વડોદરા / ચૂંટણીની કામગીરીમાં ન જનાર સગર્ભા શિક્ષિકાઓ સામે કાર્યવાહી, ગેરહાજર રહેનારને ફટકારાઈ કારણદર્શક નોટીસ

• વડોદરામાં ચૂંટણી કામગીરીમાં ન જનારા શિક્ષક-આચાર્યને નોટિસ 
• 2 શિક્ષકો સગર્ભા-6 શિક્ષકોના બાળકો 1 વર્ષથી નાના છતાં ઓર્ડર અપાયો
• રોટેશન પ્રમાણે વારો ન આવતો હોય તેવાં શિક્ષકોને પણ ઓર્ડર અપાયા

વડોદરામાં ચૂંટણીની કામગીરીમાં ન જનારા શિક્ષણ સમિતિના શિક્ષક-આચાર્યને નોટિસ ફટકારવાનો મામલો સામે આવ્યો છે. શિક્ષણ સમિતિના શિક્ષક-આચાર્યને BLOની કામગીરી સોંપવામાં આવી હતી. દરમ્યાન જે શિક્ષકો-આચાર્ય હાજર ન હોતા થયા તેઓને કારણદર્શક નોટિસ પાઠવવામાં આવી છે. આથી, ચૂંટણી શાખા દ્વારા 41 શિક્ષક-આચાર્યને નોટિસ પાઠવતાં શિક્ષકોમાં રોષ જોવા મળી રહ્યો છે.

આ ઘટનામાં 2 શિક્ષકો સગર્ભા અને 6 શિક્ષકોના બાળકો 1 વર્ષથી નાના હોવા છતાં ચૂંટણી શાખા દ્વારા ઓર્ડર અપાયો હોવાનું જાણવા મળી રહ્યું છે. ડ્યુટી હોવા છતાં 8 શિક્ષકોને ચકાસણી વિના ફરીથી ઓર્ડર આપવામાં આવ્યો. રોટેશન પ્રમાણે વારો ન આવતો હોય તેવાં શિક્ષકોને પણ ચૂંટણી શાખા દ્વારા ઓર્ડર આપવામાં આવ્યા. જેથી જે શિક્ષકો-આચાર્ય હાજર ન હોતા થયા તેઓને નોટિસ પાઠવવામાં આવી. તેમજ શિક્ષક-આચાર્યને નોટિસનો 1 દિવસમાં લેખિતમાં જવાબ આપવા આદેશ પણ કરાયો. જો નોટિસનો જવાબ નહીં આપવામાં આવે તો તેઓની સામે કડક કાર્યવાહી કરવાની પણ ચીમકી ઉચ્ચારવામાં આવી છે.

આ મામલે કેટલાંક પ્રશ્નો ઉભા થાય છે. જેમ કે....

• સગર્ભા શિક્ષકોને કામગીરી કેવી રીતે આપી શકાય?
• 1 વર્ષ કરતા નાના બાળકો હોય તેવાં શિક્ષકોને પણ કેમ જવાબદારી સોંપાઇ?
• શું કામગીરી આપ્યા પહેલાં શિક્ષકોની માહિતી ચૂંટણી વિભાગ દ્વારા નહોતી મેળવવામાં આવી?
• સગર્ભા શિક્ષકોને નોટિસ પાઠવનારાઓમાં માનવતા છે કે નહીં?
• શું અધૂરી માહિતી સાથે શિક્ષકોને નોટિસ પાઠવવામાં આવી?
• શું શિક્ષકોનું કારણ વ્યાજબી હોવા પર તેઓને છૂટછાટ ન મળવી જોઈએ?