ઝારખંડ વિધાનસભા ચૂંટણીમાં 40થી વધારે સ્ટાર પ્રચારકો અને મોટી સંખ્યામાં સાંસદોના ચૂંટણી પ્રચાર છતા બીજેપી ચૂંટણી પરિણામ પોતાના પક્ષમાં ન કરી શકી. બીજી તરફ ઓછા સ્ટાર પ્રચારકો સાથે ઉતરેલા મહાગઠબંધને સારી સફળતા મેળવી ઝારખંડની સત્તા બીજેપી પાસેથી છિનવી લીધી.
ઝારખંડ ચૂંટણીમાં બીજેપીના તમામ સ્ટાર પ્રચારકોનો ચૂંટણી પ્રચાર રહ્યો ફ્લોપ
40થી વધારે સ્ટાર પ્રચારકો અને મોટી સંખ્યામાં સાંસદોના ચૂંટણી પ્રચાર છતા બીજેપી હારી
જમશેદપુરમાં નરેન્દ્ર મોદીએ ચૂંટણી રેલી કરી, પરંતુ ત્યાં બીજેપીએ સૌથી મોટી હાર મેળવી
બીજેપીના સ્ટાર પ્રચારકોની સૂચીમાં સૌથી ઉપર રહેલા પીએમ નરેન્દ્ર મોદી અને અધ્યક્ષ અમિત શાહે જ્યાં-જ્યાં રેલીઓ કરી, મોટાભાગના ક્ષેત્રોમાં બીજેપીના ઉમેદવારે હારનો સામનો કરવો પડ્યો.
જમશેદપુરમાં નરેન્દ્ર મોદીએ ચૂંટણી રેલી કરી હતી, પરંતુ ત્યાં બીજેપીએ સૌથી મોટી હારનો સામનો કરવો પડ્યો. અહીં મુખ્યમંત્રી રઘુવર દાસને તેમના જ મંત્રીમંડળના સહયોગી રહેલા અને બળવાખોર અપક્ષ ઉમેદવાર સરયૂ રાય સામે હારનો સામનો કરવો પડ્યો. જમશેદપુર પશ્ચિમમાં પણ પીએમ નરેન્દ્ર મોદીની રેલીનો લાભ ન મળ્યો અને ત્યાં પણ બીજેપીના દેવેન્દ્ર નાથ સિંહને કોંગ્રેસના બન્ના ગુપ્તાએ માત આપી.
પીએમ નરેન્દ્ર મોદીએ આ ઉપરાંત ગુમલા, બરહી, દુમકા અને બરહેટમાં પણ ચૂંટણી રેલીઓને સંબોધિત કરી હતી, પરંતુ આ ક્ષેત્રોમાં પણ બીજેપી ઉમેદવારોએ હારનો સામનો કરવો પડ્યો. દુમકા અને બરહેટથી JMM, આરજેડી અને કોંગ્રેસના ગઠબંધનના મુખ્યમંત્રી ઉમેદવાર હેમંત સોરેને જીત મેળવી. બીજેપીના બીજા સ્ટાર પ્રચારક અને દેશના ગૃહમંત્રી અમિત શાહનો જાદૂ પણ ઝારખંડ મતદારો પર ન ચાલ્યો. તેઓેએ પણ આ વિસ્તારોમાં ચૂંટણી રેલીઓને સંબોધિત કરી, તેમાંથી મોટાભાગના ક્ષેત્રોમાં બીજેપી ઉમેદવારોએ હારનો સામનો કરવો પડ્યો.
અમિત શાહ, રાજનાથ, ગડકરીએ કરી હતી રેલીઓ
અમિત શાહે આ ચૂંટણીમાં મનિકા, લોહરદગા, ચતરા, ગઢવા, બહરાગોડા, ચક્રધરપુર, ગિરિડીહ, પાકુડ, પોડૈયાહાટ, દેવધર અને બાઘમારામાં કુલ 11 રેલીઓને સંબોધિત કરી હતી. તેમાંથી માત્ર દેવધર અને બાઘમારા બેઠકને છોડીને તમામ બેઠકો પર બીજેપી ઉમેદવારોને હારનો સામનો કરવો પડ્યો. નોંધનીય છે કે, બીજેપીના સ્ટાર પ્રચારકોમાં સામેલ પીએમ નરેન્દ્ર મોદી, કેન્દ્રીય ગૃહમંત્રી અને પાર્ટી અધ્યક્ષ અમિત શાહ, રક્ષા મંત્રી રાજનાથ સિંહ, કેન્દ્રીય મંત્રી નિતિન ગડકરી, સ્મૃતિ ઇરાનીએ અહીં ઘણા પ્રવાસ કર્યા હતા. બીજી તરફ, કોંગ્રેસે ઝારખંડ બન્યા બાદ પહેલી વાર આટલી મોટી સફળતા મળેવી છે.
કોંગ્રેસે જીતી 16 બેઠક
કોંગ્રેસે આ ચૂંટણીમાં JMM અને આરજેડીની સાથે ચૂંટણી ગઠબંધન કરી 16 બેઠકો પર જીત નોંધી છે. કોંગ્રેસની તરફથી અથવા તો એમ કહીએ કે ગઠબંધન તરફથી સ્ટાર પ્રચારક રાહુલ ગાંધીએ આ ચૂંટણીમાં સિમડેગા, રાજમહલ, બડકાગાંમ, ખિજરી અને મહાગામામાં કુલ પાંચ ચૂંટણી રેલીઓ કરી. તેમાંથી માત્ર રાજમહલ બેઠકથી કોંગ્રેસ ઉમેદવારને હારનો સામનો કરવો પડ્યો, બાકી ચાર બેઠકો પર કોંગ્રેસના ઉમેદવાર વિજયી થયા.
પ્રિયંકા ગાંધીની રેલીવાળા વિસ્તારમાં કોંગ્રેસની જીત
કોંગ્રેસની સ્ટાર પ્રચારક પ્રિયંકા ગાંધીએ આ ચૂંટણીમાં માત્ર પાકુડમાં એક ચૂંટણી રેલીને સંબોધિત કરી. જ્યાં કોંગ્રેસ ઉમેદવાર આલમગીર આલમે રાજ્યમાં મોટી સંખ્યામાં મતોના અંતરથી જીત મેળવી છે. આ ચૂંટણીમાં JMMના સ્ટાર પ્રચારક હેમંત સોરેને કુલ 54 બેઠકો પર ઉમેદવારોના પ્રચાર માટે 126 ચૂંટણી રેલીઓને સંબોધિત કરી, જેમાંથી 47 બેઠકો પર ગઠબંધનના ઉમેદવાર વિજયી બન્યા છે.