કલોલની સરકારી હોસ્પિટલની કફોડી હાલત

નાગરિકોને આરોગ્યલક્ષી સુવિધાઓ પૂરી પાડવાના હેતુથી સામુહિક આરોગ્ય કેન્દ્રની સ્થાપના કરવામાં આવે છે. પરંતુ આવા આરોગ્ય કેન્દ્રોની હાલત જ જ્યારે કફોડી હાલત થઈ જાય ત્યારે નાગરિકોનું આરોગ્ય ભગવાન ભરોસો થઈ જાય છે. ગાંધીનગરના કલોલ તાલુકાનું આવું જ એક 30 વર્ષ જૂનું આરોગ્ય કેન્દ્ર ખંડેર હાલતમાં છે.

ગાંધીનગર જિલ્લાના કલોલ તાલુકામાં નાગરિકોને આરોગ્યલક્ષી સેવાઓ પૂરી પાડવાના હેતુથી 1982માં સિવિલ હોસ્પિટલનો પ્રારંભ કરવામાં આવ્યો હતો. તત્કાલિન નાયબ આરોગ્ય મંત્રી કોકિલાબહેન વ્યાસના હસ્તે આ હોસ્પિટલનું ઉદ્ઘાટન કરવામાં આવ્યું હતું. પરંતુ 30 વર્ષ જૂની આ હોસ્પિટલ આજે ખંડેર બની ગઈ છે. આ હોસ્પિટલના વિવિધ વોર્ડમાં દર્દીઓને સારવાર આપવામાં આવતી હતી. આજે આ હોસ્પિટલના તમામ વોર્ડમાં કાટમાળ ભરેલો છે.

આ હોસ્પિટલમાં કુલ 32 વ્યક્તિઓનો સ્ટાફ છે. જેમાંથી માંડ 5થી 6 કર્મચારીઓ જ ફરજ પર હાજર હોય છે. આ સાથે વિપક્ષનો એવો આક્ષેપ છે કે નગરપાલિકા દ્વારા હોસ્પિટલને ફાળવવામાં આવતી ગ્રાન્ટનો યોગ્ય ઉપયોગ થતો નથી.

કલોલ સિવિલ હોસ્પિટલ એક સમયે સાધનસંપન્ન હતી. પરંતુ તેની યોગ્ય જાળવણી ન થતા આજે તે બિસ્માર હાલતમાં જોવા મળે છે. અહીં એક્સ-રે મશીન છે પરંતુ છેલ્લા 5 વર્ષથી એક્સ-રે રૂમને તાળાબંધી કરવામાં આવી છે. આ હોસ્પિટલને પીવાના પાણી માટે કૂલર દાનમાં મળ્યું છે પરંતુ તે પણ લગાવવામાં આવ્યું નથી.

કલોલ નગરપાલિકા દ્વારા સંચાલિત આ હોસ્પિટલને કેન્દ્ર અને રાજ્ય બંને તરફથી ગ્રાન્ટ મળે છે પરંતુ આ કરોડો રૂપિયાની ગ્રાન્ટના ગેરવહિવટને કારણે આજે હોસ્પિટલ ખાડે ગઈ છે. કલોલ નગરવાસીઓની માગ છે કે આ હોસ્પિટલનો વહિવટ સુધારી તેને ફરીથી કાર્યાન્વિત કરવામાં આવે જેથી લોકોને આરોગ્યલક્ષી સુવિધાઓ સરળતાથી મળી રહે.