તૈયાર રહેજો! / આગામી 24 કલાક ગુજરાત માટે ભારે! નર્મદા ડેમ ઓવરફ્લો તો સાબરમતીમાં પૂર આવવાની શક્યતા

• રાજ્યમાં ભારે વરસાદની આગાહી 
• કેટલાક ભાગોમાં પડશે વરસાદ 
• અંબાલાલ પટેલે આપી આગાહી

ગુજરાતમાં ફરી એકવાર વરસાદને લઈ આગાહી સામે આવી છે. વાત જાણે એમ છે કે, હવામાન વિભાગની આગાહી વચ્ચે હવે હવામાન નિષ્ણાંત અંબાલાલ પટેલની આગાહી સામે આવી છે. અંબાલાલ પટેલે આગામી 24 કલાકમાં રાજ્યમાં કેટલાક ભાગોમાં ભારે વરસાદની આગાહી કરી છે. 

હવામાન નિષ્ણાંત અંબાલાલ પટેલે ભારે વરસાદની આગાહી કરી છે. જેમાં વડોદરા, સાવલી, આણંદ, ખેડા, નડીયાદમાં આગામી 24 કલાકમાં ભારેથી અતિભારે વરસાદની સંભાવના છે. અંબાલાલ પટેલે કહ્યું કે, બનાસકાંઠા, અરવલ્લી અને પંચમહાલમાં મધ્યમથી ભારે વરસાદની શક્યતા તો રાજકોટ, જામનગર અને સુરેન્દ્રનગરમાં વરસાદ પડી શકે છે. 

અંબાલાલ પટેલે ગુજરાતની સાથે-સાથે રાજસ્થાન અને મધ્યપ્રદેશમાં ભારે વરસાદની સંભાવના વ્યક્ત કરી છે. આ સાથે નર્મદા નદીમાં પૂર અને ડેમ ઓવરફ્લો થવાની આગાહી કરી છે. અંબાલાલ પટેલે કહ્યું કે, સાબરમતી નદીમાં પણ પૂર આવે તેવી સંભાવના છે. આ તરફ હવે હવામાન વિભાગ બાદ અંબાલાલ પટેલે પણ ગુજરાતમાં વરસાદની આગાહી કરી છે. 

છેલ્લા 24 કલાકમાં ગુજરાતના 102 તાલુકામાં વરસાદ
હવામાન વિભાગની આગાહીને પગલે મેઘરાજા ગુજરાતમાં ધડબડાટી બોલાવી રહ્યા છે. છેલ્લા 24 કલાકમાં ગુજરાતના 102 તાલુકાઓમાં વરસાદ નોંધાયો છે.  જેમાં વલસાડ જિલ્લાના કપરાડા તાલુકામાં સૌથી વધુ 9 ઇંચથી વધુ વરસાદ વરસી ચૂક્યો છે. જ્યારે 39 તાલુકાઓમાં એક ઇંચથી વધુ વરસાદ નોંધાયો છે. બીજી બાજુ આજ સવારથી નવસારીમાં ધોધમાર વરસાદ વરસી રહ્યો છે. ધોધમાર વરસાદે નવસારી શહેરને જળબંબાકાર સ્થિતિમાં મૂકી દીધું છે. એવામાં ગુજરાતમાં આગામી 24 તારીખ સુધી ભારે વરસાદની આગાહી કરવામાં આવી છે. આગામી 3 દિવસ ગુજરાતમાં સાર્વત્રિક વરસાદની આગાહી હવામાન વિભાગ દ્વારા કરવામાં આવી છે. 

મધ્ય ગુજરાતમાં ભારેથી અતિભારે વરસાદની આગાહી
હવામાન વિભાગના જણાવ્યા અનુસાર, આગામી 24 કલાકમાં ગુજરાતના કેટલાક વિસ્તારોમાં ભારેથી અતિભારે વરસાદની આગાહી છે. આગામી 24 કલાકમાં મધ્ય ગુજરાતમાં ભારેથી અતિભારે વરસાદની આગાહી છે. આજે વડોદરા, સાવલી, આણંદ, ખેડા, નડિયાદમાં ભારેથી અતિભારે વરસાદની આગાહી છે. આ ઉપરાંત અમદાવાદ, વિરમગામ, સાણંદ, ધોળકા, ધંધુકામાં વરસાદની આગાહી છે.

આ વિસ્તારોમાં પણ પડી શકે છે ભારે વરસાદ
બનાસકાંઠા, અરવલ્લી, પંચમહાલ જિલ્લામાં માધ્યમથી ભારે વરસાદની આગાહી છે. રાજકોટ, જામનગર અને સુરેન્દ્રનગર જિલ્લાઓમાં પણ ભારે વરસાદની શક્યતા છે.

આ જિલ્લાઓમાં આજે ઓરેન્જ એલર્ટ જાહેર
આજે બનાસકાંઠા, સાબરકાંઠા, અમદદાવાદ, આણંદ, ભરૂચ, અમરેલી અને ગીર સોમનાથમાં એરેન્જ એલર્ટ જાહેર કરવામાં આવ્યું છે. જ્યારે સુરેન્દ્રનગર, રાજકોટ, બોટાદ, વડોદરા, સુરત અને નવસારીમાં યલો એલર્ટ જાહેર કરાયું છે. 

23 જુલાઈએ ગુજરાતના 5 જિલ્લાઓમાં ઓરેન્જ એલર્ટ
આવતીકાલે એટલે કે સુરેન્દ્રનગર, અમદાવાદ, આણંદ, ભરૂચ, સુરતમાં ઓરેન્જ એલર્ટ જાહેર કરવામાં આવ્યું છે. જ્યારે કચ્છ, પાટણ, મોરબી, નવસારી, વલસાડ, પોરબંદર, જૂનાગઢ, ગીર સોમનાથમાં યલો એલર્ટ જાહેર કરાયું છે.