આવતીકાલ 26 ફેબ્રુઆરીથી ગુજરાત વિધાનસભાનું બજેટસત્ર શરૂ થઇ રહ્યું છે. ગુજરાત રાજયનું વર્ષ 2020-21નું અંદાજપત્ર 26 ફેબ્રુઆરીએ વિધાનસભા ગૃહમાં નાયબ મુખ્યમંત્રી નીતિન પટેલ નાણાપ્રધાન તરીકે રજૂ કરશે. જો કે, આ ઘટના એક રેકોર્ડ સમાન રહેશે. કારણ કે તેઓ સતત આઠમી વખત બજેટ રજૂ કરવાના છે.
મંગળવારે ગુજરાત સરકારનું બજેટ
નાણામંત્રી નીતિન પટેલના નામે નોંધાશે રેકોર્ડ
વજુભાઇ વાળા બાદ સૌથી વધુ બજેટ રજૂ કરવાનો થશે રેકોર્ડ
આપને જણાવી દઇએ કે, ગુજરાત વિધાનસભામાં અત્યાર સુધીમાં સૌથી વધુ 18 વખત બજેટ રજૂ કરવાનો રેકોર્ડ પૂર્વ નાણાંમંત્રી અને કર્ણાટકના રાજ્યપાલ વજુભાઈ વાળાના નામે છે. જ્યારે બીજા ક્રમે સાત વખત બજેટ રજૂ કરનારા નીતિનભાઈ પટેલ છે અને તેઓ આવતીકાલે 8મી વાર બજેટ રજૂ કરીને રેકોર્ડ કરવાના છે.
વજુભાઇ વાળાએ સતત 18 વખત બજેટ રજૂ કર્યું હોવાનો રેકોર્ડ
ઉલ્લેખનીય છે કે, કર્ણાટકના રાજ્યપાલ અને ગુજરાતના પૂર્વ નાણામંત્રી વજૂભાઇ વાળાએ ગુજરાત વિધાનસભામાં સતત 18 વખત બજેટ રજૂ કર્યા હોવાનો રેકોર્ડ છે. જેમાં તેમણે કેશુભાઈ પટેલના મુખ્યમંત્રીકાળ દરમિયાન 1998થી લઈ 2001 સુધી અને ત્યાર બાદ વર્ષ 2002થી નરેન્દ્રમોદીના મુખ્યમંત્રી કાળ દરમિયાન વર્ષ 2014 સુધીમાં 18વાર બજેટ રજૂ કર્યા હતા. જો કે 2012 બાદ વજુભાઈને બદલે નીતિન પટેલને નાણાંમંત્રી બનાવવામાં આવ્યા અને તેમણે 2014 સુધી બજેટ રજૂ કર્યા હતા.
આઠમી વખત નીતિન પટેલ રજૂ કરશે બજેટ
આવતીકાલથી ગુજરાતનું બજેટ સત્ર શરૂ થઇ રહ્યું છે ત્યારે રાજ્યના નાયબ મુખ્યમંત્રી તથા નાણામંત્રી નીતિન પટેલ બુધવારે આઠમી વખત બજેટ રજૂ કરવાના છે. આ ઘટના એક રેકોર્ડ સમાન બનશે. કારણ કે વજુભાઇ વાળા બાદ વધુ બજેટ રજૂ કરનાર વ્યક્તિ નીતિન પટેલ બનશે.
સત્રમાં ત્રણ બેઠક તબક્કાવાર મળશે
આ સત્રમાં અલગ-અલગ ત્રણ બેઠક તબક્કાવાર મળશે. જ્યારે ચર્ચા માટે ચાર બેઠક, માંગણીઓ પરની ચર્ચા માટે બાર બેઠક, સરકારી વિધેયક માટે ચાર બેઠક મળશે. દરમિયાન પ્રદેશ કોંગ્રેસના પ્રવક્તા ડો. મનીષ દોશી કહે છે કે, આવતી કાલથી શરૂઆત થનારી બજેટ બેઠક માટે કોંગ્રેસ શિક્ષણ, રોજગાર, ખેડૂત, મહિલા સુરક્ષા અને બાળકોના વધતા જતા મૃત્યુદર વગેરે મામલે શાસક પક્ષને વિધાનસભામાં ઘેરશે.