ત્યારે આયુષ્યમાન ભારત હજુ ઘણુ દૂર જણાય છે. કેમ કે દર્દીઓનાં દર્દનાં તત્કાલ નિરાકણ જેવા ઓપરેશનને બદલે તમને તારીખો મળી રહી છે. એટલું જ નહીં દર્દીનાં કેટલાંક પરિજનો પણ કહે છે કે અહીં ઓપરેશનની મુદતો માટે બેસવું તે કરતાં ઘરે જઈને આરામ કરવો વધારે યોગ્ય છે.
ગોત્રી મેડિકલ હોસ્પિટલનાં એસીની સુવિધા અન્ય કંપની પાસેથી લીધી હતી અને સર્વિસનું કામ અન્ય કંપનીને સોંપવામાં આવ્યું છે. પરંતુ હોસ્પિટલ તંત્રનું કહેવું છે કે, હાલ એસીનાં યોગ્ય સ્પેરપાર્ટ મળતા નથી તેના કારણે આ સમસ્યા ઉભી થઇ છે. હોસ્પિટલનાં સત્તાવાળા આ સમસ્યાનો ઉકેલ સ્ટેટ લેવલથી ઉકેલાવાની રાહ જોઈ રહ્યાં છે અને આ તરફ ગરીબ નાગરિકો ઓપરેશનમાં વિલંબ થતા દર્દીથી કણસી રહ્યાં છે. છતાં જાણે હોસ્પિટલનાં સુપ્રિન્ટેન્ડેન્ટનાં પેટનું પાણી ન હલતું હોય તેવું લાગી રહ્યું છે.
એક તરફ ભારત આયુષ્યમાન બનવા તરફ પ્રયાણ કરી રહ્યું છે. તો બીજી તરફ રાજ્યની મહત્વની હોસ્પિટલમાં ખામી ભર્યો એસી પ્લાન્ટ દર્દીઓનાં જીવ જોખમમાં મૂકી રહ્યો છે. નવાઈની વાત તો એ છે કે, તેમ છતાં હોસ્પિટલ તંત્ર આ ખામીનો કાયમી ઉકેલ શોધી શકવામાં નિષ્ફળ ગયું છે. એક તરફ એસી ભરોસે હોસ્પિટલ તંત્ર છે તો સામે પક્ષે રામભરોસે દર્દીઓ છે.